Markus 7 - Pangàlu' Baru Sura'na Puang i laling sua: tu Padang

Parentanna Puang pang adaꞌna ampe-ampena tu Yahudi

¹ Ara pimbesa Yesu na pukobui: tu Parisi sola: pira-pira ung si manarangna i aluku tu Yahudi sipolai: nai Yerusalem.

² Mangita‑i se pira-pira pasikolana Yesu manne:, mampake kangkang ung si burere, dea‑mo manne:‑mi se dang miase:‑kang siulaꞌ adaꞌna ampe-ampena‑i se.

^3-5 Deanna‑mo to, mingkutiki‑i se mao i Yesu moa teꞌ, “Mangaka ti pasikolaMu to, manne: dang miase:‑kang? Aka pu dang na mantoroꞌi‑i dasse: adaꞌna ampe-ampeta?” Sàbaꞌ tu Parisi pang nasang tu Yahudi ung si manuruꞌ, mangulaꞌ adaꞌna ampe-ampena‑i se. Dea‑mo, na pimalii‑i dasse: ti manne: i dang miase:‑kàngi. Pang aka ti ung na ala‑i se nai pasaꞌ, hang na anne:‑mi se i dang niase:‑kai:. Pang boso: atorang sintàna: nai ampe-ampena ung na tokaꞌ pàraꞌ‑i se, mène: cara mangasei: enùngang, anneang, parewa dapoꞌ sintàna: ung nai tembaga, pang kaoneang maturu manne:.*

⁶ Na sùmuinna‑mi Yesu moa teꞌ, “E tau ung si tangkasi:, mampatu: dio se, malleo: tungka ti ung na pupihuyang nabi Yesaya, ung nironno: i Suraꞌna Puang moa teꞌ, ‘TaungKu te, i beuna teng ti Ku na sangadi, hampoꞌ i laling pinanahanna‑i se Ku na keboꞌi.

⁷ Hari: palleona Ku na pinombai‑i se, sàbaꞌ atorangna tulino ti ung na pipaturo:‑ing se, na konai: pipaturo: ung nai Koi:.’*

⁸ Parentanna Puang u pakaliung se teng, pang atorangna tulino u tokaꞌ pàraꞌ se.

⁹ U manarang‑mo se tungka mantumpaꞌ parentanna Puang, mangking u tùrung se teng i atorangmu se,

¹⁰ pambàtiꞌ ladu‑mo u na padeaꞌ‑ing se Musa te parenta tee moa teꞌ, ‘Sangadi‑i ti amammu pang inammu!’* pang, ‘Isai-sai ti ung mampusua: kadetu amanna dea‑raka inanna parallu nipatei.’*

¹¹ hampoꞌ u konai: se teꞌ, ‘Ìna tau musua: mao i tudolunna teꞌ, Aka ti àla: ung ku hengi‑ingko se, ku turo:‑mo miluhali kurban (palleona pinomba mao i Puang).*

¹² baꞌ ha mading‑i hura: ti kurban to, na pampulemu‑ing tudolunna.’ U konai: se teꞌ, ‘Pumali‑mo, sàbaꞌ na pinomba‑ming mao i Puang.’

¹³ Jadiꞌ, nai atorangmu se teng ti ung nu kasiossoꞌ‑ing, u hùlìngi‑mo se ti pusuana Puang. Boso: kang ti ung mène: te ung nu pukauꞌ se.”

¹⁴ Na hàngona‑mi pole Yesu ti tau boso: pang musua: moa teꞌ, “Pisàdìngi‑ko se nasang, mangking u pahang‑ko se ti tee!

¹⁵ Hari:‑da aka ung nai sòhongna ung mintama i tau hela mamburerei‑i. Sangadinna, sua:-sua: ung missòhong nai tau, dea‑mo to ti ung mamburerei‑i. [

¹⁶ Isai ti ung kitalinga, na pisàdìngi‑i!]”

¹⁷ Tòna mintama‑mo i rasang ti Yesu, mampalii: tau boso: to, mingkutiki ti pasikolaNa mao i Yesu, mampingkutik‑ing palleona rampeang i langena:.

¹⁸ Misùmunna‑mi ti Yesu mao i dei: se moa teꞌ, “Ha mintama‑mi ho naꞌ i tangaꞌmu se? Ha u pahang‑mo: se naꞌ moa teꞌ ung mintama i takona tau ha hela‑i mamburerei tau to?

¹⁹ Sàbaꞌ ung mintama to, hang mangola:‑i pinanaha, sangadinna mangola: balammang pang tùrung missòhong.” (Sua:-suana Puang Yesu to mampumakàso: moa teꞌ nasang ung niannena hang nipiapuꞌ‑ing.)

²⁰ Na konai: ho Yesu teꞌ, “Ung missòhong nai pinanahanna tau, dea‑mo to ti ung mamburerei‑i.

²¹ Sàbaꞌ nai laling, dea‑mo nai pinanahanna, sòhong ti tangaꞌ-tangaꞌ ung kadetu ung mambùruꞌ‑ing tau to mampukauꞌ ung dang belo:, dea‑mo kauꞌ ung sikalantùki, mumanau, mupatei,

²² malahang, lammuꞌ inaha, bulituku, mutangkasi:, kihulu atena, mapaꞌ, mampusua: kadetu tau sintàna:, patiapaꞌ, pang mapantangaꞌ ung bebe.

²³ Nasang ung kadetu to, sòhong nai laling pinanaha, pang dea‑mo to ti ung mamburerei tau.”

Bahine tu Siria Penisia ung mupatongang

²⁴ Kakarangna‑mi ti Yesu nai anto pang lumao i pangalanna kaparentaangna lipu: Tirus. Mintama i besa tamming pang hang mio:‑I àla: ara tau ung mangìsang‑I, hampoꞌ kaoneangNa hang hela‑i nihuni‑ing.

²⁵ Mala, ara sule: besa bahine, na sàdingna‑i ti Yesu, lumanna‑mi pang mukalimuntuꞌ tumunnuku i kokoꞌNa.

²⁶ Bahine to handei: tu Yahudi, hampoꞌ tu Siria Penisia. Mingkalemu mao i Yesu mangking mampasahu dihata bulituku nai anakàna bahine.

²⁷ Musuana‑mi ti Yesu mao i bahine to mampake rampeang moa teꞌ, “Eloꞌna‑mo boro‑kang ti ana-anaka, sàbaꞌ hang sipatu:‑ida mangala kinanne: ung niàna:‑ing ana-anaka pang nitammo‑ing asu.”*

²⁸ Hampoꞌ na sùmui bahine to moa teꞌ, “Tongang Tuang. Hampoꞌ tòna manne: ti anaka, asu ung i hoiꞌna meja mading‑da ho manganne: ung sikàda:.”

²⁹ Musuana‑mi ti Yesu mao i bahine to moa teꞌ, “Sàbaꞌ sua:-suamu to ti, dihata bulituku malai‑mo nai anakàmu. Jadiꞌ, nàmo:!”

³⁰ Mangulena‑ming mao i tammingna. Na kabùruꞌinna‑mi ti anaka to, mànaꞌ maturu i paturuang, pang dea to dihata bulituku malai sìda‑moda. Hari: hura:.

Yesu mampakulii: tau ung pidaꞌ liu

³¹ Kakarang‑mi se ho ti Yesu nai pangalanna kaparentaangna Tirus mangola: i pangalanna Sidon, lumao i Tasiki Galilea, mangola: lummu: i Dekapolis.

³² Tau i anto mambaha besa muane ung pidaꞌ liu pang ung dang sapata ho musua:, mao i Yesu, mingkalemu mangking nipumatalete:.

³³ Na saràkinna‑mi Yesu nai tau boso:. Na patama ti hùngang kangkangNa i talinganna tau to. MitangkudunNa‑mi mao i hùngang kangkangNa, pang Na pake marrupaꞌ lilana tau to.

³⁴ Tumongana‑mi ti Yesu, marriuꞌ pinanahanNa, pang musua: mao i tau to moa teꞌ, “Efata!”* palleona, “Tuhangka‑ko!”

³⁵ Tuhangkanna‑mi ti talinganna tau to, salihùraꞌ ho ti ung mangkapuꞌ lilana, pang marrara‑mo makàso: musua:.

³⁶ Mupasakiꞌna‑mi ti Yesu mao i tau i anto, “Hau mupatidoluang se mao i isai-sai.” Hampoꞌ sa: niapuꞌ-apuꞌna‑i se, sa: mupatidolu-doluangna‑i se.

³⁷ Mimàha‑i se tungka pang musua:‑i se moa teꞌ, “Nasang ung Na pukauꞌ, belo:. Moi ung pidaꞌ Na pupiluhali pasàding, moi ung bebe Na pupiluhali musua:.”