Esoto 40 - O LE TUSI PAIA

O LE MATAUPU XL. Ua faatuina le malumalu.

¹ Ona fetalai mai lea o Ieova ia Mose,

² ua faapea mai, O le uluai aso o le masina muamua e te faatuina ai le malumalu o le fale fetafai o le faapotopotoga.

³ E te tuuina ai foi le atolaau o le tulafono, ma puipui atu le atolaau i le ie puipui.

⁴ E te avane ai foi le laoai, e te teuteu ai foi o mea e teuteu i ai; e te avane ai foi le tuugālamepa, ma faaee ai ona lamepa.

⁵ E te tuuina foi le fata auro e mu ai le mea manogi i luma o le atolaau o le tulafono, ma e tautau le ie puipui o le faitotoa i le malumalu.

⁶ E te tuu foi le fata e fai ai taulaga mu i luma o le faitotoa o le malumalu o le fale fetafai o le faapotopotoga.

⁷ E te tuu foi le tanoa e mulumulu ai i le va o le fale fetafai o le faapotopotoga ma le fata faitaulaga; e te sasaa foi i ai le vai.

⁸ E te faatuina foi le lotoā e siosioina ai, ma ia e tautau le ie puipui i le faitotoa o le lotoā.

⁹ E te ave foi le uu e faauu a‘i, e te faauu a‘i le malumalu, ma mea uma lava e i ai, ma e faapaiaina ai, ma ana mea uma lava, ona paia ai lava lea.

¹⁰ E te faauu foi le fata e fai ai taulaga mu, atoa ma ana mea uma; e te faapaiaina foi le fata faitaulaga, ona fai lea ma fata faitaulaga e sili ona paia.

¹¹ E te faauu foi le tanoa e mulumulu ai ma lona tulaga, ma e faapaiaina ai.

¹² E te faalatalataina mai foi Arona ma ona atalii i le faitotoa o le fale fetafai o le faapotopotoga, e te faataele foi ia i latou i le vai.

¹³ E te faaofuina foi Arona i ofu sa, ma e faauuina o ia, ma faapaiaina o ia, ina ia faia le faiva o ositaulaga ia te au;

¹⁴ o ona atalii e te faalatalataina mai foi i latou, ma e faaofuina i latou i ofu tino;

¹⁵ e te faauuina foi i latou, faapei ona e faauuina lo latou tamā, ina ia latou faia le faiva o ositaulaga ia te au; e fai lava lo latou faauuina ia i latou ma tofiga i le faiva o ositaulaga e faavavau i o latou tupulaga amuli.

¹⁶ Ona faia lea e Mose e tusa ma mea uma lava na poloai mai ai Ieova ia te ia, ua faapea lava ona faia e ia.

¹⁷ O le uluai masina i le tausaga e lua, o le uluai aso o lea masina ua faatuina ai le malumalu.

¹⁸ Ua faatuina ai e Mose o le malumalu, ua na tuu foi ona lago, ma faatu ona laupapa, ma sulu atu ai ona faalava, ma faatuina ona pou;

¹⁹ ua na fofola foi le ufiufi i luga o le malumalu, ma faaee ai le ufiufi o le fale fetafai i ona luga e aupito a luga; faapei ona poloai mai ai o Ieova ia Mose.

²⁰ Ua ia ave foi ma tuu papa maa o le tulaono i le atolaau, ma sulu atu amo i le atolaau, ma faaee le nofoa o le alofa i luga o le atolaau.

²¹ Ona avatu lea e ia o le atolaau i totonu o le malumalu, ma na tautau le ie puipui, ma na puipui a‘i le atolaau o le tulafono; e pei ona poloai mai ai o Ieova ia Mose.

²² Ua ia tuu foi le laoai i le fale fetafai o le faapotopotoga i le itu i matu o le malumalu, i le itu mai o le ie puipui.

²³ Ua ia teuteua foi le areto i ona luga i luma o Ieova; e pei ona poloai mai ai o Ieova ia Mose.

²⁴ Ona tuu lea e ia o le tuugālamepa i le fale fetafai o le faapotopotoga i le itu i toga o le malumalu, e feagai ma le laoai.

²⁵ Ua na tŭtŭ foi lamepa i luma o Ieova; e pei ona poloai mai ai o Ieova ia Mose.

²⁶ Ua ia tuu foi le fata auro i le fale fetafai o le faapotopotoga i luma o le ie puipui.

²⁷ Ua ia faamu foi i ona luga le mea manogi; e pei ona poloai mai ai o Ieova ia Mose.

²⁸ Ua ia tautau foi le ie puipui o le faitotoa o le malumalu.

²⁹ O le fata e fai ai taulaga mu foi na ia tuu ai i le faitotoa o le malumalu o le fale fetafai o le faapotopotoga, ma osi ai le taulaga mu ma le taulaga i mea e ‘ai; e pei ona poloai mai ai o Ieova ia Mose.

³⁰ Ua ia tuu foi le tanoa e mulumulu ai i le va o le fale fetafai o le faapotopotoga ma le fata faitaulaga; ua ia sasaa foi i ai le vai e taele ai;

³¹ o Mose foi, ma Arona, atoa ma ona atalii na mulumulu ai o latou lima ma o latou vae;

³² ua latou mulumulu ai ina a ulufale atu i latou i le malumalu, pe faalatalata i le fata faitaulaga; e pei ona poloai mai ai o Ieova ia Mose.

³³ Ua ia faatuina foi le lotoā e siosioina ai le malumalu ma le fata faitaulaga, ma na tautau le ie puipui i le faitotoa o le lotoā; ua faauma foi e Mose le galuega.

³⁴ Ona ufitia lea o le fale fetafai o le faapotopotoga i le ao, ua tumu foi le malumalu i le pupula o Ieova;

³⁵ ua le mafaia foi e Mose ona ulufale atu i le fale fetafai o le faapotopotoga, auā ua nofo le ao i ona luga; o le pupula foi o Ieova ua tumu ai le malumalu.

³⁶ A siitia foi le ao ai luga o le malumalu, ona o atu ai lea o le fanauga a Isaraelu i la latou malaga uma.

³⁷ A e afai ua le siitia le ao, ona le o malaga lea o i latou ina seia oo i le aso e siitia ai.

³⁸ Auā o le ao o Ieova sa i luga lava o le malumalu i le ao; sa i ona luga foi le afi i le po, i luma o le aiga uma o Isaraelu, i la latou malaga uma.