فِلِپّیوں 4 - کِتاب مُقدّس سرائیکی ترجمہ

ہدایات

¹ اِیں واسطے میڈے پیارے بِھراؤ، جِنہاں نال مِلنڑ دی مَیں سِک رکھیندا ہاں تے تُساں جیہڑے میڈی خوشی تے میڈا تاج ہیوے۔ میڈے عزیزو، خُداوند ءچ اِینویں ای قائم راہو۔

² یُوؤدیہ تے سُنتخے ڈُوہائیں بھینڑیں دی میں مِنت کریندا ہاں جو تُساں خُداوند یسُوع ءچ یک دل راہو۔

³ تے میڈے سچے سنگتی، مَیں تیکُوں وی عرض کریندا ہاں جو اِنہاں عورتاں دی مدد کر، کیوں جو اُنہاں کلیمینس تے میڈے نال خدمت کرݨ آلے باقی لوکاں سمیت میڈے نال خوشخبری سُنڑاوݨ ءچ بہُوں محنت کیتی ہے۔ اِنہاں ساریاں دے ناں کتاب ِ حیات ءچ لِکھے ہِن۔

⁴ خُداوند ءچ ہر وقت خوش راہو۔ میں ولا آدھا ہاں جو خوش راہو۔

⁵ تُہاڈی نرم دِلی سارے لوکاں اُتے ظاہر تھیوے۔ یاد رکھو جو خُداوند آوݨ آلا ہے۔

⁶ کہیں گالھ دی فِکر نہ کرو، بلکہ ہر حالت ءچ دُعا تے مِنت دے ذریعے تُہاڈیاں درخاستاں خُدا دے سامنڑے شُکرگزاری نال پیش کیتیاں ونجنڑ۔

⁷ وَل خُدا دا اِطمینان جیہڑا سمجھ تُوں باہر ہے، تُہاڈے دِلاں تے خیالاں کُوں مسیح یسُوع ءچ محفوظ رکھیسی۔

⁸ بِھراؤ، آخری گالھ ایہ ہے جو جِتّی گالھیں سچیاں ہِن، جِتّی گالھیں شرافت دیاں ہِن، جِتّی گالھیں اِنصاف دیاں ہِن، جِتّی گالھیں پاک ہِن تے جِتّی گالھیں سوہنڑیاں تے چنگیاں لگدیاں ہِن یعنی جِتّی گالھیں نیک تے تعریف دے لائق ہِن، اُنہاں اُتے غور کریندے راہو۔

⁹ جیہڑا کُجھ تُساں میں تُوں سِکھیا، حاصل کیتا، سُنڑیا تے میڈے ءچ ڈِٹھا، اُوندے اُتے عمل کریندے راہو۔ تے خُدا جیہڑا اِطمینان دا چشمہ ہے تُہاڈے نال راہسی۔

امداد کیتے شُکریہ

¹⁰ مَیں خُداوند ءچ بہُوں خوش ہاں جو اِتنے عرصے بعد تُساں ولا میڈی فِکر کیتی ہے۔ بے شک تُہاکُوں پہلے وی فِکر ہئی پر تُہاکُوں کُجھ کرݨ دا موقع نہ مِلیا۔

¹¹ مَیں ایہ کہیں ضرورت دی وجہ کنُوں نئیں آدھا کیوں جو مَیں ہر حالت ءچ خوش راہنڑ سِکھ گِھدے۔

¹² مَیں تنگ حالی ءچ وی راہنڑ جانڑدا ہاں تے خوشحالی ءچ وی۔ ہر گالھ تے ہر حالت ءچ، رجیا ہویا تے بُکھ ءچ، امیری تے غریبی ءچ زندگی گُزارݨ سِکھیا ہے۔

¹³ مَیں یسُوع المسیح دے وسیلے جیہڑا میکُوں طاقت ڈیندے، سبھ کُجھ کر سگدا ہاں۔

¹⁴ وَل وی تُساں چنگا کیتے جو میڈی مُصیبت ءچ شامل تھئے۔

¹⁵ تُساں فِلپی دے راہنڑ آلیو چنگی طرحاں جانڑدے ہیوے جو خوشخبری دی خدمت دے شروع ءچ جِیں ویلے مَیں مَکِدُنیہ کنُوں روانہ تھیّا ہم تاں تُہاڈے علاوہ کہیں کلیسیا پیسے ڈیوݨ دے معاملے ءچ میڈی مدد نہ کیتی۔

¹⁶ جِیں ویلے مَیں تھِسّلُنِیکے شہر ءچ ہم تاں تُساں میڈیاں ضرورتاں کُوں پُورا کرݨ کیتے ہِک پھیری نئیں بلکہ کئی پھیری مدد کیتی۔

¹⁷ میں ایہ اِیں واسطے نئیں آدھا جو مَیں کوئی امداد چاہندا ہاں بلکہ مَیں ایہ چاہندا ہاں جو تُہاکُوں تُہاڈے نیک کماں دا اجر مِل ونجے۔

¹⁸ میڈے کولھ سبھ کُجھ ہے بلکہ ضرورت تُوں زیادہ ہے۔ تُہاڈیاں بھیجیاں ہوئیاں شیواں اِپفُردِتُس دے ہتُھوں گِھن تے میڈے کولھ بہُوں کُجھ تھی گئے۔ ایہ ہِک ایجھی خوشبودار تے مقبول قُربانی ہے جیہڑی خُدا کُوں پسند ہے۔

¹⁹ میڈا خُدا آپنڑے جلال آلی دولت ءچوں یسُوع مسیح دے ذریعے تُہاڈیاں ساریاں ضرورتاں پُوریاں کر ڈیسی۔

²⁰ ساڈے خُدا تے باپ دی تمجید ہمیشاں تئیں تھیندی راہوے۔ آمین۔

آخری گالھیں تے سلام

²¹ اُتھاں دے سارے مُقدّساں کُوں مسیح یسُوع ءچ سلام آکھو۔ جیہڑے بِھرا میڈے نال ہِن، او تُہاکُوں سلام آدھے ہِن۔

²² اِتھاں دے سارے مُقدّس لوک، خاص طور تے قیصر بادشاہ دے گھر آلے تُہاکُوں سلام آدھے ہِن۔

²³ خُداوند یسُوع مسیح دا فضل تُہاڈی رُوح نال راہوے۔