نامەێ فیلیپییل 2 - کتاب مقدس به زبان کردی جنوبی - گویش کلهوری

نمونه گردن له بێ فیسی مەسیح

¹ جا ئەگەر وەناو مەسیح دڵگەرمین، ئەگەر مابەتەگەێ مایەێ دڵنەواییدانه، ئەگەر وەناو روح خودا هاوبەشین و ئەگەر مێرەبانی و هاودەردی دێرین،

² جا خوەشی مه وه کەماڵ برەسنێن و وەگەرد یەکترەکی هاوفکر بوین و مابەت ڕوی وه ڕوی بیاشتوین و یەێ دڵ و یەێ فکر بوین.

³ هویچ کارێگیش له سەر جێخوازی یا لویتبەرزی نەکەن، بەڵکەم وه بێ فیسەو ئەو باقی مەردم له خوەدان خاستر بزانن.

⁴ هویچکام له ئیوه تەنیا وه فکر قازانج خوەێ نود، بەڵکەم وه فکر قازانج ئەو باقی مەردمیش بود.

⁵ وەناودان هەر ئەو فکره بود که مەسیح عیسا داشت:

⁶ ئەیو که هاوشیوەێ خودا بی، له بەرابەری وەگەرد خودا وه نەف خوەێ باره نەگرد،

⁷ بەڵکەم خوەێ خاڵی کرد و شێوەێ خوڵام گرده خوەێ، وه وێنەێ ئایەمیل دەرهات.

⁸ جا وەختێگ که شێوەێ بەشەر گرده خوەێ خوەێ هاورده خوار و تا وه مردن، تەنانەت تا وه مردن له بان سەلیب گوش تەکن بی.

⁹ وەبونەێ ئیه خودا فره فره بەرزیەو کردێه و ئەو ناوه داسه پێ که سەرتر له گشت ناویله،

¹⁰ تا وه ناو عیسا هەر زرانیێگ بچەمێدەو وەناو ئاسمان، وه بان زەوی وه ژێر زەوی،

¹¹ و هەر زوانێگ ئێقرار بکێ که عیسا مەسیح ’خوداوەنده‘ ئەڕا جەڵاڵ ’خوداێ باوگ‘.

نویرانی هەر جور هەسارەیل

¹² جا ئێ عەزیزەیلم، هەر ئەوجورە که هەمویشه گوش تەکانینه، ئێرنگەیش نه تەنیا وەختێگ که هامه لادان، بەڵکەم فره فرەتر وەختێ له لادان نیم، نجات خوەدان وه ترس و لەرزەو بگرنه کار؛

¹³ چوینکه خوداس که ئەڕا خوەشنودی خوەێ وەناو ئیوه کار کەید، هەم وەناو خاست و هەم وەناو کردەوه.

¹⁴ هەر کارێگیش بی خوتەخوت یا قسیه و باس وەجێ بارن،

¹⁵ تا بیتاوان و ساده دڵ و مناڵیل بی نەخس خودا بوین، وەناو نەتەوەێ گەنیاێ و له ڕێ دەرچی که وەناو ئەوانه هەر جور هەساریل وەناو ئی جهانه درەوشین،

¹⁶ هەر ئەوجورە که قورس لچکیاینەسه کەڵام زنەیی؛ تا ئیجوره وەناو ڕوژ هاتنەوەێ مەسیح شانازی بکەم که وه هویچ پەتی نەدەویم یا وه هویچ پەتی مینەت نەکیشامه.

¹⁷ تەنانەت ئەگەر هەوەجی وه ئیه بود که خوین مه هەر جور شراو پیشکەش کریاێ، وه مل پیشکەشی قوروانی ئیماندان بڕشێید، وەناو وه جێ هاوردن ئی کاره خوەشاڵم و وەگەرد گشتدان خوەشی کەم.

¹⁸ ئیوەیش باێه هەر ویجوره خوەشاڵ بوین و وەگەردمەو خوەشی بکێن.

تیموتاوس و ئپافرودیتوس

¹⁹ وەناو خوداوەند عیسا ئمید دێرم که تیموتاوس وه ئی زویه کل بکەمه ئەڕا لادان تا منیش وه ئاگاداری له حاڵ حەواڵدان دڵشادەو بوم.

²⁰ چوینکه کەسێگ تر جور ئەوه نێرم که وه دڵپاکیەو نگران ئاشاسێگدان بود.

²¹ ئەڕا ئیه که ئەوانه گشتێان هانه شون نەف خوێان، نه نەف عیسا مەسیح.

²² وەلێ ئیوه زانين که تیموتاوس ئەزمون خوەێ داسەو، چوینکه وەگەردمەو، هەر جور کوڕێگ وەگەرد باوگ خوەێ، وەناو کار ئینجیل خزمەت کردێه.

²³ جا ئمید دێرم هەر ئیەک بوینم کاروبارم بوده چه، ئەوه کل بکەمه ئەڕا لادان؛

²⁴ وەناو خوداوەند دڵنیام که خوەمیش و ئی زویه تیەم.

²⁵ ئیجوره فکر کردمه که واجوه تا ئپافرودیتوس کلەو بکەمه ئەڕا لادان، ئەوه له یەێ لا برا و هاوکار و هاورەزم خوەمه و له لاێگترەو، کل کریاێ و خزمەتکاردانه ئەڕا سەرسامان داین هەوەجیێلم.

²⁶ چوینکه تاسەێ دین گشتدان دێرێ و له باوەت ئیەک شنەفتین نەخوەش کەفتوی، پەشێوه.

²⁷ وه ڕاسی که نەخوەش بی و تەنانەت نزیک بی بمرێ. وەلێ خودا بەزیێ هاته پێ، نه تەنیا وه ئەوه، بەڵکەم وە منیش، تا نەخواێ خەمێگتر باێده مل خەمم.

²⁸ جا ئەڕا کل کردنێ تاسەێ فرەترێگ دێرم تا یەێ جارتر له دینێ دڵشادەو بوین و له پەشێوی منیش کەمەو بود.

²⁹ جا وەناو خوداوەند، ئەوه وه خوەشی تەمام قەبوڵێ بکێن و حرمەت ئیجور کەسیلێگیش بیاشتوین،

³⁰ چوینکه ئەڕا کار مەسیح تا نزیک مردن چيه نوا و ئەڕا جبران کەم کەسری خزمەتەگەدان وه مه، گیان خوەێ خسته خەتری.