نامەێ فیلیپییل 3 - کتاب مقدس به زبان کردی جنوبی - گویش کلهوری

نادرسێ پشت بەساین وه شانازی ئنسانی

¹ دەس ئاخر ئێ برايلم، وەناو خوداوەند دڵشاد بوین! نویساین هەر ئەو چشتیله ئەڕادان، زامەتێگ ئەڕام نێری بەڵکەم ئەڕا ئەمن بین ئیوەس.

² له ئەو گەماڵیله دویرەو بگرن، له ئەوانه که کارێان شەڕئاشویه، دویرەو بگرن! له ئەو کەسیلێ که ئەڕا خەتەنه، جەسه بڕن دویرەو بگرن!

³ چوینکه خەتەنه کریایل ڕاسەکانی ئیمەیم که وەگەرد روح خودا، پەرەسش کەیمن و شانازیمان وه مەسیح عیساس و پشت نیەوەسیمنه جەسه،

⁴ هەرچەن مه خوەم مدو خاسێگ ئەڕا پشت بەساین وه جەسه دێرم. ئەگەر کەسێگ تر خیاڵ کەید که مدو خاسێگ ئەڕا پشت بەساین وه جەسه دێرێ، من فرەتر دێرم:

⁵ خەتەنه کریاێ له ڕوژ هەیشتم، له قەوم ئێسرائیلم، له هوز بنیامین، مناڵ عبرانی له داڵگ و باوگ عبرانیم؛ له باوەت شەریعەت، له فرقەێ فەریسی؛

⁶ له باوەت غیرەت، ئەزیەتکەر کلیسا؛ له باوەت سالح بوینی که له شەریعەتەو تێد، بی نەخسم.

⁷ وەلێ هەر چشتێگ که ئەڕا مه فایده بی، وەبونەێ مەسیح زیان ژماردم.

⁸ وەڕاسی گشت چشتێگ وەبونەێ ناسین خوداوەندم مەسیح عیسا که باێەختر له هەر چی چشته، زیان ژمارم. وەبونەێ ئەیو گشت چشتێگ له دەس دامه و هەر جور گناڵخه وه حساو تیەرم تا مەسیح وه دەس بارم و

⁹ وەناو ئەیو پەێا بوم، نه وەگەرد سالح بوین خوەم که له شەریعەته، بەڵکەم وەگەرد ئەو سالح بوینه که له ڕێ ئیمان وه مەسیح وه دەس تێد، ئەو سالح بوینه که له خوداس و وه ڕوی ئیمانه.

¹⁰ تا مەسیح و هێز زنیەو بوینی بناسم و وەناو رەنجیل ئەیو بەشدار بوم و وەناو مردنێ هاوشیوەێ بوم،

¹¹ تا وه هەر ڕێیگ که بیه، زنیەو بوین له مردگیل وه دەس بارم.

ئەڕا وه ئامانج ڕەسین تەقالا بکێن

¹² نیویشم هەر ئێرنگەیش ئیه وه دەس هاوردمه یا هەر ئێرنگەیش کامڵم، بەڵکەم خوەم وەرەو نوا ڕانم تا چشتێگ وه دەس بارم که مەسیح عیسا ئەڕا ئەوه مه کردێەسه هن خوەێ.

¹³ برایل، گومان نیەکەم که ئەوه وه دەس هاوردویم وەلێ یەێ کارێ کەم و ئەوه ئیەسه که ئەو چشته که ها له دویاوه له هویر خوەم بەم و وەرەو ئەو چشته که ها وەرەڕوی خوەم کیشمه نوا،

¹⁴ ئەڕا وه ئامانج ڕەسین تەقالا کەم، تا خەڵاتێگ وه دەس بارم که خودا ئەڕا ئەوه مه وەناو مەسیح عیسا دەنگ کردێەسه بان.

¹⁵ بیل تا ئەوانه که وەناومان بازڵەن، ئیجوره فکر بکەن؛ و ئەگەر له باوەت چشتێگ یەێ جورتر فکر کین، ئیەیشه خودا ئەڕا ئیوه ئاشکراوه کەێد.

¹⁶ تەنیا بیلن له باوەت حەقیقەتیل روحانی، وه هەر چشتێ که ڕەسیمنه، ڕێ رەوشتمان وه پێ ئەوه بود.

¹⁷ ئێ برایل، وەگەرد یەکا له منا نمونه بگرین و بنوڕنه کەسیلێگ که ڕێ رەوشتیان وه پێ نمونەێگه که دایمنه پێدان.

¹⁸ چوینکه هەر ئەوجورە که چەن جار وه ئیوه وەتمه و ئێرنگەیش ئەسر ڕشنم و ئویشمه پێدان، ڕێ رەوشت قێر فرەێگ هەر جور دشمەنیل سەلیب مەسیحه.

¹⁹ ئاخر ئەوانه له بین چینه. خوداێ ئەوانه زگێانه و وه چشتیل نەنگ هاوەرێان شانازی کەن و فکریلێان ها بان چشتیلێگ که هن زەوین.

²⁰ وەلێ نیشتمان ئیمه ئاسمانه و وه تاسەێ تەمام چەوەڕێم که نجات دەر، یانێ خوداوەند عیسا مەسیح، له ئەورە ئاشکرا بود.

²¹ ئەیو وه هێزێ که تویەناێ ئەوه دەێەپێ تا گشت چشتێگ وه فەرمان خوەێ دەر بارێد، جەسەێ سوکمان که له بین چود گویڕنیدەو تا وه شێوەێ جەسەێ پڕ جەڵاڵ ئەیو دەر باێ.