ESETA, 3 - O LE TUSI PAIA

O LE MATAUPU III. O le faasiliina o Hamanu, ma lona faasaua ia Moretekai ma sa Iutā uma.

¹ Ua mavae ia mea, ona faasili lea e le tupu o Asueru ia Hamanu le atalii o Hametatu o lo sa Akakō, ma na faaeaina o ia, ma faasili lona nofoa i alii uma ua faatasi ma ia.

² Ona punou lea ma ifo atu ia Hamanu o auauna uma a le tupu, o e na i ai i le faitotoa o le tupu; auā na faapea ona poloai atu e le tupu ia faia ia te ia; a e lei punou Moretekai, e lei ifo foi.

³ Ona fai atu lea o auauna a le tupu, e na i ai i le faitotoa o le tupu, ia Moretekai, Se a le mea ua e soli ai le poloaiga a le tupu?

⁴ Ua latou fai atu ia te ia i lea aso ma lea aso, a e lei faalogo o ia ia te i latou; ona latou ta‘u atu ai lea ia Hamanu, ia latou iloa pe tu le mea a Moretekai; auā ua ia faailoa atu ia te i latou, o ia o lo sa Iutā.

⁵ Ua iloa e Hamanu ua le punou Moretekai, ua le ifo foi ia te ia; ona matuā ita ai lea o Hamanu.

⁶ Na ‘ino‘ino o ia e faaoo lona lima ia Moretekai tau o ia; auā ua latou faailoa atu ia te ia le nuu o Moretekai; ona manao lea o Hamanu e faaumatia sa Iutā uma lava, le nuu o Moretekai, e na i ai i le malo uma o Asueru.

⁷ O le masina muamua, o le masina lea o Nisani, o le sefulu ma le lua o tausaga o le tupu o Asueru, na fai ai le Puro, o le vili lea, i luma o Hamanu i lea aso ma lea aso, i lea masina foi ma lea masina, e oo i le masina e sefulu ma le lua, o le masina lea o Atara.

⁸ Ona fai atu lea o Hamanu i le tupu o Asueru, O loo i ai le tasi nuu ua taapeape ma nonofo solo faatasi ma tagata o itu malo uma o lou malo. E ese foi a latou tulafono i tulafono a nuu uma, ma ua latou le usiusitai i tulafono a oe le tupu; o le mea lea, e le tatau ai i lau afio ona tuu pea ia te i latou.

⁹ Afai e lelei ia te oe le tupu, ia tusia ia fano i latou; ou te fuaina atu ai taleni ario e sefulu afe i lima o e faia lenei mea, ina ia latou avatu ai i mea e teu ai oloa a le tupu.

¹⁰ Ona to ese ai lea e le tupu o lana mama i lona lima, ma avatu ai ia Hamanu le atalii o Hametatu o lo sa Akakō, o lē faasaua i sa Iutā.

¹¹ Ua fai atu foi le tupu ia Hamanu, Ua avatua ia te oe le ario atoa ma lena nuu, ina ia e faia i ai le mea e lelei ia te oe.

¹² Ona valaauina lea o e tusiupu a le tupu i le aso e tasi le sefulu ma le tolu o le masina muamua, ona tusia ai lea o mea uma ua fai atu ai Hamanu e avatu i alii sili ua i le tupu, ma e pule, o e na pule i lea itu malo ma lea itu malo, o alii foi o lea nuu ma lea nuu, e faatatau ma le tusilima a lea itu malo ma lea itu malo, e tusa foi ma le gagana a lea nuu ma lea nuu; na tusia i le igoa o le tupu o Asueru, na faamaufaailogaina foi i le mama a le tupu.

¹³ Ona molia lea o tusi e ua tele vavave i itu malo uma o le tupu, ina ia faaumatia, ma ia fasiotia, ma ia fano sa Iutā uma, o taulelea atoa ma toeaina, o tama iti atoa ma fafine, i le aso e tasi, o le sefulu ma le tolu lea o aso o le sefulu ma le lua o masina, o le masina lea a Atara; ma a latou mea ia vetea.

¹⁴ O le ata o le tusi e avatua e fai ma tulafono i lea itu malo ma lea itu malo uma, ua faailoa atu ai i nuu uma ina ia saunia i latou i lea aso.

¹⁵ Na o atu e ua tele vavave o faataaliseina i le poloaiga a le tupu; na avatua foi le tulafono ai Susana le maota. Ona la nonofo lea o le tupu ma Hamanu, ua la feinu; a ua atuatuvale le aai o Susana.