Fa‘ata‘oto 22 - O LE TUSI PAIA

O LE MATAUPU XXII.

¹ Ia sili le manao ina ia ta‘uleleia i le manao i le oloa e tele; ma le agalelei, ia sili le manao i lea i le ario ma le auro.

² O le mauoa ma le mativa la te fetaiai; na faia i laua uma e Ieova.

³ O le ua faautauta, na te iloa atu le leaga, ma lafi ai; a o e ua faigofie, e o atu pea i latou, ona faasalaina ai lea.

⁴ O le taui o le faamaulalo ma le mata‘u ia Ieova, o le oloa lea, ma le viiga, ma le ola.

⁵ O mea matuitui ma mailei, o loo i ai ia i le ala o lē faapiopio; o lē tausi o ia ia te ia, e faamamao o ia i ia mea.

⁶ A‘oa‘o ia i le tama e tusa ma lona ala; a oo ina toeaina lava o ia, e le te‘a ese ai.

⁷ E pule le mauoa i e matitiva; e auauna foi lē no mea i le ua au mai ai ana mea.

⁸ O le ua lulu le amio leaga, e selesele mai ai e ia le mala; e faaumatia foi le tootoo o lona ita.

⁹ O le ua mataalofa e faamanuiaina o ia; auā e foai atu e ia ana mea e ‘ai i le ua mativa.

¹⁰ Tuli ia le faatauemu, ona mavae atu ai lea o le finauga; e tuua foi le misa ma le faamāina.

¹¹ O le ua manao i le loto mamā, e matagofie ona laugutu; e fai o ia ma uo a le tupu.

¹² O fofoga o Ieova e leoleoina ai e ua popoto; a e faaiuvaleina e ia upu a e amioletonu.

¹³ Ua fai ane le paie, O loo i fafō le leona; e fasiotia ai a‘u i malae.

¹⁴ O le gutu o le fafine ese, o le lua maulalo lea; o le ua matuā itagia e Ieova e paū o ia i ai.

¹⁵ Ua fusifusia le valea i le loto o le tama; a e faateaeseina ai ia te ia i le sasa e aoai a‘i.

¹⁶ O le ua faasaua i le tagata mativa ina ia faatele ai ana oloa, ma le ua foai atu i le mauoa, e iu ai lava i le mativa.

¹⁷ Uai mai ia ou taliga, ma e faalogo mai i upu a e popoto; ma ia e matuā mafaufau i lo‘u poto.

¹⁸ Auā e matagofie pe afai e te tausia ai i lou loto; e faatatauina faatasi i ou laugutu.

¹⁹ Ua ou a‘oa‘o ia te oe, o oe lava, i le aso nei, ina ia fai Ieova mou faatuatuaga.

²⁰ Ua ou le tusi atu ea ia te oe o mea sili i faatonuga ma le poto;

²¹ ina ia ou faailoa ia te oe le faamaoni o upu moni; ina ia e tali atu ai upu moni i e aau mai ai nisi ia te oe?

²² Aua e te faoa mea a le tagata mativa, ina ua mativa o ia; aua foi e te faasaua i le faitotoa le ua tiga.

²³ Auā o Ieova, o ia na te faia la latou finauga; na te fasiotia foi i latou o e faasaua ia i latou.

²⁴ Aua ne‘i fefaauoai ma le tagata itagofie; aua foi lua te o ma le tagata lotoa;

²⁵ ina ne‘i ē faaa‘oa‘o i ona ala; ona maua ai lea o lou agaga i le mailei.

²⁶ Aua ne‘i fai oe ma so latou o e fetagofi i lima; pe fai oe ma moni i mea ua aitalafu ai.

²⁷ Afai ua leai sau mea e taui a‘i, se a le mea na te ave ese ai lou moega o ē taoto ai?

²⁸ Aua ne‘i sii le tuaoi mai le vavau, na faia e ou mātua.

²⁹ Ua e iloa le tagata ua faataalise i ana galuega? e tu o ia i luma o tupu, a e le tu i luma o tagatānuu.