Esoto 28 - O LE TUSI PAIA

O LE MATAUPU XXVIII. Ua tofia Arona ma ona atalii e fai ma faitaulaga.

¹ Ia e faalatalata mai foi ia te oe o lou uso o Arona atoa ma ona atalii faatasi ma ia, ai le fanauga a Isaraelu, ina ia fai ma ositaulaga ia te au, o Arona, o Natapu, ma Aviu, o Eleasaro, ma Itamaro, o atalii o Arona.

² E te faia foi ofu sa mo lou uso o Arona e mamalu a‘i ma matagofie a‘i.

³ E te tautala atu i tagata popoto uma lava, o e ua ou faatumuina i le loto e poto, ia latou faia ofu mo Arona e faapaiaina ai o ia, ina ia fai o ia ma ositaulaga ia te au.

⁴ O ofu nei latou te faia, o le ufifatafata, ma le efota, ma le ofu talaloa, ma le ofu tino faalalelei, ma le pulou ie, ma le fusi; ia latou faia foi ofu sa mo lou uso o Arona, atoa ma ona atalii, ina ia fai ma ositaulaga ia te au.

⁵ Ia latou ave le auro, ma le ie uli, ma le pāuli, ma le mūmū, ma le ie vavae;

⁶ ia latou faia le efota i le auro, ma le ie uli, ma le pāuli, ma le mūmū, ma le ie vavae ua milo ona manoa i le galuega a le tufuga poto.

⁷ Ia faasooina ona tau‘au e lua i ona tafatafa, ia faatasia.

⁸ O le fusi faalanu eseese foi o le efota o i ona luga, e pei o le galuega e i ai, e faia i ia lava mea, o le auro, ma le ie uli, ma le pāuli, ma le mūmū, ma le ie vavae ua milo ona manoa.

⁹ Ia e ave foi maa soama e lua, ma togitogi ai igoa o atalii o Isaraelu;

¹⁰ e ono o latou igoa i le tasi maa, ma igoa o le isi toaono i le tasi maa, e faatatau i o latou fanau mai.

¹¹ O le galuega a le tufuga togitogi maa, e pei o le togitogiga o le maa o faamaufaailoga, e te togitogiina igoa o atalii o Isaraelu i ia maa e lua; ia e faia, ia faamau i taai auro.

¹² E te tuu foi maa e lua i tau‘au o le efota, o maa e manatuaina ai le fanauga a Isaraelu; e ave foi e Arona o latou igoa i luma o Ieova, i ona lava tau‘au e lua e manatuaina ai i latou.

¹³ E te faia foi taai auro.

¹⁴ E lua foi filifili auro lelei e te faia ia tutusa i le galuega faafilifili uamea, ia faamauina foi o filifili auro i taai.

¹⁵ E te faia foi le ufifatafata o le faamasinoga i le galuega a le tufuga poto, e pei o le galuega i le efota e te fai ai; e te faia i le auro, ma le ie uli, ma le pāuli, ma le mūmū, ma le ie vavae ua milo ona manoa.

¹⁶ E faia faatāfafa ma faasāutualua; o le āga lona umi, o le āga foi lona lau.

¹⁷ E te tuuina foi i tuugāmaa o atu maa e fa; o le uluai atu maa, o le salikea, ma le topasi, ma le pereketa, o le atu maa muamua lea.

¹⁸ O lona atu lua, o le nofeka, ma le safaira, ma le ialoma.

¹⁹ O lona atu tolu foi, o le lesema, ma le sevo, ma le aselama.

²⁰ O loua atu fa foi, o le tasesa, ma le soama, ma le iasepi; ia faamauina lava ia i totonu o le taai auro i o latou tuugamaa.

²¹ Ia i ai i na maa o igoa o atalii o Isaraelu e sefulu ma le lua, e faatatau i o latou igoa, pei o le togitogiga o le faamaufaailoga, e taitasi ma lona igoa, e tusa ma itu aiga e sefulu ma le lua.

²² E te faia foi i luga o le ufifatafata, o filifili auro lelei ia tutusa, o le galuega faafilifili uamea.

²³ E te faia foi i luga o le ufifatafata o mama auro e lua, ma ia e tuu ia mama e lua i pito e lua o le ufifatafata.

²⁴ E te tuu foi filifili auro e lua i mama e lua i pito o le ufifatafata.

²⁵ E te tuu foi isi pito e lua o filifili auro e lua i taai e lua, ma tuu i tau‘au o le efota i ona luma.

²⁶ E te faia foi mama auro e lua, ma e tuuina ai i pito e lua o le ufifatafata i ona tafatafa lava, o loo faasaga i le efota i totonu.

²⁷ E lua foi mama auro e te faia, ma tuu ai i itu e lua i lalo o le efota, e lata ane i lona itu i luma, e felatai ma le mea e faasooina i luga o le fusi faalanu eseese o le efota.

²⁸ Ia latou nonoa foi le ufifatafata i ona mama i mama o le efota i le manoa uli, ina ia i luga ae o le fusi faalanu eseese o le efota, ina ne‘i te‘a ese le ufifatafata i le efota.

²⁹ E ave foi e Arona o igoa o atalii o Isaraelu i le ufifatafata o le faamasinoga i lona fatafata, pe a ulu atu ia i le mea paia, e fai ma faamanatuga e le aunoa i luma o Ieova.

³⁰ E te tuu foi le Urima ma le Tumena i le ufifatafata o le faamasinoga, ina ia i luga lava o le fatafata o Arona, pe a ulu atu o ia i luma o Ieova; e ave foi e Arona le faamasinoga mo le fanauga a Isaraelu i luga o lona fatafata i luma o Ieova e le aunoa.

³¹ E te faia le ofu talaloa o le efota ia atoatoa o le ie uli.

³² E faia foi se ua i lona pito i luga i totonu, e fai ai se mea lalagaina e afei faataaliolio ai i le ua, e pei o le ua o le ofutau ina ia le masae.

³³ E te faia foi i ona tafatafa o rimoni i le ie uli, ma le pāuli, ma le mūmū, e faataaliolioina ai ona tafatafa; ma tagitagi auro e vava a‘i e faataaliolioina ai;

³⁴ o le tagitagi auro ma le rimoni, o le tagitagi auro ma le rimoni, i tafatafa o le ofu talaloa e faataaliolioina ai.

³⁵ E ofu ai Arona pe a auauna o ia, ina ia lagona lona tagitagi pe a ulu atu ia i le mea paia i luma o Ieova, pe a toe alu foi i fafo, ne‘i oti o ia.

³⁶ E te faia foi le mea pupula i le auro lelei, ma e togitogi ai, pei o le togitogi i le faamaufaailoga, o lenei upu, e paia ia ieova.

³⁷ E te tuuina foi i le manoa uli, ia i ai lava i le pulou ie, i luma lava o le pulou ie.

³⁸ Ia i ai foi i le muaulu o Arona, ia ave e Arona le agasala i mea sa, e faasaina e le fanauga a Isaraelu i a latou taulaga sa uma lava, ia i ai pea lava i lona muaulu, ina ia alofagia i latou i luma o Ieova.

³⁹ E te lalaga manu foi le ofu tino i le ie vavae, e te faia le pulou i le ie vavae, e te fai foi le fusi i le galuega a le tufuga fai ie lanu eseese.

⁴⁰ Ia e faia foi ofu tino mo atalii o Arona; e te faia foi mo i latou o fusi, atoa ma pulou e te faia mo i latou, ina ia mamalu ai ma matagofie ai.

⁴¹ E te faaofu ai foi lou uso, o Arona, ma ona atalii faatasi ma ia; e te faauu foi ia i latou, ma e tofia i latou, ma faapaiaina i latou e fai le faiva o ositaulaga ia te au.

⁴² E te faia foi mo i latou o ofu vae i ie vavae, e ufiufi ai o latou tino, e gata mai i o latou sulugatiti ia oo i o latou ogāvae;

⁴³ e oofu ai Arona ma ona atalii, pe a latou ulufale i le fale fetafai o le faapotopotoga, pe faalatalata atu i le fata faitaulaga e auauna i le mea paia, ina ne‘i nofo sala i latou, ma oti ai; e fai lea ma tulafono e faavavau ia te ia, atoa ma ana fanau pe a mavae atu o ia.