Fa‘ata‘oto 26 - O LE TUSI PAIA

O LE MATAUPU XXVI. O upu i le vale, ma le paie, ma le faatuaupua.

¹ E pei o le kiona i le tausaga vevela, e pei o le uaga foi i ona po o le seleselegāsaito, e faapea lava ona le ono o le viiga i le vale.

² E pei o le manu lele ua fealuai, ma le pe‘ape‘a ua feleleai, e faapea le fetuu fai fua e le oo.

³ O le sasa mo le solofanua, o le faagutu mo le asini, ma le laau mo le tua o le vale.

⁴ Aua ne‘i e tali atu i le vale e tusa ma lona valea; ina ne‘i tusa oe ma ia.

⁵ Ia tali atu i le vale e tusa ma lona valea; ina ne‘i poto o ia i lona lava manatu.

⁶ Ua vavae ese vae, ua inu i le mea e tiga ai, le ua tuu le feau i le tagata valea.

⁷ E fetoso vae o le pipili; e faapea foi le faataoto i le gutu o le vale.

⁸ E pei o le taga o maa tāua i le faupuegāmaa, e faapea le ua avatu le viiga i le vale.

⁹ O le laau talatala ua avea i le lima o le ua onā, o le faataoto lava lea i le gutu o le vale.

¹⁰ O le alii tele, na te faatigaina tagata uma lava; na te faaoloa le vale, na te faaoloa foi i e solitulafono.

¹¹ E pei o le ulī ua foi i lona puaiga, e faapea foi le vale, ua toe foi atu i lona valea.

¹² Ua e iloa ea se tagata ua poto i lona lava manatu? e fai le faamoemoe o tagata i le vale, a e le ia te ia.

¹³ Ua fai ane le paie, O loo i le ala le leona; ua i malae le leona.

¹⁴ E fealualuai le puipui i ona faamau, e faapea le paie ona feliuliuai i lona moega.

¹⁵ Ua faalilo e le paie lona lima i le tanoa; e musu o ia e faafoi mai ai i lona lava gutu.

¹⁶ E manatu le paie ua sili lona poto i tagata e toafitu, o e ua tali mai ma le mafaufau.

¹⁷ O le ua tago i taliga o le ulī, o le tagata lea ua alu ane, ma oso vale i le misa ese.

¹⁸ E pei o le vale ua fanafana i u, ma tao, ma le oti;

¹⁹ e faapea foi le tagata na te ‘ole‘ole i lē la te tuaoi, ona faapea mai lea o ia, E le o la‘u mea ula ea?

²⁰ A leai se fafie, e mate ai le afi; a leai foi se faatuaupua, e mavae ai le misa.

²¹ O le malala i le malala ola, ma le fafie i le afi, e faapea le tagata faamisa e tupu ai le misa.

²² O upu a lē faatuaupua, e tusa ia ma mea suamalie, ua oo ifo i totonu lava o le manava.

²³ O le ario ua i ai le otaota, ua ufitia ai le ta‘egāipu, o laugutu ia ua alofa tele, a e leaga le loto.

²⁴ O le ua ‘ino‘ino, ua faatagā tautala lelei o ia i ona laugutu; a ua tuu le pepelo i lona loto;

²⁵ e ui lava ona faamalie mai lona leo, aua e te faatuatua ia te ia; auā e fitu ni mea e inosia ua i lona loto.

²⁶ E ufiufi e ia lona ‘ino‘ino i le pepelo; a e faaalia lona leaga i le faapotopotoga.

²⁷ O le na te elia se lua, e paū o ia i ai; ma le ua fuli le maa, e toe taavale mai lea ia te ia.

²⁸ O le laulaufaiva pepelo, ua ‘ino‘ino ia i e ua momomo ai; ma le gutu molemole e tupu ai le malaia.