Fa‘ata‘oto 14 - O LE TUSI PAIA

O LE MATAUPU XIV.

¹ E taitasi uma fafine popoto ma atiina ae lona fale; a o le fafine valea na te lepetia ai i ona lima.

² O loo savali i lana amiotonu le ua mata‘u ia Ieova; a e faapiopio ona ala le ua ‘ino‘ino ia te ia.

³ O loo i le gutu o le vale le sasa o le faamaualuga; a o laugutu o e popoto e leoleoina ai i latou.

⁴ A leai ni povi, ua mamā le fale povi; a e tele mea e maua mai i le malosi o le povi.

⁵ O le molimau faamaoni, e le pepelo ia; a o le molimau pepelo, o le tala pepelo ia.

⁶ E saili le poto e le tagata tauemu, a e le maua; a e faigofie le poto i le ua lagona.

⁷ Alu ia ai luma o le tagata valea, pe a ē le iloa ia te ia laugutu o le poto.

⁸ O le poto o le tagata mafaufau, o le faautauta lea i lona ala; a o le valea o e valelea, e pepelo lea.

⁹ E tauemu o e valelea i le agasala; a e fealofani ē ua amio sa‘o.

¹⁰ Ua iloa e le loto lona lava tiga; e le aiā foi le tagata ese i lona olioli.

¹¹ E faaumatia le fale o e amio leaga; a o le fale ie o e amio sa‘o, e uluola ia.

¹² O i ai le ala ua tonu i le manatu o le tagata; a o lona taunuuga, o ala ia e oti ai.

¹³ A o ‘ata‘ata lava, ua faanoanoa le loto; o le iuga foi o le olioli, o le faanoanoa lea.

¹⁴ O le ua tuumuli i lona loto, e ma‘ona o ia i ona lava ala; a o le tagata amio lelei, e ma‘ona o ia ai ona lava ala.

¹⁵ O le ua faigofie, e talia e ia upu uma; a o le ua mafaufau, ua faautauta o ia i lona ala.

¹⁶ Ua mata‘u le tagata poto, ma ‘alo ese i le leaga; a o le vale, ua faamaualuga o ia ma nofo faatalanoa.

¹⁷ O lē itagofie ua amio faavalea o ia; o le tagata foi ua fai togafiti leaga, ua inosia o ia.

¹⁸ O e faigofie, e fai mo latou tofi le valea; a o e mafaufau, e faapaleina i latou i le poto.

¹⁹ Ua ifo e ua amio leaga i luma o e amio lelei; ma e agasala, ua ifo i latou i faitotoa o lē amiotonu.

²⁰ Ua inosia le ua mativa i lē la te tuaoi; a e toatele o e alolofa i le mauoa.

²¹ O lē ‘ino‘ino i lē la te tuaoi, ua agasala o ia; a o lē alofa i e ua tigaina, amuia lava o ia.

²² E le ua sese ea o e fai togafiti leaga? a o i ai le alofa ma le faamaoni i e fai togafiti lelei.

²³ O i ai le mau i galuega uma; a o le upu a laugutu, na o le mativa e iu i ai.

²⁴ O le pale o e popoto, o la latou oloa lea; a o le valea o e valelea, o le valea lava lea.

²⁵ E laveaiina tagata e le molimau faamaoni; a o le molimau pepelo, e tautala o ia i mea pepelo.

²⁶ O le mata‘u ia Ieova, o i ai le faatuatuaga malosi; o i ai foi le malu mo lana fanau.

²⁷ O le mata‘u ia Ieova, o le puna o le ola lea, e ‘alo ese ai i mailei e oti ai.

²⁸ O le toatele o le nuu, o i ai le mamalu o le tupu; a o le ausage, e i ai le malaia o le alii.

²⁹ O le ua faatoatoa, e tele lona mafaufau; a o le ua itagofie, e faaeaina i luga e ia le valea.

³⁰ O le loto lelei, o le ola lea o le tino; a o le mataua, o le mea e pala ai ivi lea.

³¹ O le ua faasaua i le tagata mativa, e faalumaina e ia Le na faia o ia; a o le ua ava ia te ia, ua alofa o ia i le tagata mativa.

³² Ua tulia lē amio leaga i lona lava leaga; a o lē amiotonu, e ia te ia le faatuatua pe a oti o ia.

³³ O loo nofo mau le poto i le loto o le ua mafaufau; a o mea ua i totonu o e valelea e faailoaina.

³⁴ O le amiotonu e viia ai le nuu; a o le agasala, o le luma lea o le nuu.

³⁵ O le alofa o le tupu, o loo i ai i le auauna poto; a o lona toasa, o loo i ai lea i le e tupu ai le ma.