نامەێ فیلیپییل 1 - کتاب مقدس به زبان کردی جنوبی - گویش کلهوری

¹ له پولوس و تیموتاوس خوڵامیل مەسیح عیسا، ئەڕا گشت موقەدەسیل که هانه ناو مەسیح عیسا له شار فیلیپی، وەگەرد هێوەتکەریل و شەماسەیل:

² فیز و ئاشتی و سڵامەتی لەلاێ خودا، باوگ ئیمه و خوداوەند عیسا مەسیح، وەگەرددان بود.

سپاس خودا و دوعا

³ هەر وەخت تیەرمەدانه هویرم، سپاس خوداێ خوەم کەم.

⁴ هەمویشه وەناو گشت دوعایلم ئەڕا گشتدان وه خوەشی دوعا کەم،

⁵ وەبونەێ ئیه که له یەکم ڕوژه تا ئیسه، وەناو کار ئینجیل هاوبەش بوینه.

⁶ وه ئیه دڵنیام ئەیو که کار خاسێگ وەناودان خسته ڕێ، ئەوه تا وه ڕوژ هاتنەوەێ عیسا مەسیح وه کەماڵ رەسنێد.

⁷ من حەق دێرم که له باوەت گشتدان ئیجور ئافتوهەستێگ بیاشتویم، ئەڕا ئیه که ئیوه هاینه ناو دڵم؛ چوینکه گشتدان وەگەردمەو وەناو فیز خودا بەشدارین، چ وەناو زندان بوم و چ خەریک دەفا و مور بین ڕاس درسی ئینجیل.

⁸ خودا شاێەتمه که چەنێ وه مابەت مەسیح عیسا، تاسەێ گشتدان دێرم.

⁹ دوعای مه ئیەسه که مابەتدان فره فرەوه بود و وەگەرد ناسین و فام کامڵێگەو هاوڕێ بود،

¹⁰ تا خاسترین چشت بناسین، تا ئەڕا ڕوژ هاتنەوەێ مەسیح، پاک و بی نەخس بوین و

¹¹ پڕ بوین له بەر سالح بوین، که له ڕێ عیسا مەسیح دەێدەدەس و رەسده جەڵاڵ و ستایش خودا.

زنجیریل پولوس و تەفرتوینا کردن ئینجیل

¹² ئێ برایل، توام بزانین ئەو چشته که هاتیەسه سەرم، وه ڕاسی ئەڕا وه نوا بردن ئینجیل، مەیەت داس،

¹³ جوری که وه گشت نگابانیل کاخ سەڵتەنەتی و ئەڕا گشتیەکیگ دیار داس که مه وەخاتر مەسیح هامه ناو زندان؛

¹⁴ فره له برایل وەخاتر زندانی بینم، وەناو خوداوەند دڵ قورسەو بین تا وه ئازای فرەێگەو کەڵام خودا بی هویچ ترسێگ بویشن.

¹⁵ وه ڕاسی بڕێگ له ڕوی حەسویی و هاوماڵی، مەسیح بانگەوازی کەن، وەلێ بڕێگتر وه نیەت خاسێگ.

¹⁶ دەسەی دویم له ڕوی مابەت ئی کاره کەن، چوینکه زانن که مه ئەڕا دەفا له ئینجیل کەفتمەسه ئێرا.

¹⁷ ئەو دەسەی یەکمه له ڕوی جێخوازی مەسیح بانگەوازی کەن، نه وه نیەت خاس، بەڵکەم فکر کەن وەئیجوره بەردیل مه وەناو زندان فرەوه کەن.

¹⁸ جا چه؟ تەنیا ئیه که وه هەر لەونێگ، مەسیح بانگەوازی بکرێید چ وه نیەت نادرس، چ درس! و من وه ئی بونه خوەشاڵم. ئەرێ، خوەشاڵیش بوم،

¹⁹ چوینکه زانم که له ڕێ دوعایل ئیوه و مەیەت روح عیسا مەسیح، ئیه بوده بایس ڕزگاریم،

²⁰ هەر ئەوجورە که وه تاسەوه چەوەڕێم و ئمیدوارم که وە هویچ چشتێگ شەرمزار نیوم، بەڵکەم وه کەماڵ ئازای، ئێرنگەیش جور هەمویشه، مەسیح وەناو جەسەم جەڵاڵ پەێا کەی، تواێ زنی بوم یا بمرم.

²¹ چوینکه ئەڕا من زنەیی کردن مەسیحه و مردنیش سود.

²² ئەگەر باێه وەناو جەسه زنەیی بکەم، ماناێ ئیەسه که کار پڕ بەر فرەێگ کەم. وه ئی حاڵەو نیەتویەنم بویشم کامێ هەڵوژنم.

²³ له ناو ئی دوانه سەخت هامه کیشکاشا: ئاوەختی دێرم له ئی دنیا بچم و وەگەرد مەسیح بوم، چوینکه ئیه فره خاستره؛

²⁴ وەلێ وەبونەێ ئیوه مەننم وەناو جەسه واجوتره.

²⁵ چوینکه وه ئی چشته دڵنیام و زانم که ئەڕا وەرەو نوا چین و خوەشیدان وەناو ئیمان، مینێدەم و وەگەرد گشتدان دەمێ سەر،

²⁶ تا وەگەرد وەدواره هاتنم ئەڕا لادان، شانازیدان وەناو مەسیح عیسا له باوەت من فرەوه بود.

²⁷ تەنیا لەلێدان توام که ڕێ رەوشت زنەییدان شایسەێ ئینجیل مەسیح بود تا ئیجوره، چ بام بوينمەدان و چ له ئەوره نەوم، له باوەت ئیوه بشنەفم که وەناو یەێ روح قورس وساینه و وه یەێ فکر، شان وه شان یەک ئەڕا ئیمان ئینجیل تەقالا بکێن و

²⁸ وەناو هویچ چشتێ له ئەوانه که له ڕویدان وسن، ڕخدان نیەچود. ئیه له باوەت ئەوانه یە نیشانەێ ئاشکراێ له بین چیێنیانه، وەلێ نیشانەێ نجات ئیوەس و ئیه له خوداس.

²⁹ چوینکه ئی شانازیه نسیو ئیوه بیه که نه تەنیا وه مەسیح ئیمان بارین، بەڵکەم وەبونەێ ئەیو رەنجیش بکیشین.

³⁰ چوینکه ئیوەیش تویش ئەو کیشکاشینه که دین منیش تویش ئەوه بیم و ئێرنگەیش شنەفین که هێمراێ تویش ئەوەمه.