Fa‘ata‘oto 8 - O LE TUSI PAIA

O LE MATAUPU VIII. O le silisili o le aoga o le poto.

¹ E le ua valaau ea le poto, ma leo tele mai le faautauta?

² O loo tu o ia i le tumutumu o mea maualuga i tafatafa ane o le ala, i le fetaulaigāala;

³ ua alaga o ia i le itu o le puipui, i le ala o le aai, i le mea e ui atu ai i le faitotoa.

⁴ Ou te valaau ia te outou tagata; ma ou leo tele atu i le fanau a tagata.

⁵ Outou ē faigofie e, ia outou iloa le faautauta; ma outou ē valelea, ia loto matala outou.

⁶ Ia outou faalogologo mai, auā ou te tautalatala i mea sili; e tautala o‘u laugutu i mea tonu.

⁷ Auā a tautala lo‘u gutu ma le faamaoni; a o le amio leaga, e inosia lea i o‘u laugutu.

⁸ O upu uma a lo‘u gutu ua tonu ia; e le o i ai se upu faa‘ole‘ole ma le faapiopio.

⁹ E sa‘o uma lava ia i le ua lagona; e tonu foi i e ua maua le poto.

¹⁰ Ia outou talia la‘u a‘oa‘o atu, a e aua i le ario; ma ia talia le poto e sili i le auro e aupito lelei.

¹¹ Auā e sili ona lelei le poto i penina; ma mea faafiafia uma lava e le tusa ma ia.

¹² O a‘u o le poto, ma te mau ma le faautauta; ou te maua foi le poto i mafaufau.

¹³ O le mata‘u ia Ieova, o le ‘ino‘ino lea i le leaga; o le faamaualuga, ma le loto fefete, ma le amio leaga, ma le gutu faapiopio, ou te ‘ino‘ino i ai.

¹⁴ Ua ia te au le mafaufau ma le poto; o a‘u nei lē atamai, ua ia te au le malosi.

¹⁵ O a‘u e tupu ai tupu; e pule tonu ai foi alii.

¹⁶ O a‘u e alii ai alii sili ma alii, o faamasino uma o le lalolagi.

¹⁷ Ou te alofa atu ia i latou o e alofa mai ia te au; o e sailiili mai foi ia te au, latou te maua a‘u.

¹⁸ O loo ia te au le oloa ma le mamalu; o le oloa anagata ma le amiotonu.

¹⁹ O la‘u fua e sili ona lelei lea i le auro, o le auro lelei lava; o mea foi e tupu mai ia te au, e sili ona lelei ia i le ario sili.

²⁰ Ou te savali i le ala o le amiotonu, i magāala o le faamasinoga;

²¹ ina ia ou avatua le oloa i e ua alofa ia te au, ia fai mo latou; ou te faatumuina foi mea e teu ai o latou oa.

²² O Ieova e ona lava a‘u, o le amataga o lona ala, e muamua i ana galuega anamua.

²³ Na faauuina a‘u mai le vavau, mai le amataga, a o leai se lalolagi.

²⁴ Na fanaua au, a o leai ni mea loloto; a o leai foi ni puna e puna tele mai ai le vai;

²⁵ sa fanaua a‘u, a o lei faavaeina mauga, e leai foi ni mauga iti;

²⁶ a o lei faia e ia le laueleele ma le vao, ma le tumutumu o le efu o le lalolagi.

²⁷ A o faatumauina e ia le lagi na ou i ai, ina o tusi faataaliolio e ia i luga o le fogātai.

²⁸ A o faamauina e ia o ao i luga; a o faamauina e ia o puna o le moana.

²⁹ A o tofia e ia le tuaoi o le sami, ia le sopoia e lona suāsami lona matafaga; a o tusia e ia faavae o le lalolagi;

³⁰ na ou i ai ma ia, o a‘u o le tufuga; na fai foi a‘u mona fiafia i lea aso ma lea aso; sa ou olioli i ona luma i aso uma lava.

³¹ Sa ou olioli i mea e mau ai tagata i lona lalolagi; o lo‘u fiafia foi, sa i le fanau o tagata lea.

³² O lenei, le fanau e, faalogologo mai ia ia te au; amuia lava i latou o e tausi i o‘u ala.

³³ Ia outou faalogologo i mea e a‘oa‘o atu, ia outou popoto ai; aua foi le teena.

³⁴ Amuia le tagata ua faalogologo mai ia te au; o loo mataala i o‘u puipui i lea aso ma lea aso; o loo leoleo i pou o o‘u faitotoa.

³⁵ Auā o le ua maua a‘u, ua maua e ia le ola; e maua foi e ia le alofa mai ia Ieova.

³⁶ A o lē agasala mai ia te au, ua faasaunoa e ia lona lava ola; atoa uma o e ‘ino‘ino ia te au, ua latou mananao i le oti.