Fa‘ata‘oto 23 - O LE TUSI PAIA

O LE MATAUPU XXIII.

¹ Afai lua te nonofo ma se alii e taumafa se ‘ava, seia e matuā mafaufau i mea ua i ou luma;

² ma e tuu atu se polo i lou ua, pe afai e te se tagata ‘ai tele;

³ aua e te naunau i ana mea suamalie; auā o mea e ‘ai pepelo lava ia.

⁴ Aua e te galue faapuapuaga ia mauoloa ai; tuu ia o lou lava taofi.

⁵ E te tulimatai atu ea i le mea ua leai? auā e faia lava e ia ona apaau; e pei o le aeto ona lele atu o ia i le lagi.

⁶ Aua e te ‘ai i le mea e ‘ai a le mataoge; aua foi e te naunau i ana mea suamalie.

⁷ Auā e pei ona manatu o ia i lona loto, ua faapea lava o ia; e fai mai o ia ia te oe, ‘Ai ia ma inu; a e le ia te oe lona loto.

⁸ E te toe puai mai le fasī mea ua uma ona ‘ai, ma e faamāumau au upu mālie.

⁹ Aua e te tautala atu i taliga o le vale; auā e ‘ino‘ino o ia i le poto o au upu.

¹⁰ Aua ne‘i sii le tuaoi o le vavau; aua foi ne‘i e uia fanua o e mātuaoti.

¹¹ Auā e malosi lava lo latou Faaola; o ia lava na te faia la latou finauga ma oe.

¹² Uai mai lou loto i mea e a‘oa‘oina, ma ou taliga i upu e poto ai.

¹³ Aua ne‘i taofia le aoaiga i le tama; auā afai e te sasa ia te ia i se laau, e le oti o ia;

¹⁴ e te sasa ia te ia i se laau, ona e laveaiina lea o lona agaga ai seoli.

¹⁵ Lo‘u atalii e, afai e poto lou loto, ona fiafia ai lea o lo‘u nei lava loto;

¹⁶ e olioli foi lo‘u manatu, pe a tautala ou laugutu i mea ua tonu.

¹⁷ Aua le losilosi lou loto i e agasala; a ia e mata‘u ia Ieova i le aso atoa;

¹⁸ auā afai o i ai le iuga, ona le iuvale lea o lou faamoemoe.

¹⁹ Ia e faalogo mai, lo‘u atalii e, ma ia e poto; ma e ta‘ita‘i tonu lou loto i le ala.

²⁰ Aua ne‘i fai oe ma so latou o e inu tele i uaina; ma e ua aai tetele i manu;

²¹ auā o lē inu tele ma ‘ai tele e faamativaina o ia; ma lē fia moe pea e ofu o ia i ofu masaesae.

²² Ia e faalogo i lou tamā, o le na fanaua oe; aua foi e te ‘ino‘ino i lou tinā pe a loomatua o ia.

²³ Ia e faatau mai le mea moni, aua lava le faatau atu; atoa foi ma le poto, ma le a‘oa‘oina, ma le atamai.

²⁴ E matua olioli lava le tamā o le ua amiotonu; o le na fanaua le atalii poto e fiafia o ia ia te ia;

²⁵ e fiafia lou tamā ma lou tinā; e olioli lava le na fanau mai oe.

²⁶ Lo‘u atalii e, au mai ia lou loto ia te au; ma ia fiafia ou mata i o‘u ala.

²⁷ Auā o le fafine talitane, o le lua maulalo lea; o le fafine ese, o le vaieli pu itiiti lea;

²⁸ o ia foi nate saunia mailei, e tusa ma le ua fao mea, na te faatoateleina foi tagata amioletonu.

²⁹ E ia te ai ea le aue? e ia te ai ea mala? e ia te ai misa? e ia te ai le atuatuvale? e o ai ea manunua fua? e ia te ai ea mata mūmū?

³⁰ O e ua faatuai i le uaina; o e o atu e saili i le uaina filogia.

³¹ Aua e te vaai i le uaina pe a mūmū mai; pe a pupula mai i le ipu, e alualu sa‘o ifo ia.

³² E mulimuli ane e feū ia, pei se gata; e pei o le gata uogo lona tui;

³³ e vaai ou mata i fafine ese; e tautala foi lou loto i mea faapiopio.

³⁴ E tusa lava oe ma le ua taoto i totonu o le sami; e tusa foi ma le ua taoto i le tumutumu o le fanā.

³⁵ E te faapea, Na latou fasia a‘u, a ou te lei tiga ai; na latou tu‘ia a‘u, a ou te lei lagona; pe a a‘u ala, ona ou toe sailia lea.