फिलिप्पी 4 - Surgujia Bible

¹ एकरले ए मोर दुलरुवा भाई-बहिन मन, जेकस मंए तुमन ला बताए हवों, वइसने परभू में बने रहा, तुमन ला मंए मया करथों अऊ तुमन जग भेंटाए बर करथों। ए दुलरुवा संगी मन, तुमन मोर सेवा कर द्वारा मिलल आनंद अऊ मोर मुकुट हवा।

मसीही चाल-चलन

² मंए यूओदिया अऊ सुनतूखे बहिन मन ला समझाथों कि ओमन आपस में एक मन होए के रहें, काबरकि ओमन परभू कर संगे जिनगी बिताथें।

³ ए सचा सकरमी, मंए तोरो जग बिनती करथों कि तंए ओ सवांगीनो मन कर मदेत कर, काबरकि ओहू मन मोर संगे सुघर खभेर ला फईलाए में कलेमेंस भाई अऊ मोर आने सहकरमी मन कर संगे ढेरेच मेहनत करीन हवें, जेमन कर नांव जीवन कर किताब में लिखल हवे।

⁴ परभू में सब घनी खुस रहा, मंए फेर कहथों खुस रहा।

⁵ सब मईनसे मन जाएन जाएं कि तुमन नरम सुभाव कर मईनसे हवा, परभू कर अवाई लिघे हवे।

⁶ कोनो बात कर चिंता झईन करा, बकिन सब बात में तुमन कर निवेदन, पराथना अऊ बिनती हर धनबाद कर संगे परमेस्वर कर आगू में राखल जाए।

⁷ अऊ जब तुमन मसीह ईसू कर संगे रईहा, तब परमेस्वर कर सांती, जेहर सबो समझ ले बाहरी हवे, तुमन कर हिरदय अऊ तुमन कर बिचार कर रखवाली करही।

⁸ एकरले ए भाई मन, जे-जे बात हर सही हवे अऊ जे बात हर आदर कर लाएक हवे अऊ जे बात हर ठीक हवे अऊ जे बात हर पबितर हवे अऊ जे बात हर सुघर हवे अऊ जे-जे बात हर मन ला मोहे लाएक हवे, मतलब जे सुघर गुन अऊ बड़ाई कर बात हवे, ओमन में धियान लगाए रहा।

⁹ तेकर ले जे बात ला तुमन मोर जग ले सीखे हवा, चाहे पाए हवा, चाहे सुने हवा अऊ मोर में देखे हवा, ओकरेच पालन करते रहा। तब परमेस्वर, जेहर सांती कर सोता हवे, तुमन कर संगे रही।

पौलुस हर दान बरीक धनबाद देथे

¹⁰ तुमन फूरोंच में मोर भलाई बर चिंता तो करत रहा, बकिन एला परगट करे बर तुमन के मोका नई भेंटात रहीस। एतना दिन कर पाछू, तुमन फेर एक दाएर मोर चिंता करे हवा, एकरले मंए परभू में ढेरेच खुस हों।

¹¹ मंए ए बात ला एकर बर नई कहथों कि मोके कोनो चीज कर कमी हवे; काबरकि मंए जे हालत में हवों, ओमे संतोस करे बर सीख गए हों।

¹² मंए कमी घटी में रहे बर जानथों अऊ एहू ला जानथों कि सब जाएत रही, तबो ले कईसे रहे बर हवे, सब बात में अऊ सब हालत में चाहे अघाए रहों, चाहे भूखे रहों अऊ चाहे मोर जग ढेरे अकन रहे, चाहे थोरहें रहें, मंए खुस रहे बर सीख गए हों।

¹³ जे मसीह हर मोके सामर्थ देथे, ओमे मंए सब कुछ कएर सकथों।

¹⁴ तबोले तुमन बढ़िहां करा कि मोर दुख में मोर मदेत करा।

¹⁵ ए फिलिप्पी सहर कर रहोईया मन, जेकस कि तुमन जानथा कि सुघर खभेर कर परचार कर सुरू में, जब मंए मकिदुनिया सहर ले बिदा होंए, तब तुमन कर छोंएड़ अऊ कोनो कलीसिया हर लेहे-देहे कर बारे में मोर मदेत नई करीन।

¹⁶ एहीच कस जब मंए थिस्सलुनीके सहर में रहें, तबोले तुमन मोर कमी ला पूरा करे बर एक दाएर नहीं, बकिन कईयो दाएर ले, मोर बर कांही भेजे रहा।

¹⁷ ए नहीं कि मंए दान चाहथों, बकिन मंए ए चाहथों कि तुमन कर देहे ले जे आसीस मिलत हे, ओहर अऊ बढ़त जाए।

¹⁸ मोर जग सब जाएत हवे अऊ ढेरेच अकन हवे, जे जाएत ला तुमन इपफूरूदीतुस भाई कर हाथ में भेजे रहा, ओला पाए के मोर मन में संतोस होए गईस हे, ओहर तो एगोट गमकेदार भेंट, अपनाए लाएक बलिदान हवे, जेकर चलते परमेस्वर हर ढेरेच फुरमा होथे।

¹⁹ मोर परमेस्वर हर अपन असीम धन कर अनुसार, तुमन कर सबेच कमी ला मसीह ईसू कर द्वारा पूरा करही।

²⁰ हमर दाऊ परमेस्वर कर महिमा जूग-जुग होवत रहे। आमीन।

पौलुस कर आखरी जोहार

²¹ सब पबितर मईनसे मन ला, जेमन मसीह ईसू कर अपन हवें, जोहार कहा अऊ जे भाई मन मोर संगे हवें, ओमन तुमन ला जोहार कहत हवें।

²² सब पबितर मईनसे मन, खास कएर के जेमन कैसर महाराजा कर घराना कर हवें, तुमन के जोहार कहत हवें।

²³ हमर परभू ईसू मसीह कर किरपा तुमन कर आत्मा कर संगे रहे।