Markus 16 - Pangàlu' Baru Sura'na Puang i laling sua: tu Padang

Yesu tuho: pole

¹ Tòna liung‑mo ti àlo kapillìheang, dea‑mo i pihengi àlo Sattu, Maria tu Magdala pang Maria inanna Yakobus, sola: Salome mambalaꞌ‑i se hingkùrang, na panghingkùràngiing se hatang puntinna Yesu.

^2-4 I miluhengi àlo parara mingku to, mingkakaꞌ‑i se mao i kaburuꞌ. Silàha:-làha:‑i se moa teꞌ, “Isaia‑moda ti ung mampalloliing‑ke se hatu deꞌ, nai babana kaburuꞌ?” Tòna dùkuꞌ‑mi se i kaburuꞌ, màli: sòhong ti kùlaꞌ. Hampoꞌ to na hele‑mi se, tiloli‑mo to hatu.

⁵ Mintamanna‑mi se i laling kaburuꞌ to, mangita‑i se muane ung mangura mampake juba ung mabusa:, mesong mui konang. Tipadàlaꞌna‑mi se.

⁶ Hampoꞌ tau to musua: moa teꞌ, “Hau mariaꞌ se! Ku ìsang moa teꞌ u mangokaꞌ se Yesu tu Nasareꞌ, to ung nipai oròngang. Tuho:‑moDa pole. Hari:‑Da hura: inne:. Hele‑ko se! I antee ti niloling‑I.

⁷ Hampoꞌ nàmo: se! Patidolu‑ingko se mao i pasikolaNa, pang mao ho i Petrus, moa teꞌ, ‘Dolùnga‑Da one: i Galilea. I anto u itaa se, mène: ung ladu Na pusua: matung.’ ”

⁸ Missòhongna‑mi se pang ràha malai nai kaburuꞌ, sàbaꞌ mimàha pang mariaꞌ‑i se. Ha musua:-sua:‑i se mao i isai-sai, sàbaꞌ lupu mariaꞌ. [

Tampakàna Suraꞌ Markus ung nironno: lùlung, pìniꞌna mène: tee, Yesu mampupiita kalaeNa mao i Maria tu Magdala

⁹ Tòna tuho:‑mo pole ti Yesu, mingkakaꞌ i miluhengi àlo parara mingku to, mampupiita kalaeNa ung parrara mao i Maria tu Magdala, ung Na salokaꞌi‑mo nai pitu dihata bulituku. Na padeaꞌ sahe: bahine to‑i se nasang ti pasakiꞌ to mao i Petrus pang sola:-solana.*

¹⁰ Lumanna‑mi ti bahine to, mao i tau ung lupu sipolai: Yesu, ung tarrang masussa pang kumàraka, pang mampaìsàngi moa teꞌ, Ladu nai anto, Yesu kalenanna ti ung massahuꞌ, mangola: pasikolaNa, kareba kasalamaꞌang ung nai Puang pang ung dang ara katampàkangna, mao i lìliꞌna lino.]

¹¹ “Tuho: pole ti Yesu pang ku siita‑moko.” Hampoꞌ to na sàding‑mi se, hang na patongang‑i se.

Yesu mampupiita kalaeNa mao i idua tau

¹² Ladu nai anto, Yesu mampupiita kalaeNa i laling rupa ung laing mao i idua tau ung mangulaꞌ‑Mi, tòna tarrang i pammulaoangna‑i se nai lipu: Yerusalem.

¹³ Sumulena‑mi se pang mampaìsàngi solana sintàna:, hampoꞌ ha na patongang‑i se ho.

Yesu mampupiita kalaeNa mao i pasikolaNa pang mampantuyu‑i se

¹⁴ Tampàkang, Na pupiita ho ti kalaeNa mao i sampulo: besa pasikolaNa, tòna tarrang‑i se manne:, pang Na ràho moa teꞌ, “U kapala batu se. Aka pu dang nu patongang‑ko se ti tau ung mangita‑Maꞌ tòna Ku tuho:‑mo pole?”

¹⁵ Masai-sai nai anto, Na musua: moa teꞌ, “Nao: se i lìliꞌna lino! Pakareba‑ko se ti Kareba Belo: mao i nasang tulino!

¹⁶ Isai ti ung mupatongang pang nidoiꞌ, nipasalamaꞌa. Hampoꞌ isai ti ung dang mupatongang, nihukùnga i lino i hunni.

¹⁷ Miluhali butti, isai ti ung mupatongang, nihengi‑ing kuasa. Araa ung mampasahu dihata bulituku mampake konaKu, araa ung musua: i laling sua:-sua: ung màle mao i dei: se.

¹⁸ I ari: na mantokaꞌ talubammaꞌ, dea‑raka mangenung rasung, hang mangkoraii: se masolang. Araa ung mantokaꞌ tau ung mipanaꞌ pang tau to mataletea.”

Yesu titengke: mao i suruga

¹⁹ Tòna ladu‑mo musua: ti Puang Yesu mao i pasikolaNa, titengke:‑mo mao i suruga, pang mesong mui konangna Puang Matua.

²⁰ PasikolaNa lumao‑mo mampadeaꞌ Kareba Belo: pai lipu: iaka-aka, pang na terei Puang, ung manghengi‑ing kuasa mampukauꞌ kalle-kalleang mampupiita moa teꞌ tongang to ung na pakareba‑i se.] [