Markus 2 - Pangàlu' Baru Sura'na Puang i laling sua: tu Padang

Tau ung na kosu nipumatalete:

¹ Tòna liung‑mo pira-pira àlona, tempona Yesu bùruꞌ pole i lipu: Kapernaung, dumallaꞌ ti kareba moa teꞌ Yesu mangule:‑ming.

² Bùruꞌna‑mi ti tau boso:, dea pùna hari: hura: kaoneang, moi deaꞌ mao i baba:. Dea ti Yesu tarrang mampusua: suana Puang mao i tau to‑i se,

³ aranna‑mi ùpaꞌ tau bùruꞌ mangkoha: tau ung na kosu.

⁴ Hampoꞌ hang hela‑i na patùrung‑i se mao i Yesu, sàbaꞌ bosona tau. Deanna‑mo to, na lanto‑ing se mao iahona atuꞌ, pang nipuràbai:‑ing to ung mampumpa: Yesu. Tòna tuhangka‑mo, na uluꞌ‑i se sola: alena ti tau ung na kosu to.

⁵ To na ita‑mo Yesu ti kapatongangangna‑i se, musuaNa‑mi mao i tau ung na kosu to moa teꞌ, “O anàKu, nipantengkai:‑ming ti kasalaangmu.”

⁶ Sileo: i anto mesong ti pira-pira ung si manarangna i aluku tu Yahudi. Mingkutiki‑i se i laling pinanahanna moa teꞌ,

⁷ “Baeh! Aka pùna musua: mène: to te Tau te? mampaihoiꞌ Puang? Isai ti ung hela mampantengkai:‑ing dosa i dang dei: Puang?”

⁸ Hampoꞌ na ìsang sahe: Yesu i laling pinanahanNa moa teꞌ mantangaꞌ mène:‑i se to. Tùrung musuaNa‑mi moa teꞌ, “Aka pu u mantangaꞌ mène: se to i pinanahammu se?

⁹ Umma ti ung madàli, mampusua: mao i tau ung na kosu tee moa teꞌ, ‘Kasalaangmu nipantengkai:‑ming’? dea‑raka, ‘Tèdeꞌ‑mo:! Lolong ti alemu pang mammulao‑mo:.’

¹⁰ Hampoꞌ mangking u ìsang se moa teꞌ i laling lino tee makuasa ti Anaka Tulino mampantengkai:‑ing dosa” — musuaNa‑mi mao i tau ung na kosu to teꞌ —

¹¹ “Ku pusua: matung teꞌ, Tèdeꞌ‑mo:! Lolong‑mi ti alemu pang sumule:‑mo: mao i rasangmu.”

¹² Tèdeꞌna‑mi ti tau to, na pasianu mallolong alena, pang tùrung missòhong i heleꞌna tau to‑i se. Mimàhanna‑mi se nasang pang mampaiaho Puang. Musuana‑mi se moa teꞌ, “Ung mène: tee, hang ara‑mi ta ita.”

Lewi, tupassima, mangulaꞌ Yesu

¹³ Ladu nai anto, lumao pole i minanaꞌ tasiki ti Yesu. Bùruꞌna‑mi ho ti tau boso:. Mupaturona‑mi ti Yesu.

¹⁴ Tempona mammulao liung i anto, mangita besa tupassima ung nikonai: Lewi anakàna Alpeus, mesong i kantoroꞌ sima. Musuana‑mi ti Yesu moa teꞌ, “Hàmo:, ulaꞌ‑Kaꞌ.” Tèdeꞌna‑mi pang mangulaꞌ‑I.

¹⁵ Nai anto, lumai: se i tammingna Lewi. Tòna manne:‑mi se, boso: tupassima pang tau sintàna: ung niàna: si madosa manne: sola: Yesu pang pasikolaNa, sàbaꞌ boso: tau ung si mène: to mangulaꞌ‑I.

¹⁶ Na ita ung si manarangna i aluku nai tu Parisi moa teꞌ Yesu manne: sola: tupassima pang tau sintàna: to, mingkutikìna‑mi se mao i pasikolaNa moa teꞌ, “Oꞌ, aka pùna manne:‑da ti Yesu sola: tau ung si madosa, dea‑mo tupassima pang tau sintàna:?”

¹⁷ Na sàding Yesu ti pingkutìkangna‑i se to, pang Na sùmui moa teꞌ, “Handei:‑da tau ung matalete: ti ung mamparallui pumpakuli:, sangadinna tau ung mipanaꞌ‑da. Hang bùruꞌ‑Kaꞌko mai manghàngo tau ung mangàna: kalaena tongang, sangadinna tau ung mangakui kalaena madosa.”

Ha mapuasa‑i ti pasikolaNa ìna sola: maang Yesu

¹⁸ Ara pimbesa pasikolana Yohanes Pumpudoiꞌ pang tu Parisi mapuasa. Aranna‑mi tau ung mao i Yesu pang mingkutiki‑i se moa teꞌ, “Aka pùna mapuasa ti pasikolana Yohanes Pumpudoiꞌ pang pasikolana tu Parisi, hampoꞌ pasikolaTa hari:?”

¹⁹ Na sùmui Yesu moa teꞌ, “Tempona pampukauꞌ kasilopàkang, u kapang se naꞌ mapuasa ti tau ung si nihàngo? Ìna sola:‑i se maang to lopaka muane, manassa manne:‑i se.

²⁰ Hampoꞌ araa tempona to lopaka muane niala makarraꞌ nai àlaꞌna‑i se. Onea‑rang i anto, na mapuasa‑i se.”

Pipaturona Yesu sikeboꞌi kabiasaang nai dolung

²¹ “Hari:‑da tau ung mampatapei: kayaꞌ ung manno: mampake pantariꞌang ung hola: ung dang niase:‑kang, sàbaꞌ tikùròka‑da i da niase:‑kàngi, mambùruꞌ‑ing sa: baluaꞌ-luaꞌna ti maseuna.

²² Mène: ho ti anggoroꞌ ung màle. Hari:‑da tau ung mangàna: mao i kantong kuliꞌ ung manno:‑mo, sàbaꞌ sàpaa ìna sumangkaꞌ, mambùruꞌ‑ing nai iduanna maruki. Jadiꞌ, anggoroꞌ ung baru parallu‑da ho niàna: i kantong kuliꞌ ung baru.”

Tu Parisi mampasala: pasikolana Yesu sàbaꞌ mingkamaꞌ i àlo kapillìheang

²³ Ara sangàlo, àlo kapillìheang, Yesu sola: pasikolaNa mangola: i kinete: gandum, pang dea ti pasikolaNa mampùruꞌ gandum.

²⁴ Musuana‑mi ti tu Parisi mao i Yesu moa teꞌ, “Hele‑mi! Aka pùna mampukauꞌ‑i se ung nipimalii i àlo kapillìheang?”

²⁵ Na sùmui Yesu moa teꞌ, “Hara‑mo: se naꞌ mambasa aka ti ung na pukauꞌ dolung Daud pang solana, tòna masussa pang na lampiꞌ burorang?*

²⁶ Mintama ti Daud i pangàloangna Tenda Kabussùngang tempona Abyatar miluhali Kapala Imang* mampalau roti. Hampoꞌ hari: roti sangadi roti ung nipinomba‑ming, ung nipimalii na anne: tau sangadi imang-imang. Na anne: pang na kàlaꞌ-kàlaꞌ‑ing ho mao i solana. Moi na mène: to, hang niàna:‑i ung masala:, sàbaꞌ kamasussaang.”

²⁷ Musuana‑mi pole ti Yesu mao i tu Parisi moa teꞌ, “Àlo kapillìheang nipaara mao i tulino, handei:‑da tulino nipaara mao i àlo kapillìheang.

²⁸ Jadiꞌ, Anaka Tulino makuasa ho mao i àlo kapillìheang.”