Fa‘ata‘oto 5 - O LE TUSI PAIA

O LE MATAUPU V. O le leaga o le faitaaga.

¹ Lo‘u atalii e, ia e faalogo mai i lo‘u poto; ia uai mai ou taliga i lo‘u faautauta.

² Ina ia e tausiusi i le mafaufau; ma ia leoleoina le poto i ou laugutu.

³ Auā e faasisina ifo meli ai laugutu o le fafine ese; o lona gutu foi e sili ona molemole i le suāuu;

⁴ a e mulimuli ane ua oona ia, e pei o le laena; e maamaai o ia, e pei o le pelu ua faatau maai ona itu.

⁵ E o ifo ona vae i le oti; e taunuu atu ona laasaga i seoli.

⁶ Ina ne‘i e mafaufau i le ala o le ola, o lea ua feseai ai ona ala; e te le mafai ona e iloa.

⁷ O lenei, le fanau e, ia outou faalogo mai ia te au; aua foi ne‘i ‘alo ese outou i upu a lo‘u gutu.

⁸ Ia taumamao lou ala ia te ia; aua foi e te faalatalata i le faitotoa o lona fale;

⁹ ina ne‘i e avatu lou matagofie i nisi, ma ou tausaga i le ua saua;

¹⁰ ina ne‘i malilie tagata ese i au oloa; ne‘i i ai foi mea na e tiga ai i le fale o le tagata ese;

¹¹ ona e oi ai lea i ona po amuli, pe a faaumatia lou tino uma,

¹² ma e faapea ane, Sa tele naua lo‘u ‘ino‘ino ina a‘oa‘oina, ma ua tetee atu e lo‘u loto le aoaiga;

¹³ na ou le faalogo foi i upu a e na a‘oa‘o mai ia te au; ma ua le uai atu o‘u taliga i o‘u a‘oa‘o.

¹⁴ Toetoe lava, ua atoa mea leaga ua ou i ai, o i luma lava o le faapotopotoga ma le saofaiga.

¹⁵ Ia e inu vai ai lou lava vailepa, ma vai e tafe mai ai lou lava vaieli.

¹⁶ Ia faasalalau solo ou vaipuna, ma ou vaitafe i malae;

¹⁷ ia fai mo oe ia vai, na o oe lava; a e aua le faatasi ma oe tagata ese.

¹⁸ Ia manuia lou vaipuna, ma ia e fiafia i lau avā na fai a o ē taulealea.

¹⁹ Ia pei o le aila pele o ia ma le ‘oti o le vao e matagofie; ia mălie oe i ona susu i aso uma; aua le aunoa ona e matuā fiafia i lou alofa ia te ia.

²⁰ Lo‘u atalii e, pe se a foi le mea e te fiafia ai i le fafine ese; ma e fusi le fatafata o le fafine ese?

²¹ Auā o loo i luma o fofoga o Ieova o ala o le tagata; na te fuatia foi ona ala uma.

²² O ana amio leaga e maua ai lava le ua agasala; o maea o ana agasala e taofia ai o ia.

²³ E oti lava o ia, a o lei a‘oa‘oina; o le tele o lona valea e sese ai o ia.