Esoto 20 - O LE TUSI PAIA

O LE MATAUPU XX. O tulafono a Ieova.

¹ Ona fetalai mai lea o le Atua i nei upu uma lava, ua faapea mai,

² O a‘u o Ieova lou Atua, o le na aumaia oe nai le nuu o Aikupito, o le mea sa nofo pologa ai;

³ Aua ne‘i e fai mo oe ni atua ese i o‘u luma.

⁴ Aua e te fai mo oe se tupua ua ta, po o se faatusa lava o se mea o i le lagi i luga, po o i le fanua i lalo, po o i le sami o i lalo o le fanau;

⁵ aua e te ifo i ai, aua foi e te auauna i ai; auā o a‘u o Ieova lou Atua, o le Atua fuā, o le taui atu i fanau o le amioletonu a o latou mātua, e oo i le tupulaga e tolu ma le fa o e ‘ino‘ino mai ia te au;

⁶ a ou te alofa i afe o tupulaga o e alofa mai ia te au, ma tausi mai i a‘u poloaiga.

⁷ Aua e te ta‘u fua le suafa o Ieova lou Atua; auā e le faasaoina e Ieova o lē ta‘u fua i lona suafa.

⁸ Ia e manatua le aso sapati e te faapaiaina.

⁹ O aso e ono e te galue ai, ma fai ai au galuega uma lava;

¹⁰ a o le aso fitu o le sapa‘i lea ia Ieova lou Atua; aua e te fai ai se galuega e tasi, o oe, ma lou atalii, ma lou afafine, o lau auauna tane, ma lau auauna fafine, o au manu foi, ma le tagata ese o loo mau ma oe.

¹¹ Auā na faia e Ieova i aso e ono o le lagi ma le lalolagi, atoa ma le sami, ma mea uma lava o i ai, ona malolo ai lea o ia i le aso fitu; o le mea foi lea na faamanuia ai e Ieova le aso sapati, ma na faapaiaina ai.

¹² Ia e ava i lou tamā ma lou tinā, ina ia faalevaleva ai ou aso i le nuu o le a foaiina mai e Ieova lou Atua ia te oe.

¹³ Aua e te fasioti tagata.

¹⁴ Aua e te mulilua.

¹⁵ Aua e te gaoi.

¹⁶ Aua e te molimau pepelo i lē lua te tuaoi.

¹⁷ Aua e te manao i le fale o lē lua te tuaoi, aua e te manao i le avā a lē lua te tuaoi, po o lana auauna tane, po o lana auauna fafine, po o lana povi, po o lana asini, po o se tasi mea a lē lua te tuaoi.

¹⁸ Ua iloa e le nuu uma lava le faititili, ma le ulia, ma le taalili o le pu, ma le mauga ua pusa, ona fefefe lea o le nuu ua gatete lava i latou ma tutū mamao atu.

¹⁹ Ua latou faapea mai foi ia Mose, Ia e tautala mai oe ia te i matou, matou te faalogo i ai; a e aua le fetalai mai le Atua ia te i matou, ne‘i matou oti.

²⁰ Ua tali atu Mose i le nuu, Aua tou te fefefe; auā ua afio mai le Atua ina ia tofotofo ia te outou, ina ia matautia foi o ia e outou, ina ne‘i outou agasala.

²¹ Ona tutū mamao atu lea o le nuu, a o Mose ua ia faalatalata atu i le mea pogisa ua i ai le Atua.

²² Ua fetalai mai foi Ieova ia Mose, Ia e fai atu i le fanauga a Isaraelu, ia faapea atu, Ua outou iloa ua ou tautala atu ia te outou mai le lagi;

²³ aua tou te faia atua ario e faaopoopo mai ia te au, aua foi ne‘i faia atua auro mo outou.

²⁴ Ia e faia le fata eleele e fai a‘i taulaga ia te au, ma ia e fai taulaga i ona luga, o au taulaga mu, ma au taulaga faafetai, o au mamoe, ma au povi; o mea uma lava ou te faailoa atu ai lo‘u igoa, ou te alu atu ai ia te oe, ma ou faamanuia ai ia te oe.

²⁵ Afai foi e te faia se fata maa e fai a‘i taulaga ia te au, aua le faia i maa talai; auā pe a e talai i se to‘i, ona leaga ai lava lea ia te oe.

²⁶ Aua foi e te alu ae i se ala faaapefai i lo‘u fata faitaulaga, ne‘i aliali ai lou tino.