Esoto 37 - O LE TUSI PAIA

O LE MATAUPU XXXVII. Ua faia le atolaau ma nisi mea a le malumalu.

¹ Ua faia foi e Pesaleli le atolaau i le laau o e setima, e lua kupita ma le vaeluagalemu o le kupita o lona umi; o le kupita e tasi ma le vaeluagalemu o le kupita lona lau; o le kupita e tasi ma le vaeluagalemu o le kupita lona maualuga.

² Ua ia ufiufi foi i ai i le auro lelei i totonu ma tua, ua ia fai foi i ai le pale auro e siosioina a‘i.

³ Ua ia tunu le auro, ua fai a‘i mama e fa, e tuuina i ona tuli ato e fa; e lua mama i le tasi ona itu, e lua foi mama i le tasi ona itu.

⁴ Ua ia faia foi amo i le laau o le setima, ma na ufiufi ai i le auro.

⁵ Ua na sulu atu amo i mama i itu o le atolaau, e amo a‘i le atolaau.

⁶ Ua ia faia foi le nofoa o le alofa i le auro lelei; e lua kupita ma le vaeluagalemu o le kupita lona umi, ma le kupita e tasi ma le vaeluagalemu o le kupita lona lau.

⁷ Ua ia faia foi kerupi auro e lua; ua ia faia ua togitogi faamamanuina, o i pito e lua o le nofoa o le alofa;

⁸ o le tasi kerupi i le tasi pito nofoa, o le tasi foi kerupi i le tasi pito nofoa, na ia faia kerupi ia i le nofoa o le alofa i ona pito e lua i le mea e fai a‘i.

⁹ Ua fālō e kerupi o la apaau i luga, ua faamalumalu foi i o la apaau i le nofoa o le alofa; o la mata foi ua fesagai, ua faasaga mata o kerupi i le nofoa o le alofa.

¹⁰ Ua ia faia foi le laoai i le laau o le setima, e lua kupita lona umi, o le kupita e tasi lona lau, o le kupita ma le vaeluagalemu o le kupita lona maualuga.

¹¹ Ua ia ufiufi ai foi i le auro lelei, ma na fai ai le pale auro e siosioina a‘i.

¹² Ua ia fai ai foi lona tafatafa i lalo e siosioina a‘i, o le lautele o le alofilima e tasi lona lau; ua ia fai foi le pale auro mo le tafatafa i lalo e siosioina a‘i.

¹³ Ua ia tunu foi le auro ua fai a‘i mama e fa, ua ia tuuina taitasi mama i ona tuli laoai e fa, ua i ona vae e fa.

¹⁴ Ua felatai mama ma le tafatafa i lalo, e fai ma mea e sulu ai amo, e amo a‘i le laoai.

¹⁵ Ua ia faia foi amo i le laau o le setima, ma na ufiufi ai i le auro, e amo a‘i le laoai.

¹⁶ Ua ia faia foi mea mo le laoai, o ona tanoa salalafa, ma ona ipu, ma ona tanoa, ma ona ipu e asu a‘i e liligi ai; o le auro lelei na fai a‘i ia mea.

¹⁷ Ua ia faia foi le tuugālamepa i le auro lelei, ua na faia le tuugālamepa, ua togitogi faamamanuina, o lona ‘au, ma ona maga, o ona ipu faaofuofu, o ona pona, ma ona fuga, ua faia uma i lea lava mea.

¹⁸ Ua o atu maga e ono i ona itu, e tolu maga o le tuugālamepa i le tasi itu, e tolu foi maga o le tuugālamepa i le tasi itu.

¹⁹ E tolu ipu faaofuofu e pei o sekati i le tasi maga, o le pona foi atoa ma le fuga; e tolu foi ipu faaofuofu e pei o sekati i le tasi maga, o le pona foi atoa ma le fuga; ua faapea foi ona maga e ono e o atu i le tuugālamepa.

²⁰ Ua i le tuugālamepa foi o ipu faaofuofu e fa, e pei o sekati, ona pona atoa ma ona fuga;

²¹ ma le pona i lalo o isi ona maga e lua, ma le pona i lalo o isi ona maga e lua, ma le pona i lalo o isi ona maga e lua, e faatatau i maga e ono ua o atu ai;

²² ua faia i le mea e tasi ona pona ma ona maga, ua faia uma lava i le auro lelei, ua togitogi faamamanuina.

²³ Ua ia faia foi ona lamepa e fitu, ma ona selelamepa, ma ona tuugāmatapa‘u o le afi, i le auro lelei.

²⁴ Ua ia faia i le taleni o le auro lelei, atoa ma ana mea uma lava.

²⁵ Ua faia foi e ia le fata e mu ai le mea manogi i le laau o le setima; o le kupita e tasi lona umi, o le kupita e tasi foi lona lau; ua faatāfafa; ua lua kupita lona maualuga; ua fai ai ona nifo i lea lava mea.

²⁶ Ua ia ufiufi ai foi i le auro lelei, i ona luga ma ona itu ua soo ai, atoa ma ona nifo; ua ia fai ai foi le pale auro e siosioina a‘i.

²⁷ E lua foi mama auro ua ia fai ai i lalo o lona pale i ona tuli fata e lua, i ona itu e lua; o mea ia e sulu ai ona amo e amo a‘i.

²⁸ Ua ia faia foi ona amo i le laau o le setima, ma na ufiufi ai i le auro.

²⁹ Ua ia faia foi le uu paia e faauu a‘i, ma le mea manogi lelei e mu, ua faia i mea manogi lelei i le faiva o le fai mea manogi.