Fa‘amasino 13 - O LE TUSI PAIA

O LE MATAUPU XIII. O le tala i mātua o Samasoni.

¹ Ua toe amio leaga le fanauga a Isaraelu i luma o Ieova; ona tuuina atu lea o i latou e Ieova i lima o Filisitia i tausaga e fagafulu.

² O le tasi tagata o Soraa i le itu aiga o Tanu, o Manoa lona igoa; sa pa lana avā, ua le fanau lava.

³ Ua faaali mai le agelu a Ieova i le fafine, ua fai mai ia te ia, Faauta mai, o oe e pa, e te lei fanau, o le a e to, ma ē fanau se tama tane.

⁴ O lenei, ia e faaeteete, ne‘i e inu uaina po o se ‘ava, aua foi e te ‘ai se mea leaga; auā faauta, o le a to oe,

⁵ e te fanau foi se tama tane; e le oo se tafi i lona ulu, auā e faia le tama ma naseri i le Atua, e afua mai ina fanau; o ia foi e afua mai ona faaola ia Isaraelu ai lima o Filisitia.

⁶ Ona alu atu lea o le fafine ua ta‘u atu ai i lana tane, o loo faapea, Na alu ane ia te au le tagata o le Atua, o lona tino mai ua pei o le tino o se agelu a le Atua, e matuā matautia lava; ou te lei fesili ia te ia pe maifea o ia; na ia le ta‘u mai foi ia te au lona igoa.

⁷ Na ia fai mai ia te au, Faauta, o le a to oe, e te fanau foi le tama tane; o lenei, aua e te inu uaina po o se ‘ava, aua foi e te ‘ai se mea leaga, auā e faia le tama ma naseri i le Atua, e afua mai ina fanau, e oo i le aso o lona oti.

⁸ Ona faatoga atu lea o Manoa ia Ieova, ua faapea Ou te aioi le Alii e, o le tagata o le Atua na e auina mai, se‘i toe maliu mai o ia ia te i maua, ma faali mai se mea ma te faia i le tama o le a fanau mai.

⁹ Ua faafofoga mai le Atua i le upu a Manoa, ua toe alu atu le agelu a le Atua i le fafine, a o nofo o ia i le fanua; a o Manoa lana tane sa le i ai ma ia.

¹⁰ Ona faataalise lea o le fafine ona momo‘e, ma ta‘u atu i lana tane, ma na fai atu ia te ia, Faauta, ua faaali mai ia te au le tagata na alu ane ia te au i le tasi aso.

¹¹ Ona tulai lea o Manoa, ma mulimuli atu i lana avā; ua oo atu i le tagata, ona fai atu lea o ia ia te ia, O oe ea le tagata na oulua tautala ma le fafine? Ua fai mai o ia, O a‘u lava lea.

¹² Ua fai atu Manoa, O lenei, ia taunuu au fetalaiga; se a se mea e tatau ai i le tama, ma se mea e faia ia te ia?

¹³ Ua fai mai le agelu a Ieova ia Manoa, O mea uma na ou fai atu ai i le fafine ia tausi i ai o ia;

¹⁴ o mea uma e tupu i le vine aua na te ‘ai ai; o le uaina ma le ‘ava, aua na te inu ai, o mea leaga uma aua na te ‘aina; o mea uma na ou fai atu ai ia te ia ia tausi i ai o ia.

¹⁵ Ona fai atu lea o Manoa i le agelu a Ieova, Se‘i ou taofi ia te oe, ou te sauni ai mā oe se tamai ‘oti.

¹⁶ Ua fai mai le agelu a Ieova ia Manoa, E ui lava ina e taofi ia te au, ou te le ‘ai i lau mea e ‘ai; a e afai e te faia se taulaga mu, ia e fai ai ia Ieova; auā e le iloa e Manoa, o le agelu a Ieova o ia.

¹⁷ Ona fai atu lea o Manoa i le agelu a Ieova, O ai ea lou suafa, ma te vivii ai ia te oe pe a taunuu lau fetalaiga?

¹⁸ Ona fai mai lea o le agelu a Ieova ia te ia, O le a le mea e te fesili mai ai i lo‘u igoa, auā e silisili ese ia.

¹⁹ Ona ave lea e Manoa o le tamai ‘oti atoa ma le taulaga i mea e ‘ai, ua ia faitaulaga ai i luga o le papa ia Ieova, ona fai lea e le agelu o le vavega, a o matamata ai Manoa ma lana avā;

²⁰ ua alu ae i le lagi le mumū o le afi ai luga o le fata faitaulaga, ona alu ae lea o le agelu a Ieova i le mumū o le afi o le fata faitaulaga, a o matamata ai Manoa ma lana ava; ona faapauu fao ai lea o i laua i le eleele.

²¹ E lei toe faaali mai lava le agelu a Ieova ia Manoa ma lana avā; ona iloa lava lea e Manoa, o ia o le agelu a Ieova.

²² Ua fai atu Manoa i lana avā, E oti lava i taua, auā ua ta vaaia le Atua.

²³ A ua fai mai lana avā ia te ia, Ana finagalo Ieova e fasioti ia i taua, po ua na le talia se taulaga mu, ma se taulaga i mea e ‘ai ai ia te i taua, po ua na le faaali mai foi nei mea uma; ua na le ta‘ua mai foi ia te i taua ni mea faapea, e pei ona ta‘ua mai nei.

²⁴ Ona fanau mai lea o le fafine o le tama tane, ua faaigoa ia te ia o Samasoni; ua tupu le tama, ua faamanuia foi o ia e Ieova.

²⁵ Ua amata ona faagaeetia o ia e le Agaga o Ieova i Maane-tanu i le va o Soraa ma Esetaola.