1 Peteru 3 - O LE TUSI PAIA

O LE MATAUPU III. O le amio e tatau i avā ma tane. Ia loto tetele pe a faasauaina.

¹ Ia faapea outou fafine, ia usiusitai i a outou lava tane, afai foi e le faalogo nisi i le upu, ia maua i latou i le amio lelei a avā, a e leai se upu,

² pe a latou vaai ane i a outou amio le gaoiā ma le mata‘u.

³ Aua ne‘i faia i le tino a latou teuga, o le fili lea o le lauulu, ma le teuteu i auro, ma le oofu i ofu;

⁴ a o le tagata lilo o le loto, ia teua lea i le mea e le pala, o le loto agamalu ma le filemu, o le mea tau tele lava lea i luma o le Atua.

⁵ Auā sa faapea foi fafine paia anamua ona teuteu ia i latou, o e na faamoemoe i le Atua, na usiusitai i latou i a latou lava tane.

⁶ Sa faapea Sara ona faalogo ia Aperaamo, na ia ta‘ua o ia o le alii; ua fai foi outou ma ana tama, pe a agalelei ma le le mata‘u i se mea e tasi e mata‘u ai.

⁷ Ia faapea outou tane, ia nonofo faatasi ma i latou ma le poto, ia ava i le avā, auā o le ipu ia ua sili ona vaivai ia te oe, mona ua tofia faatasi i le ola e foaifuaina mai, ne‘i faalavelaveina a outou tatalo.

⁸ O le iuga lenei, ia loto gatasi outou uma, ia fealofani, ia alolofa i le au uso, ia mutimuti vale i le alofa, ia agalelei;

⁹ aua le taui atu le leaga i le leaga, po o le agatele mai i le agatele atu; a ia outou faamanuia atu, ina ua iloa o le mea lenei na valaauina ai outou, ina ia maua e outou le manuia.

¹⁰ Auā o lē fia manao i le ola, ma ia iloa aso lelei, soia le tautala lona laulaufaiva i upu leaga, ma ona laugutu aua le tautalatala faa‘ole‘ole.

¹¹ Ia ‘alo ese i le leaga, a ia fai mea lelei; ia saili i le filemu ma tausisi i ai.

¹² Auā o fofoga o le Alii o loo faasaga i e amiotonu, e liliu mai foi ona taliga i a latou faatoga. A o fofoga o le Alii o loe faasaga ma le toasa i e fai amio leaga.

¹³ O ai foi na te agaleaga ia te outou, pe afai tou te faaa‘oa‘o i loo lelei?

¹⁴ A e afai e tigaina outou ona o le amiotonu, amuia outou, Aua foi tou te fefefe i lo latou faamatau mai, aua foi le atuatuvale.

¹⁵ A ia paia le Alii le Atua i o outou loto. Ia saunia pea lava outou e tali atu ma le agamalu ma le mata‘u ia i latou uma o e fesili mai ia te outou i le uiga o le faamoemoe o loo ia te outou.

¹⁶ Ia ia te outou le loto fuatia ifo lelei, o le mea foi latou te faaleaga ai ia te outou, peiseai ua outou amio leaga, ia masiasi i latou o e tuua‘i fua la outou amio lelei o ia Keriso.

¹⁷ Auā afai e finagalo o le Atua ia tigaina outou ona o le amio lelei, e sili ona lelei o lea i le tigaina ona o le amio leaga.

¹⁸ Auā o Keriso foi na tigaina o ia faatasi mo agasala, o le amiotonu o le sui o le amioletonu, ina ia ta‘ita‘iina e ia o i tatou i le Atua; na fasiotia o ia i le tino, a ua faaolaina mai i le Agaga;

¹⁹ na ia maliu atu ai, ma tala‘i atu ai i agaga i le fale puipui;

²⁰ o e na le faalogo anamua, ina o faatalitali mai le onosai o le Atua anamua i ona po o Noa, a o sauni ai le vaa, na faasaoina ai tagata e toaitiiti, e toavalu lava ia, i le vai.

²¹ O le faatusa foi lea mea o le papatisoga, o loo faaola mai ai nei ia i tatou, (e le o le faateaeseina o le eleele o le tino, a o le tali a le loto fuatia ifo lelei i le Atua,) i le toe tu mai o Iesu Keriso;

²² o ia o loo i le itu taumatau o le Atua, ina ua afio ae o ia i le lagi, ua toilalo ia te ia o agelu, ma faipule, atoa ma ē malolosi.