Fa‘ata‘oto 7 - O LE TUSI PAIA

O LE MATAUPU VII. O togafiti a le fafine mulilua.

¹ Lo‘u atalii e, ia e tausi a‘u upu, ma e teu a‘u poloaiga ia te oe.

² Ia e tausi a‘u poloaiga, e te ola ai, ma a‘u tulafono e pei o lou tamatamaimata;

³ ia e fusi ai i ou tamatamai lima; ia e tusi ai i le papa o lou loto;

⁴ ia e fai atu i le poto, O oe o lo‘u tuafafine; ma ia e ta‘ua le atamai, o lou aiga lea.

⁵ Ina ia leoleo ia te oe ai le fafine ese, o le fafine ese na te faaoleole i ana upu.

⁶ Auā o le faamalama o lo‘u fale na ou vaavaai atu ai i le mea faamataupega;

⁷ ona ou vaai atu ai lea i e faigofie; na ou iloa ua i taulelea le tasi tama, ua leai sona mafaufau;

⁸ na ui ane o ia i le ala e lata ane i le fetaulaigāala e nofo ai le fafine; na ia alu ane i le ala i lona fale,

⁹ i le segisegi, i le afiafi, i le tulua o po, i le pouliuli;

¹⁰ faauta foi, na fetaiai ma ia le fafine ua ofu i le ofu o le fafine talitane, ua ia te ia foi le loto pepelo;

¹¹ ua leoleoa o ia, ma le vaogata; ua le nofo tumau ona vae i lona fale.

¹² Se itu aso ua i fafo, se itu aso ua i malae; na te lamalama foi e lata ane i fetaulaigāala uma lava.

¹³ Na ia pue atu foi ia te ia, ma sogi ia te ia ua mata faalemā; ma ua faapea atu ia te ia,

¹⁴ Ua ia te au taulaga faafetai; o le aso nei, ua ou avatu ai mea na ou tauto ai;

¹⁵ o le mea lea na ou sau ai e faafetaiai ia te oe; e saili lava ia te oe, ua ou maua foi oe.

¹⁶ Ua fofola lo‘u moega i ie afu, o le ie pulepule mai Aikupito.

¹⁷ Ua ou luluina lo‘u moega i le muro, ma aloe, ma le kinamomi;

¹⁸ sau ia, ina ta faamalilie i le alofa, seia oo i le taeao, ia ta fiafia lava i le fealofani.

¹⁹ Auā e le i ai la‘u tane i lona fale; ua alu o ia i le malaga mamao.

²⁰ Ua alu ma ia le taga tupe; e sau o ia i lona aiga i le masina e faatoa vaaia.

²¹ Na ia faasese ia te ia i le tele o ana togafiti; na ia tosina o ia i ona laugutu faaoleole.

²² Ua mulimuli loa o ia ia te ia, e pei o le povi ua alu a fasia; e pei o le vale ua alu i le aoaiga o noanoaga;

²³ seia ati le u i lona ate; e pei ona faavave atu le manu i le mailei; na te le iloa ua saunia lea e mate ai o ia.

²⁴ O lenei, la fanua e, ia outou faalogo mai ia te au; ia uai mai o outou taliga i upu a lo‘u gutu;

²⁵ aua ne‘i afe lou loto i ona ala; aua ne‘i e sese atu i ona magāala.

²⁶ Auā e toatele ua lafotuina e ia ua manunua; o e malolosi lava o i latou uma e ua fasiotia e ia.

²⁷ O lona fale, o le ala i seoli lea, e alu ifo ai i ana o le oti.