Fa‘ata‘oto 19 - O LE TUSI PAIA

O LE MATAUPU XIX.

¹ E sili ona lelei o le tagata mativa ua savali i lana amiotonu, i le ua laugutu faapiopio, o ia foi o le vale.

² E le se mea lelei foi ina ia aunoa le tagata ma le poto; o le ua faataalise foi i ona vae e sese o ia.

³ O le valea o le tagata e faapiopio ai lona ala; ua ita foi lona loto ia Ieova.

⁴ O le oloa e faaopoopo mai ai uo e toatele; a o le ua mativa, e te‘a ese o ia ma lana uo.

⁵ E le faasaoina le molimau pepelo; ma le ua tala pepelo, e le sao lava ia.

⁶ E toatele latou te ole atu i luma o le alii; e uo tagata uma lava ma le tagata foai mea.

⁷ O uso uma o le tagata mativa, latou te ‘ino‘ino ia te ia; a o ana uo, latou te faamamao ma ia; na te tuliloa ia te i latou i upu, a e le maua i latou.

⁸ O le ua maua le poto, ua alofa o ia ia te ia lava; o le ua tausi le faautauta, e maua e ia le mea lelei.

⁹ E le faasaoina le molimau pepelo; ma le ua tala pepelo, e fano lava o ia.

¹⁰ O mea faafiafia, e le ono ia i le vale; e matuā le ono foi i le auauna ona pule i alii.

¹¹ O le māfaufau o le tagata e faagesegese ai lona ita; o lona viiga foi lea, ina ua le manatua lona agaleagaina.

¹² O le toasa o le tupu, e tusa lea ma le tagi o le leona taanoa; a o lona alofa, e tusa lea ma le sau i le mutia.

¹³ O le atalii valea, o le malaia lea o lona tamā; o faamisa foi o le avā, o le tutulu soo lea.

¹⁴ O le fale ma oloa, o le tofiga lea a mātua; a o le avā mafaufau, mai ia Ieova lava ia.

¹⁵ O le paie e tupu ai le moe gase; ma le tagata faavaivai, e fia ‘ai lava ia.

¹⁶ O le ua tausia le poloaiga, ua tausia e ia lona lava ola; a o le ua faatalale ona ala, e oti lava ia.

¹⁷ O le ua alofa i le tagata mativa, na te avatua ana mea ia Ieova; e tauia mai foi e ia ana mea na avatu ia te ia.

¹⁸ Aoai atu i lou atalii, manū o fai sou faamoemoe; a e aua le naunau lou loto ia oti ai o ia.

¹⁹ O le tagata ita tele, e faasalaina o ia; auā afai e te laveai ia te ia, e te toe faapea foi.

²⁰ Ia e faalogo i le faatonu mai, ma e talia le a‘oa‘o atu; ina ia e poto ai pe a oo i ou tausaga amuli.

²¹ E tele mafaufau o loo i le loto o le tagata; a o le pule a Ieova, e tumau lava lea.

²² O le mea e manaomia i le tagata, o lona alofa lea; e sili ona lelei o le tagata mativa i le tagata pepelo.

²³ O le mata‘u ia Ieova e iu lea i le ola; o le ua i ai, e ma‘ona pea o ia; e le aafia o ia e le mala.

²⁴ Ua faalilo e le paie lona lima i le tanoa; a e le faafoi mai ai lava i lona gutu.

²⁵ Ia e sasa i le ua tauemu, ona tupu ai lea o le faautauta o le ua faigofie; ma ia e aoai atu i le ua mafaufau, ona iloa ai lea e ia o le poto.

²⁶ O le ua faamāumau mea a lona tamā, ma tuli ese i lona tinā, o le atalii lea e tupu ai le mā ma le masiasi.

²⁷ Lo‘u atalii e, soia e te faalogo i le a‘oa‘o atu e faasese ai i upu e poto ai.

²⁸ O le molimau ulavale, e tauemu o ia i le faamasinoga; o gutu foi o e amio leaga e fologia ai le agasala.

²⁹ Ua saunia faamasinoga mo e tauemu; o ta foi mo tua o e valelea.