Ester 7 - WÄNYI KWËRØ 2011

¹ Akedh rɑ̈dh geki Ämɑn, ge kedh-ɑ be ryëëj Bɑ̈rɑ̈dh Ester.

² Kì ryeew cyɑ̈ng, kɑ̈ng-ɑ́ nudd ge omɑ̈dhø ki møgø, ɑpyëëj Ester yi rɑ̈dh kinni, “Bɑ̈rɑ̈dh Ester, ɑ́ gïn ɑ dwɑddi yi yïn? Köbbí yɑn, o mëggi yïn ceth, cɑgg ɑ́ budi pödhɑ.”

³ Aløøg møge yi Bɑ̈rɑ̈dh Ester kinni, “Keløg e di dwɑddø yi yïn wuö, o pyëwí med ki yɑn, wiy yɑ nëënɑ, kɑ wiy wɑddɑ nëën gen.

⁴ Yɑ ɑ́rum ki ngewø wøki wɑddi wøn, wøn ɑ́ møg ngɑl. Ke di cɑɑg wøn ki ngewø wøn ɑ́ bɑ̈ngg, yï pɑ di jud yi yɑn, de wø ceg kɑ dwɑddi nɑ̈gø kinni tweet!”

⁵ Apyëëj Bɑ̈rɑ̈dh Ester yi Rɑ̈dh Kerkes kinni, “Á men ɑ dwɑddi gwøgi gïn ni men? Jɑlɑni ying-ɑ keny?”

⁶ Alöggi Ester kinni, “Ngɑn-ɑ mɑɑn wøn, ɑ dwɑddi wøn nɑ̈gø bɑ jɑl-ɑ rɑj èn, Ämɑn!” Kɑ Ämɑn nyinge otøngø yi wɑ̈ɑ̈rø, e nenn-ɑ yï rɑ̈dh geki bɑ̈rɑ̈dh,

⁷ Kɑ rɑ̈dh dhwödh-ɑ mɑl pyëwe rɑɑj ki mendwøng, kɑ kedh-ɑ wɑ̈g kì ød, ɑkedhe yij bɑɑg gøldwøng. Kɑ yod yi Ämɑn kinni, rɑ̈dh dwɑdd-ɑ cɑyii kipe møgɑni, codhe ɑdönge e kwɑjj-ɑ Bɑ̈rɑ̈dh Ester kipe kinni o wëye yiel.

⁸ Keny-ɑ ɑ́dwöög rɑ̈dh kì yij bɑg, Ämɑn ɑ́yuude e obuddø kì wïj pyën-ɑ bëëd yi Ester e kwɑjj-ɑ gøn kinni o wiy. Kɑ ɑ́lïdhi rɑ̈dh, ɑryeere kinni, “Jɑɑl dwɑdd-ɑ mødi bɑ̈rɑ̈dh kì butɑ; kì men-ɑ́ gøldwøng?” E rɑ̈dh nudd e ceg-ɑ kwøb ceth, kɑ nyingi Ämɑn kum yi órøjji gøldwøng.

⁹ Kɑ ɑ́kyel kì kelli gen, me cwøl ɑ́ Arbönɑ̀ okööbø kinni, “Pɑth ki møg keti gen, de men-ɑ́ Ämɑn ɑ́rum ki cwödhi piny ki gïn-ɑ wïje nyi ngɑ̈ɑ̈b, ɑ́ men ngɑɑb Mordekɑy, jɑl-ɑ ɑ́yiel wëyí wuö. Bɑ̈ri ngɑ̈ɑ̈bi menɑni bɑ mïtïr pyɑ̈r ɑ́ryew wïdɑ́ryew.” Amuuj rɑ̈dh ki cigg kinni, “Ngɑɑb Ämɑn wïj gïnɑni.”

¹⁰ Codhe, ɑngɑɑb Ämɑn wïj ngɑ̈ɑ̈bi men-ɑ ɑ́cwöödhe piny ɑ́ men di ngɑɑb Mordekɑy. Kɑ liny rɑ̈dh ókwöjø.