Fa‘ata‘oto 2 - O LE TUSI PAIA

O LE MATAUPU II. O le aoga o le poto.

¹ Lo‘u atalii e, afai e te talia a‘u upu, ma e teu i lou loto a‘u poloaiga,

² e uai atu ai ou taliga i le poto, e faasaga atu ai lou loto i le faautauta;

³ afai lava e te valaau atu i le atamai, ma e leo tele atu i le faautauta;

⁴ afai e te sailiili ia te ia, e pei ona sailiili i le ario; afai e te suesue i ai, pei ona suesue i le oloa lilo;

⁵ ona e lagona ai lea o le mata‘u ia Ieova, ma e maua ai le poto i le Atua.

⁶ Auā o Ieova na te foai mai le poto; mai lona fofoga le poto ma le faautauta;

⁷ na te teua le poto mo e amio sa‘o; o le talita o ia i e ua tonu lo latou savali,

⁸ ina ia leoleo i ala o lē amiotonu; e tausi foi e ia le ala o ona tagata amio Atua;

⁹ ona e lagona ai lea o le amiotonu, ma le faamasinoga, ma le amio sa‘o; o ala lelei uma lava.

¹⁰ A oo le poto i lou loto, ma ua mālie ia te oe le atamai;

¹¹ e faafeao le mafaufau ia te oe; e leoleo ia te oe le faautauta;

¹² ina ia laveai ia te oe ai le ala leaga; ai le tagata ua tautala i mea faapiopio;

¹³ o e tuua ala tonu, a e ui atu i ala pogisa;

¹⁴ o e fiafia e fai mea leaga; ua latou olioli i le faapiopio e leaga;

¹⁵ o e faapiopio i o latou ala, ma vaogatata i a latou amio;

¹⁶ e laveai ia te oe ai le fafine ese, o le fafine ese na te faaoleole i ana upu;;

¹⁷ o le na te tuua le na tausi ia te ia a o teine muli; ua galo foi ia te ia le feagaiga a lona Atua.

¹⁸ Auā e taunuu atu lona fale i le oti, ma ona ala i agaga o e ua oti;

¹⁹ o i latou uma o e o atu ia te ia, e le foi mai i latou; latou te le maua ala o le ola.

²⁰ Ina ia e savali i le ala o e lelei, ma e tausiusi i ala o e amiotonu.

²¹ Auā o e amio sa‘o, latou te mau i le nuu; ma e ua sao a latou amio, e faatotoeina ai i latou;

²² a e vavaeeseina o e amio leaga ai le laueleele, e liaiina ai foi o e amio pepelo.