Eperu 4 - O LE TUSI PAIA

O LE MATAUPU IV. O le malologa e maua i le faatuatua.

¹ O lenei, ia tatou fefefe, ina ua tuuina mai pea o le upu ua folafola mai ia sao atu ai i lona malologa, ne‘i ai so outou e faaleoo atu i ai.

² Auā foi ua tala‘iina mai i tatou i le tala lelei e pei o i latou; a ua le aoga le upu na latou faalogologo i ai, ina ua le faatatauina ma le faatuatua i e na faalogologo i ai.

³ Auā tatou te sao atu i le malologa, o i tatou o e ua faatuatua, pei ona fetalai mai o ia, Pei ona ou tauto i lo‘u ita, Latou te le sao atu lava i lo‘u malologa; o le malologa lava lea i le galuega na faia ina ua uma ona faavaeina o le lalolagi.

⁴ Auā ua fai mai i le tasi upu i le aso fitu, ua faapea mai, Na malolo foi le Atua i le aso fitu i ana galuega uma.

⁵ Ua toe faapea foi i lenei upu, Latou te le sao atu lava i lo‘u malologa.

⁶ O lenei, ua tuuina mai pea ona ia sao atu i ai o isi, mona ua le sao atu i ai o e na muai tala‘iina i ai le tala lelei ona o le faalogogata,

⁷ ona toe tuupo ai lea o ia i le tasi aso i lana na fetalaia mai e Tavita, O le aso nei, ina ua mavae o ia tausaga e tele, pei ona fetalaia mai, O le aso nei afai tou te faalogo ai i lona siufofoga, aua tou te faamaaa i o outou loto.

⁸ Auā ana faaoo e Iosua ia i latou i le malologa, po ua le toe ta‘uina e le Atua o se tasi aso.

⁹ O lenei, ua tuuina mai pea o le malologa faasapati mo tagata o le Atua.

¹⁰ Auā o le ua sao atu i lona malologa, ua malolo foi o ia i ana lava galuega, faapei o le Atua i ana lava.

¹¹ O lenei, ina tatou finafinau ia ina ia sao atu i lena malologa, ne‘i ai se tasi e paū i lona faaa‘oa‘o i lo latou faalogogata.

¹² Auā o loo ola le afioga a le Atua, o loo matuā galue foi, o loo sili foi lona maai i pelu uma e faatau maai itu, o loo vaevae foi e oo lava i le vavaeeseina o le loto ma le agaga, o gaugātino foi ma aano o ivi, o loo faamasino foi i manatu ma filifiliga o le loto;

¹³ e le lilo foi se tasi mea na faia i ona luma, a ua taatia fua ma ua aliali mai o mea uma lava i lana silafaga, tatou te ta‘u atu ia te ia a tatou amio.

¹⁴ O lenei, ua ia i tatou le faitaulaga silisili, ua afio atu i le lagi, o Iesu le Alo o le Atua, ia tatou taofi mau ai i la tatou e ta‘utino atu.

¹⁵ Auā e le ia te i tatou se faitaulaga sili e le mafaia ona tiga alofa faatasi ma i tatou i o tatou vaivai, a ua faaosoosoina o ia i mea uma pei o i tatou, a ua leai se agasala ia te ia.

¹⁶ O le mea lea ia tatou faalatalata atu ai ma le faamalosi i le nofoālii o le alofa tunoa, ina ia alofaina ai o i tatou, ia maua ai foi le alofa tunoa e fesoasoani mai i ona aso e tatau ai.