MARK 1 - Thuhun Thah (BSI)

Baptistu John leh a thupuaah

¹ Pathian Tapa, Jesu Khrist Tanchinpha kipatna;

² Zawlneite lehkhabu ah, Ngai in, ka sawlleh na ma ah ka sawl a, ama’n na lampi a bawl diing.

³ Gamdaai a mi kikou aw in, Lalpa lamlian sial unla, a lampite hihtang un, a chi, chi a kigial bangin.

⁴ John in gamdai ah a baptis a, sualte ngaihdamna diing a kisiihna baptis thu a soi hi.

⁵ Huleh Judia gam mi zousiah leh Jerusalem a umte chu a pawt va, a kawmah a chiah va, a sualte uh thuphatawi in Jordan lui ah baptisma a tang chiat uhi.

⁶ Huleh John chu sangawngsaau mul puan silh in, a kawng savun kawnggaah in a gaah a; huleh a an chu khaukhup leh gam khuaizu ahi.

⁷ Huleh, Ka nung ah kei sanga lianzaw khat a hung a, kei chu kuun a, a keengtophah khau phel taah zong ka hi sih.

⁸ Ke'n chu tuiin ka hung baptis a; hizongleh ama’n chu Hagau Siangthou in nanguh ahung baptis diing, chi'n a soi hi.

Jesu baptisma tanna

⁹ Huleh hu hun laiin hichi ahung hi a, Jesu chu Galili gam a Nazareth khua a kipanin a hung a, John kawmah Jordan lui ah baptisma a tang a.

¹⁰ Huleh tui lah apat ahung pawt tahin, vaan kihong a, Hagau vakhu banga a tunga hung kumsuh a mu a;

¹¹ Huleh vaan a kipanin aw khat ahung ging a, Nang ka Tapa deihtah na hi, na tungah ka kipaah mahmah hi, chi'n.

Jesu heem a, a umna

¹² Huleh Hagau in amah chu gamdai ah a sawldohpah a.

¹³ Huleh amah chu Setan heem a um in ni sawmli gamdai ah a um a; huleh gamsate lahah a um a; angelte’n a nna a tohsah uhi.

Jesu’n a natoh apatna

¹⁴ Huchi'n John suangkul a, a khum nungun, Jesu chu Pathian gam Tanchinpha soiin Galili gam ah a hung a,

¹⁵ A hun a tungta a, huleh Pathian gam a naita hi; kisiih unla, Tanchinpha gingta un, chi'n.

Simon leh Andru kouhna

¹⁶ Huleh Galili diil geia a vaahna ah Simon leh a unaupa Andru diil a leen sep a mu a; ajiahchu ngaman mi ahi uhi.

¹⁷ Huleh Jesu’n a kawmvah, Hung jui un, mihing man di’n ka hung siam diing, a chi a.

¹⁸ Huleh amahun a leente uh nusia in amah a juipah uhi.

¹⁹ Huleh hu a kipana themkhat a chiah gamlaat leh Zebedi tapa Jakob leh a unaupa John a mu a; amah uh chu a leen uh phoh a kuang a um mah ahi uh a.

²⁰ Huleh ama’n amah uh a koupah a; huin amahun a pa uh Zebedi chu a suaah thalaahte u’toh kuang a nusia in amah a juita uhi.

Kapernaum a dawimat Jesu’n a suhdamna

²¹ Huleh amah uh chu Kapernaum khua ah a luut va; huleh khawlni’n kikhopna inn ah a luutpah a, thu a hilh hi.

²² Huleh amahun a thuhilh chu limdang a sa mahmah va; ama’n lehkhagialtute bang hilou a, thuneitah banga a hilh jiahin.

²³ Huleh a kikhopna inn vah dawiniin paai mi khat ana um a; amah chu a kikoudoh a;

²⁴ Ka tangun hung umsah in; Nazareth Jesu, nang leh kei un bang ahiai kizopna i neih? kei uh sumang diing a hung na hi maw? Koi na hih ka hung he hi, Pathian misiangthou na hi, chi'n.

²⁵ Huleh Jesu’n amah a tai a, Sip inla, a sung apatin hung pawt in, a chi a.

²⁶ Huleh dawiniin in mipa chu a soisa vah a, hah kou a kikou in a sung apat ahung pawtta hi.

²⁷ Huleh a bawnun limdang a sa mahmah va, huchi'n, Hi bang ata ei leh? bangchi bang thuhilhna thah a ta ei? Ama’n thunei tahin dawiniinte nasan thu a pia a, a thu a mang uh, chi in a kidongtuah uh.

²⁸ Huleh Galili gam kiimvel zousiah ah, gam chinah a tanchin a thangsuahpahta hi.

Jesu’n Peter ji nu leh midang tampi a suhdamna

²⁹ Huleh kikhopna inn a kipat a pawt un Simon leh Andru inn ah Jakob leh John toh a luutpah va.

³⁰ Huleh Simon ji nu chu khosih a na in ana lum a, huleh amahnu tanchin ana hilhpah uhi.

³¹ Huleh ama’n amahnu chu a khut a va tu in a phong a; huin a khosih in a nusepah a, huleh amahnu’n a nna uh a tohsah hi.

³² Huleh nitaahlam, nitum in, damlou zousiah leh dawi paaite a kawmah ahung pui uh a,

³³ Huleh khopi sunga mi zousiah chu kotpi bulah a kikhawm va.

³⁴ Huleh ama’n mi tampi natna tuamtuam a nate a sudam a, dawi tampi a nohdoh a; huleh dawite’n amah a heet jiahun a haam diinguh a phal sih hi.

Jesu haamtei diing a, a kuana leh Kapernaum a nuutsiatna

³⁵ Huleh jingkal in, kho vaah ma daihin a thou a, a pawt a, munsip ah a va chiah a, huah a haamtei hi.

³⁶ Huleh Simon leh a lawite’n a nungah a jui va.

³⁷ Huleh amah a muh tahun a kawmah, Mi zousiah in nang ahung hawl uhi, a chi va.

³⁸ Huleh ama’n a kawmvah, Kho nailahte ah zong thu ka soi theihna diingin i chiah diing uh; hu diing maha hung kuan ka hi ngal a, a chi a.

³⁹ Huleh ama’n Galili gam pumpi a, a kikhopna innte va thu hilhin dawite a nohdoh jel hi.

Miphaah suhdamna

⁴⁰ Huleh miphaah khat a kawmah a hung a, a ma a khupdin in, Na ut leh na hung susiang thei hi, chi'n a ngen a.

⁴¹ Huleh Jesu’n a hehpih mahmah a, a khut a zam a, a khoih a, a kawmah, Ka ut hi; siangthouta in, a chi a.

⁴² Huleh a soi zoh tahin a phaahna in a nusepah a, ahung siangthouta hi.

⁴³ Huleh amah a khapchat a, a sawlmangpah a;

⁴⁴ Huleh a kawmah, En in, koimah kawmah bangmah soi het sin; hizongleh chiah inla, siampu kawmah va kilah inla, na damsiang thu amah uh heetsahna diingin Mosi’n thu a piah silte va laan in, a chi a.

⁴⁵ Hizongleh amah chu a chiahdoh a, hu thu nasatah a taangkoupihin a phuangdalh panta hi; huchi'n Jesu chu a langtangin khopi sungah a luut theita sih a, gamdai munte ah a um zawta a; huleh mun chin a kipanin a kawmah mite ahung uhi.