Esera 3 - O LE TUSI PAIA

O LE MATAUPU III. O le faatuina o le fata faitaulaga, ma le faavaeina o le malumalu.

¹ Ua oo i le masina e fitu, ua i ai foi le fanauga a Isaraelu i o latou aai, ona faapotopoto ai lea o le nuu, e pei o se tagata e toatasi, i Ierusalema.

² Ona tutu mai lea o Iosua le atalii o Iosataka, ma ona uso le au faitaulaga, ma Serupapelu le atalii o Salatielu, ma ona uso, ona latou ati ae lea o le fata faitaulaga o le Atua o Isaraelu, ina ia fai ai i ona luga o taulaga, e pei ona tusia i le tulafono a Mose le tagata o le Atua.

³ Ua latou faatuina le fata faitaulaga i ona faavae; aua ua latou matatau i tagata o ia nuu; ona latou fai taulaga ai lea i ona luga i taulaga mu ia Ieova; o taulaga mu i le taeao ma le afiafi.

⁴ Ua faia foi e i latou le tausamiga o fale apitaga, e pei ona tusia, ma taulaga mu o lea aso ma lea aso e tusa ma le faitau, e tusa ma le tu, o le aso ma le mea e fai ai;

⁵ e mulimuli ane foi o taulaga mu e le aunoa e faia i masina faatoa vaaia, atoa ma tausamiga uma o Ieova na faapaiaina, atoa ma taulaga a tagata uma ua manatu i ai o latou loto e fai ia Ieova.

⁶ O le aso muamua o le masina e fitu ua latou amata ai ona fai taulaga mu ia Ieova, a o le malumalu o Ieova e lei faavaeina.

⁷ Ua latou avatua ario i e talai maa ma tufuga; ma mea e ‘ai, ma mea e inu, ma suāuu, i tagata Saitonu, ma tagata Turo, latou te aveifoa laau o arasi mai Lepanona i le sami o Iopa, e pei ona pule mai ia te i latou e Kuresa le tupu o Peresia.

⁸ O le lua o tausaga talu ona latou oo mai i le fale o le Atua i Ierusalema, o le lua o masina, ua amata ai e Serupapelu le atalii o Salatielu, ma Iosua le atalii o Iosataka, ma e ua totoe o latou uso le au faitaulaga ma sa Levi, ma e ua o mai uma mai le tafeaga i Ierusalema, ma latou tofia sa Levi, e afua i e ua luafulu o latou tausaga ma e ua matutua ai, e pule i le galuega o le fale o Ieova.

⁹ Ona tutu mai lea faatasi o Iosua, o ona atalii, ma ona uso, o Katameeli ma ona atalii, o le fanauga a Iuta, e pule i le faiga o le galuega o le fale o le Atua; o atalii o Henatati, o latou atalii ma o latou uso o sa Levi.

¹⁰ Ua faavaeina e tufuga ati fale le malumalu o Ieova, ona latou tofia lea o le au faitaulaga ua oofu i latou, ua i ai foi pu, ma sa Levi o le fanauga a Asafo ua i ai sumepalo, e vivii atu ia Ieova e tusa ma le pule a Tavita le tupu o Isaraelu.

¹¹ Sa latou pepese i viiga ma faafetai ia Ieova, aua e lelei o ia, aua e faavavau lona alofa ia Isaraelu. Ona alaga lea o le nuu uma i le alaga tele i viiga ia Ieova, ona ua faavaeina o le fale o Ieova.

¹² E toatele o le au faitaulaga, ma sa Levi, ma matai sili e na toeaina, na latou vaaia le uluai fale, sa fetagisi ma le leo tele ina ua faavaeina o lenei fale i o latou luma; e toatele foi na alalaga ona o le fiafia ua leo tetele.

¹³ Ua le iloga e le nuu le leo o le alaga o le fiafia ma le leo o le fetagisi o le nuu; aua sa alalaga le nuu i le alaga tele, ua lagona atu le leo i le mea mamao.