Failauga 1 - O LE TUSI PAIA

O LE MATAUPU I O le liliu soo o mea, ma le tiga o tagata i mea latou te faia.

¹ O upunei a le Failauga, le atalii o Tavita, le tupu i Ierusalema.

² Ua faapea mai le Failauga, E matuā faatauvaa, e matuā faatauvaa; e faatauvaa mea uma lava.

³ Se a se mea e maua e le tagata i ana galuega uma e tiga ai o ia i lalo o le la?

⁴ E mavae atu le tasi tupulaga, a e sau le tasi tupulaga; a o le lalolagi e tumau lea e faavavau.

⁵ E alu ae foi le la, e alu ifo foi le la, ma faataalise atu o ia i le mea na alu ae ai.

⁶ E alu atu ia i le itu i toga, e toe liliu mai foi i le itu i matu. E agi le matagi ma liliu soo, ma toe foi le matagi i ona faataamiloga.

⁷ O loo tafe ifo vaitafe uma i le sami; a e le tumu ai le sami; o le mea e tafe mai ai vaitafe, e toe foi atu ia i ai.

⁸ O mea uma e tele i ai galuega; e le mafai e se tagata ona faamatalaina; e le mălie mata i vaai, e le tutumu foi taliga i faalogo.

⁹ Se a se mea ua uma ona tupu? o le mea lava lea e toe tupu. Se a se mea ua uma ona faia? o le mea lava lea e toe faia; ua leai lava se mea fou i lalo o le la.

¹⁰ E ai ea se mea e mafai ona fai atu i ai, Ina vaai mai ia, o le mea fou lenei? sa i ai ia anamua, i tausaga na muamua ia i tatou.

¹¹ Ua le manatua mea sa i ai anamua, o mea foi o le a i ai i se aso, o le a le manatua ia te i latou e mulimuli mai.

¹² O a‘u nei o le Failauga, ua fai a‘u ma tupu o Isaraelu i Ierusalema.

¹³ Ua ou faasaga foi lo‘u loto e saili ma suesue ma le poto mea uma lava ua faia i lalo o le lagi; ua tuuina mai lenei faiva leaga e le Atua i tagata ia latou tiga i fai i ai.

¹⁴ Ua ou vaavaai i galuega uma ua faia i lalo o le la; faauta foi, o mea faatauvaa uma lava ia, ma le ‘ai i le matagi.

¹⁵ O le mea ua piopio e le mafaasa‘oina; o le mea foi ua le i ai e le mafaitaulia.

¹⁶ Na ou tautala ifo i lo‘u loto, ua faapea ifo, Faauta, ua ou faateleina lava le poto, e sili lava ia te i latou uma sa pule i Ierusalema e muamua ia te au; e tele foi le poto ma le iloa o mea na maua i lo‘u loto.

¹⁷ Ua ou faasaga foi lo‘u loto ia iloa le poto, ia iloa foi le faalialia vale ma le valea; ua ou iloa ai foi o le ‘ai i le matagi lea.

¹⁸ Auā o le tele o le poto e tele ai le loto tiga; o le na te faateleina foi le iloa o mea, na te faateleina ai le faanoanoa.