Fa‘ata‘oto 28 - O LE TUSI PAIA

O LE MATAUPU XVIII. O le amio leaga; ma le faamaoni.

¹ E sosola ē amio leaga, a o leai sē tuliloa; a o e amiotonu, e pei o le leona taanoa i latou ona lē mata‘u.

² O le fouvale o le nuu e toatele ai ona alii; a o le tagata mafaufau ma le poto, e faaualoaina ai le malo.

³ O le tagata mativa o le ua faasaua i e matitiva, o le timuga e palasi ifo lea, a e le tupu ai ni mea e ‘ai.

⁴ O e tuulafoai le tulafono, latou te vivii i le ua amio leaga; a o e tausiusi i le tulafono, latou te tiga lava ia i latou.

⁵ O tagata amio leaga latou te le lagona le faamasinoga; a o e saili ia Ieova ua latou lagona mea uma.

⁶ E sili ona lelei o le tagata mativa ua savali i lana amiotonu, i le ua faapiopio ona ala, a o le mauoa ia.

⁷ O le ua anaana i le tulafono, o le atalii mafaufau o ia; a o le ua aumea ma e ‘ai tetele, e mā ai lona tamā ona o ia.

⁸ O le ua faatele ana oloa i se totogi faasili, po o se mea faasili, na te faaputuina ia mea mo le ua alofa i e matitiva.

⁹ O le ua liliu ese ona taliga a e le faalogologo i le tulafono, e inosia lana lava tatalo.

¹⁰ O le ua faasese i e amio sa‘o i le ala leaga, e paū o ia i lana lava lua; a o e ua sao ona lelei, e fai mo latou tofi mea lelei.

¹¹ O le tagata mauoa, e poto o ia i lona manatu; a o le tagata mativa le ua mafaufau, na te suesue ia te ia.

¹² A olioli ē amiotonu, e tele ai le manuia; a e a tulai mai ē amio leaga, ua lalafi ai tagata.

¹³ O le ua ufiufi lona solitulafono, e le manuia o ia; a o le ua faaali ma lafoaiina, e alofagia o ia.

¹⁴ Amuia le tagata ua le aunoa ona mata‘u o ia; a o le ua faamaaa lona loto, e paū o ia i le leaga.

¹⁵ O le leona tagi ma le urosa fia ‘ai, o le alii amio leaga lea ua pule i le nuu mativa.

¹⁶ O le alii ua leai sona mafaufau, ua tele ana sauaga; a o lē ‘ino‘ino i le matapeapea, e faalevalevaina ona aso.

¹⁷ O le tagata ua faasaua ua fasioti ai le tasi, e sola atu lava ia, e oo i le lua; aua le taofia o ia.

¹⁸ O le ua savali ma lana amio ua sao, e faaolaina o ia; a o le ua faapiopio i ala e lua, e paū o ia i se tasi o ia ala.

¹⁹ O lē galue i lona fanua, e ma‘ona o ia i mea e ‘ai; a o lē mulimuli i tagata faatauvaa, e ma‘ona o ia i le mativa.

²⁰ O le tagata faamaoni, e tele mea e manuia ai o ia; a o le ua faataalise ona mauoa, e le faasaoina o ia.

²¹ O le faailogaina o tagata, e le lelei lea; e solitulafono lea tagata ona o le fāsi areto.

²² E faataalise i le fia mauoa le tagata mataoge; a e le iloa e ia e oo mai le mativa ia te ia.

²³ O le ua aoai i le tagata, e mulimuli ane e alofagia o ia e sili i le ua tautala faaoleole.

²⁴ O le na te faoa mea a lona tamā ma lona tinā, a e fai ane o ia, E le se solitulafono lea; e faatasia o ia ma le tagata na te faataumaoi mea.

²⁵ O le ua fefete lona loto, na te faatupuina le misa; a o lē faatuatua ia Ieova, e matuā ma‘ona lava ia.

²⁶ O le ua faatuatua i lona lava loto, o le vale ia; a o lē savali ma le poto, e laveaiina o ia.

²⁷ O le ua foai atu i le tagata mativa, e le mativa o ia; a o lē ‘alo ai ona fofoga e lāufetuuina o ia.

²⁸ A tulai mai ē amio leaga ua lalafi ai tagata; a e a fano i latou ua faatoateleina ē amiotonu.