Fa‘ata‘oto 18 - O LE TUSI PAIA

O LE MATAUPU XVIII.

¹ O le ua vavae ese, ua saili o ia i lona manao; e finau o ia i le poto uma lava.

² E le manao le vale i le faautauta; ua na ona ia faaali o lona loto.

³ A sau le tagata agasala, ua sau faatasi ai foi le ‘ino‘ino; e sau foi le luma faatasi ma le amio matagā.

⁴ O upu a le gutu o le tagata, o vai loloto ia; o le puna o le poto, o le alia ola lava lea.

⁵ E le lelei ona ‘au ma le tagata agasala, ina ia faiaina i le faamasinoga le ua amiotonu.

⁶ E o atu laugutu o le vale i le misa; ua valaau foi lona gutu i ta.

⁷ O le gutu o le vale e fano ai o ia; o ona laugutu foi, o le mailei lea o lona ola.

⁸ O upu a lē faatuaupua, e tusa ia ma mea suamalie; ua oo ifo i totonu lava o le manava.

⁹ O le ua paie foi i lana galuega, la te uso ma le na te faamāumau mea.

¹⁰ O le suafa o Ieova, o le ‘olo malosi lea; e sola atu i ai lē amiotonu, ona sao ai lea o ia.

¹¹ O le oloa o le mauoa, o lona ‘olo malosi lea; e pei o le pa maualuga foi i lona lava manatu.

¹² E muamua ona faamaualuga o le loto o le tagata, i le malaia o ia; a e muamua le faamaulalo i le mamalu.

¹³ O le na te tali atu i le upu, a o lei faalogo i ai, e fai lea mona valea, ma mea e faamāina ai o ia.

¹⁴ O le loto o le tagata, na te faatoatoa ai lona ma‘i; a o le loto faanoanoa, o ai se na te lavā onosai?

¹⁵ O le loto o le ua mafaufau na te maua le poto; o taliga foi o le ua poto, e saili ia i le poto.

¹⁶ O le mea alofa a le tagata e faalauteleina ai se ala mona; e ta‘ita‘iina ai foi o ia i luma o alii.

¹⁷ E tonu le ua muamua i lana finauga, a e sau le tasi tagata, ona suesue ai lea o ia ia te ia.

¹⁸ O le vili e iu ai misa; e māvae ai foi ē fitafita.

¹⁹ O le tagata ua agaleagaina e lona uso, e sili o ia ona faigata i le ‘olo; o misa foi o uso e tusa ia ma faamaufaalava o le ‘olo.

²⁰ O le fua o le gutu o le tagata e ma‘ona ai lona manava; e ma‘ona o ia i mea e tupu mai i ona laugutu.

²¹ O le oti ma le ola, o loo i le pule a le laulaufaiva ia; o e mananao i ai latou te aai i lona fua.

²² O le ua maua le avā, ua maua e ia le mea lelei; ua maua foi e ia le alofa mai ia Ieova.

²³ E tautala mai ma le aioi le ua mativa, a o le mauoa e tali atu o ia ma le faasiasia.

²⁴ O le tagata ua fai ana uo, e iu ina tigaina ai o ia; a o i ai le tagata alofa e sili ona pipii mai i lo le uso.