Esera 6 - O LE TUSI PAIA

O LE MATAUPU VI. O le poloaiga a Tariu ia fai pea le malumalu. O le faaumaina o le malumalu.

¹ Ona poloai atu lea o Tariu le tupu, ona latou suesue lea i le fale tusi na tuuina ai oloa i Papelonia.

² Ona maua lea i Akemeta i le ‘olo o i le itu malo o Metai le tusi taai, ua faapea foi ona tusia i ona totonu le upu e faamanatu a‘i,

³ O le tausaga muamua o Kuresa le tupu ua poloai atu ai Kuresa le tupu i le fale o le Atua i Ierusalema, Ia faia le fale, o le mea na latou fai ai taulaga, ma ia atiina ae ona faavae; e onogafulu o kupita lona maualuga, e onogafulu o kupita lona lautele;

⁴ e tolu atu maa tetele, ma le atu laau fou; ma ia avatua le totogi ai le fale o le tupu;

⁵ o mea foi o auro ma ario o le fale o le Atua na avea e Nepukanesa ai le malumalu o i Ierusalema, na na au mai foi i Papelonia, ia toe avatua, ma ia tuu atu i le malumalu o i Ierusalema, e taitasi le mea ma tuu i le mea e tuu ai i le fale o le Atua.

⁶ O lenei, Tatenai e, le alii e pule i ona tala atu o le vaitafe; Setara-posenai e, ma e pule faatasi ma oulua, o tagata o Afareseka o i ona tala atu o le vaitafe, ia taumamao outou ma lena mea;

⁷ tuu pea ia le galuega o lena fale o le Atua; ia faia lena fale o le Atua i lona tulafale e le alii e pule i tagata o Iuta, ma toeaina o Iuta.

⁸ Ou te fai atu foi i mea tou te faia i toeaina o Iuta e fai ai lena fale o le Atua, ia vave foi ona avatua i na tagata oloa a le tupu, o taulaga foi ia i ona tala atu o le vaitafe, e totogi ai le galuega ina ia le tuua e i latou le galuega.

⁹ O mea foi e tatau ia i latou, o povi taanoa, ma mamoe poa, ma tamai mamoe, e fai ma taulaga mu i le Atua o le lagi, o saito, o masima, o uaina, ma suauu, e pei ona fai mai ai o faitaulaga o i Ierusalema, ia tuuina atu ai ia te i latou i lea aso ma lea aso, aua ne‘i faatamala;

¹⁰ ina ia latou faitaulaga a‘i i mea manogi i le Atua o le lagi, ma tatalo ia ola le tupu ma ona atalii.

¹¹ Ua ou poloai atu foi, ai se tagata na te liua lenei upu, ia toina se laau ai lona fale, ia siitia foi o ia, ma ia faamauina i ona luga; ia fai foi lona fale ma faatafuna ona o lea mea.

¹² O le Atua foi o le na faatumauina lona suafa i lea mea, ia lafo i lalo e ia atoa uma tupu ma nuu, o e faaloaloa o latou lima e liliu ma faataumaoi lenei fale o le Atua o i Ierusalema. O a‘u o Tariu ua ou poloai atu; ia matuā faia lava.

¹³ Ona vave faia lea e Tatenai o le alii e pule i ona tala mai o le vaitafe, o Setara-posenai, ma e pule faatasi ma i laua e pei o le feau mai le tupu o Tariu.

¹⁴ Ona fai lea e toeaina o Iuta o le fale, ua manuia foi ona o le perofeta ane a Hakai le perofeta, ma Sakaria le atalii o Ito. Sa latou faia le fale ma faaumaina ai, e tusa ma le poloaiga a le Atua o Isaraelu, ma le poloaiga a Kuresa, ma Tariu, ma Aretaseta le tupu o Peresia.

¹⁵ Ua faaumaina lenei fale i le aso tolu o le masina o Atara, o le ono lea o tausaga o le nofoaiga a le tupu o Tariu.

¹⁶ Ua faia le faaulufalega o lenei fale o le Atua ma le fiafia e le fanauga a Isaraelu, o faitaulaga, ma sa Levi,

¹⁷ ma tagata uma o le tafeaga, ua latou fai taulaga foi i le faaulufalega o lenei fale o le Atua, o povi poa e selau, o mamoe poa e lua selau, ma tamai mamoe e fa selau; ma ‘oti poa e fai ma taulaga mo le agasala ona o Isaraelu uma e sefulu ma le lua ia, e tusa ma le faitau o itu aiga o Isaraelu.

¹⁸ Ua latou tofia faitaulaga i o latou vasega, ma sa Levi i o latou vasega, e fai ai le galuega a le Atua o i Ierusalema, e pei ona tusia i le tusi a Mose.

¹⁹ Ua faia e tagata o le tafeaga le paseka i le aso e sefulu ma le fa o le uluai masina.

²⁰ Auā sa faamamāina faatasi le au faitaulaga ma sa Levi, ua mamā i latou uma, ua latou fasi foi le paseka mo tagata uma o le tafeaga, ma o latou uso o le au faitaulaga, atoa ma i latou lava.

²¹ Ua aai ai foi le fanauga a Isaraelu e na foi mai i le tafeaga, ma i latou uma e na vavae mai ia te i latou ai le leaga o tagata ese o i le nuu, e saili atu ai ia Ieova le Atua o Isaraelu;

²² ma latou faia le tausamiga o areto e le faafefeteina i aso e fitu ma le fiafia; auā sa faafiafiaina i latou e Ieova, na ia liliu foi le loto o le tupu o Asuria ia te i latou e faamalolosi ai o latou lima i le faiga o le fale o le Atua, o le Atua o Isaraelu.