Fa‘aaliga 9 - O LE TUSI PAIA

O LE MATAUPU IX. Ua ilia pu e lona toalima ma lona toaono o agelu.

¹ Ua ili foi e lona toalima o agelu le pu, ona ou iloa ai lea o le fetu ua paū nai le lagi i le lalolagi; ua tuuina atu foi ia te ia le ki o le to e le gata.

² Ua tatala foi e ia le to e le gata; ona alu ae ai lea o le asu ai le to e pei o le asu o se umu tele, ua faapouliuligia ai le la ma le lagi ona o le asu o le to.

³ Ua o atu foi sē akerisi nai le asu i luga o le laueleele; ua tuuina atu ia te i latou le malosi e pei o le malosi o akarava o le vao;

⁴ ua fai atu foi ia te i latou aua ne‘i latou faaleaga i vao iti o le fanua, po o se mea lauolaola e tasi, po o se laau e tasi; tau lava o tagata ua le i ai i o latou muaulu le faamaufaailoga a le Atua.

⁵ Ua tuuina atu ia te i latou aua ne‘i fasiotia i latou, tau lava ina faatigaina i masina e lima; o latou tiga foi e pei o le tiga o le tagata pe a tuia e le akarava.

⁶ O ona po ia e saili ai e tagata le oti, a e latou te le maua; e naunau foi i latou ina ia oti, a e sola ese le oti ia te i latou.

⁷ O sē akerisi foi ua tino mai e pei o solofanua ua saunia i le taua; o latou ulu foi ua peiseai ua i ai palealii e pei o auro, ma o latou mata e pei o mata o tagata;

⁸ ua ia te i latou foi lauulu e pei o lauulu o fafine, ma o latou nifo e pei o nifo o leona;

⁹ ua ia te i latou foi ufifatafata e pei o ufifatafata uamea; ua palalu foi o latou apaau e pei o le taalili o kariota ma solofanua e tele pe a taufetuli e tau.

¹⁰ Ua ia te i latou o iu e pei o iu o akarava, ua i ai foi tui i o latou iu; ma ua ia te i latou le malosi e faaleaga ai tagata i masina e lima.

¹¹ Ua ia te i latou foi le tupu, o le agelu lea o le to e le gata; o lona igoa i le upu Eperu o Avatonu, a o lona igoa i le upu Eleni o Apoluonu.

¹² Ua mavae atu le aue e tasi; faauta, ua totoe aue e lua e mulimuli ane i le oo mai.

¹³ Ua ili foi e lona toaono o agelu le pu, ona ou faalogo ai lea i le leo mai nifo e fa o le fata auro o i luma o le Atua,

¹⁴ ua faapea atu i lona toaono o agelu ua i ai le pu. Tatala ia agelu e toafa o e ua fusifusia i le vaitafe tele o Eufirate.

¹⁵ Ona talatalaina ai lea o ia agelu e toafa o e ua saunia i le itu aso, ma le aso, ma le masina, ma le tausaga, ina ia latou fasiotia lona tolu o vaega o tagata.

¹⁶ O le faitau aofai o le ‘au tau o e ua tietie i solofanua e lua mano o mano; ua ou faalogo foi i le faitau aofai o i latou.

¹⁷ E faapea foi ona a‘u iloa o solofanua i le mea na vaaia, ma e ua tietie ai, ua i ai ufifatafata afi, ma le uakini, ma le teio; o ulu foi o solofanua e pei o ulu o leona, ua alu atu nai o latou gutu le afi, ma le asu, ma le teio.

¹⁸ O mea ia e tolu na fasiotia ai lona tolu o vaega o tagata, o le afi, ma le asu, ma le teio na alu atu nai o latou gutu.

¹⁹ Auā ua i o latou gutu ma o latou iu lo latou malosi; auā o latou iu e pei o gata ia, ua i ai ulu, o mea foi ia latou te faaleaga ai tagata.

²⁰ O tagata foi na totoe o e lei fasiotia i nei mala, latou te lei salamo i galuega a o latou lima, o lo latou ifo i temoni, ma tupua auro, ma ario, ma ‘apa memea, ma maa, ma laau, o mea ia e le mafaia ona vaai, pe faalogo, pe savavali;

²¹ latou te lei salamo foi i o latou fasioti tagata, ma a latou togafiti faataulāitu, ma la latou faitaaga, ma o latou gaoi.