Fa‘ata‘oto 15 - O LE TUSI PAIA

O LE MATAUPU XV.

¹ O le tali filemu e liliueseina ai le ita; a o le upu faatiga e tupu ai le ita.

² O laulaufaiva o e popoto e faafiafia tagata i le poto; a o gutu o e valelea e luai mai ai le valea.

³ O loo i mea uma lava fofoga o Ieova; o loo matuā silasila i e amio leaga ma e amio lelei.

⁴ O le laulaufaiva e malolo ai, o le laau o le ola lea; a o le laulaufaiva faapiopio e momomo ai le loto.

⁵ E tetee atu e le vale le a‘oa‘o atu a lona tamā; a o lē usiusitai i le aoaiga, e faautauta lava ia.

⁶ O loo i le fale o lē amiotonu le oloa e tele; a o le puapuaga, ua i ai lea i mea e maua e le ua amio leaga.

⁷ E faasalalauina le poto i laugutu o e popoto; a e le faapea loto o e valelea.

⁸ O le taulaga a e amio leaga e inosia lea e Ieova; a o le tatalo a e amio sa‘o o lona lea fiafia.

⁹ E inosia e Ieova le ala o e amio leaga; a e alofa o ia i le ua tausisi atu i le amiotonu.

¹⁰ E leaga le aoaiga i le ua tuua le ala; o lē ‘ino‘ino i le aoaiga, e oti lava ia.

¹¹ O seoli ma le malaia, o loo i luma o Ieova ia; e le sili ea ona faapea o loto o tagata?

¹² E lē alofa le tauemu i lē aoai atu ia te ia; na te le alu atu i e popoto.

¹³ O le loto fiafia e tupu ai mata fiafia; a o le loto faanoanoa e momomo ai le agaga.

¹⁴ O le loto o le ua mafaufau, ua saili lea i le poto; a o gutu o e valelea ua aai i le valea.

¹⁵ O aso uma o le ua tigaina, ua leaga ia; a o le loto fiafia, o le tausamiga e le aunoa lea.

¹⁶ E sili ona lelei o se mea itiiti, a o i ai le mata‘u ia Ieova, i le oloa tele, a o i ai le atuatuvale.

¹⁷ E sili ona lelei o le faaalumaga o laau ‘aina, a o i ai le alofa, i le povi ai le fale povi, a o i ai le ‘ino‘ino.

¹⁸ O le tagata lotoa, na te faatupuina le misa; a o lē faatoatoa e tuu lelei ia te ia le finauga.

¹⁹ O le ala o le paie, e tusa ma le āi laau tuitui; a o le ala o e amio sa‘o, e faalauleleiina lea.

²⁰ O le atalii poto e faafiafia e ia le tamā; a o le tagata valea, e faaleaogaina e ia lona tinā.

²¹ O le valea, o le mea e olioli ai lea i le ua leai sona mafaufau; a o le tagata faautauta, ua savali o ia ma le amio sa‘o.

²² E faaleaogaina mafaufauga pe a leai se filifiliga; a e faatumauina i le toatele o faipule.

²³ O loo i ai le fiafia i le tagata i le tali atu a lona gutu; ma le upu i ona aso ua tatau i ai, e lelei naua lea.

²⁴ O le ala o le ola, o loo i luga lea i le ua poto; ina ia ‘alo ese ai o ia i seoli i lalō.

²⁵ E liaiina e Ieova le fale o e faamaualuga; a e faatumauina e ia le tuaoi o le fafine ua oti lana tane.

²⁶ E inosia e Ieova mafaufauga o le ua leaga; a e sao ona lelei o upu matagofie.

²⁷ O le ua matapeapea i le oloa, e faatigaina e ia lona lava aiga; a o lē ‘ino‘ino i mea alofa, e ola o ia.

²⁸ E manatunatu le loto o lē amiotonu, ina ia fai se tali; a o gutu o e amio leaga, e luai mai ai mea leaga.

²⁹ E mamao Ieova i e amio leaga; a e faafofoga mai o ia i le tatalo a e amiotonu.

³⁰ O le malamalama o mata e fiafia ai le loto; o le tala lelei e lololo ai ivi.

³¹ O le taliga ua faalogo i le aoaiga e ola ai, e mau lea faatasi ma e popoto.

³² O le na te teena mea e a‘oa‘oina, e faaleaogaina e ia lona lava ola; a o lē faalogo i le aoaiga, e maua e ia le poto.

³³ O le mata‘u ia Ieova, o le a‘oa‘oina lea e poto ai; e muamua foi le faamaulalo i le viia.