Matius 2 - Pangàlu' Baru Sura'na Puang i laling sua: tu Padang

Tau ung bùruꞌ nai Mata kùlaꞌ, ung manarangna manghele i anaka hulang

¹ Jadiꞌ, nikianak‑ing ti Yesu i Yudea, i lipu: Betlehem, tempona Datu: Herodes muparenta. Tempo to, ara pira-pira ung manarangna manghele i anaka hulang bùruꞌ i Yerusalem nai karaona mui Mata kùlaꞌ.

² Mingkutikìna‑mi se moa teꞌ, “Iaka ti datuna tu Yahudi ung màli: nikianak‑ing? Sàbaꞌ ki ita‑moka ti anaka hulangNa soha:, dea pùna ki bùruꞌ‑mo mampinombai‑I.”

³ To na sàding‑mi Datu: Herodes, masussa tungka tangaꞌna. Mène: ho ti nasang tau i Yerusalem.*

⁴ Na hàngona‑mi ti nasang kapala-kapala imang pang ung si manarangna i aluku tu Yahudi. Na pampalaui makàsona moa teꞌ, “Iaka nikianàking ti Datu: Pipasalamaꞌ ung niàluꞌ?”

⁵ Na sùmuinna‑mi se moa teꞌ, “I Yudea, i lipu: Betlehem. Sàbaꞌ mène:‑mo to ti ung nironno: mangola: nabi moa teꞌ,

⁶ ‘Dea ti lipu: Betlehem i pangalanna Yudea, moi supi:‑i, handei:-dei:‑da lipu: ung nihele supi:‑i i àlaꞌna tau ung muparenta i Yudea. Sàbaꞌ nai Betlehem nikianàking besa Tau ung mampidolung‑ing, pang mangkuyaꞌa taungKu tu Israel.’*”

⁷ Tòna pakorai:‑mo makàsona, Herodes mimmànaꞌ-mànaꞌ manghàngo to ung manarangna manghele i anaka hulang. Na kutikìna‑mi belo:-belo:, i sangkanna ti na ita‑i se ti anaka hulang to, mangking sua: te na pintokaꞌi.

⁸ Na suona‑mi lumao i Betlehem, pang na pasakiꞌ moa teꞌ, “Nao: se. Pingkutik‑ingko se belo:-belo: to Anaka to. Ìna u korai:‑mo se, paìsàngi‑rangkaꞌ se mai, mangking ku lumao‑ra:ko ho mampinombai‑I.”

⁹ Jadiꞌ, lumanna‑mi se. I pulummuna dalang, oꞌ na ita‑mi se pole ti anaka hulang, ung na ita‑i se dolung tempona soha: i Mata kùlaꞌ, mampidolung‑ing se deaꞌ tonto: sipumpa: kaoneangna Anaka to.

¹⁰ Haka:‑i se tungka tòna mangita‑mo anaka hulang to.

¹¹ Bùruꞌna‑mi se i rasangNa, mintama, pang na ita‑mi se ti Anaka to sola: Maria, dea‑mo inanNa. Mukalimuntuꞌna‑mi se tumunnuku minomba mao i Anaka to. Na hungkainna‑mi se ti aka ung na baha, pang na pinomba‑ing, dea‑mo bulahang, dupa ung nikonai: kemenyan, pang hingkùrang ung nikonai: mur.

¹² Mangulena‑ming se mao i lipuna, hampoꞌ mangola: dalang sintàna:, sàbaꞌ na pasakiꞌ Puang i laling pangipi mangking hang sumule:‑i se pole mao i Herodes.

Malai mao i Masir

¹³ Tòna kakarang‑mi se sumule: ti ung manarangna manghele i anaka hulang, besa malaikaꞌna Puang mampingèneꞌi Yusup i laling pangipi moa teꞌ, “Tèdeꞌ‑mo:! Baha‑mi ti Anaka ti sola: inanNa. Malai‑ko se mao i Masir, sàbaꞌ Herodes mampisuoa‑ming mangokaꞌ Anaka ti, pang na pateia. Leta:‑ko se one: deaꞌ u ku paìsàngi se pole matung.”

¹⁴ Tèdeꞌna‑mi ti Yusup, pang hengi dea to kakarang‑i se mao i Masir.

¹⁵ Leta:‑i se one: deaꞌ mate ti Herodes. Mène:‑mo to ti ung nipaara, siulaꞌ aka ti ung na pusua: Puang mangola: nabi moa teꞌ, “Ku manghàngoa AnakàKu nai Masir.”*

Nipateinna ti anaka ung si supi:‑i i Betlehem

¹⁶ A, to na ìsang‑mi Herodes moa teꞌ na tangkèdaꞌ ung manarangna manghele i anaka hulang, lalakàna‑mi tungka. Na piparentanna‑ming ti mampatei nasang anaka muane ung si idua‑i maang heaꞌna pàli polu, i pangalanna Betlehem, siulaꞌ tempo ung na pumakàso:‑ing tau ung manarangna manghele i anaka hulang.

¹⁷ Dea ti hùlingna anaka i Betlehem, mène: ho ti ung nipukauꞌ lùlung i lipu: Rama, mangkannaꞌi aka ti ung na padeaꞌ nabi Yermia dolung moa teꞌ,

¹⁸ “I Rama, nisàding ti moni sikàra-kàràki. Hatiꞌna Rahel mangkàràki ana-anakàna. Hang mio:‑i nipakatana, sàbaꞌ hari: hura: anakàna‑i se.”*

Sumule: nai Masir

¹⁹ Tempona mate‑mo ti Herodes, pang Yusup one: maang i Masir, besa malaikaꞌna Puang mampingèneꞌi Yusup i laling pangipinna.

²⁰ Malaikaꞌ to musua: moa teꞌ, “Tèdeꞌ‑mo:. Ala‑mi ti Anaka ti sola: inanNa, pang baha‑mi sumule: mao i Israel, sàbaꞌ mate‑mo ti tau ung mangaku: mampatei Anaka ti.”

²¹ Tòna tèdeꞌ‑mo ti Yusup, na baha‑mo ti Anaka to sola: inanNa sumule: mao i Israel.

²² Hampoꞌ na sàding moa teꞌ Arkelaus, anakàna Herodes, massònoꞌ amanna miluhali ung muparenta i Yudea. Jadiꞌ, Yusup mariaꞌ tùrung lumao. Tòna mangkorai:‑mo pasakiꞌ nai Puang i laling pangipinna, na pissàlana‑ming pang tùrung mao i pangalanna Galilea.*

²³ Onena‑mi i anto leta:, i lipu: Nasareꞌ.* Mène:‑mo to ti ung nipaara, tikannaꞌ‑mo ti aka ung na pusua: pira-pira nabi moa teꞌ Datu: Pipasalamaꞌ nikonaia tu Nasareꞌ.*