फिलिप्पी 2 - Surgujia Bible

मसीह कर सोंच हमर जिनगी में होए बर चाही

¹ एकरले अगर मसीह कर संगे जीये ले सांती अऊ मया में ढाढस अऊ आत्मा कर संगती अऊ करुना अऊ दया हवे।

² तो मोर ए खुसी ला पूरा करा कि एक मन रहा अऊ एकेच मया अऊ एकेच आत्मा में अऊ एकेच इछा में जीयत रहा।

³ इसगा चाहे झूठा बड़ाई बर कांही झईन करा, बकिन नरम सुभाव ले आने झन ला अपन ले सुघर समझा।

⁴ तुमन में ले सबेच कोनो सिरीप अपनेच पसंद कर नहीं, बकिन दुसरो झन कर पसंद कर चिंता करे।

⁵ जेकस मसीह ईसू कर मन कर सोंच रहीस, ओही कस तुमनोच कर सोंच रहे।

⁶ मसीह हर फूरोंच में परमेस्वर रहीस, बकिन ओहर अपन-आप ला, परमेस्वर कर बरोबर करे कर लाएक नई समझीस।

⁷ बकिन ओकर ठन जेतना कुछ रहीस, ओ सब ला खुसी कर संगे हमर बर छोंएड़ देहीस अऊ दास बएन गईस अऊ मईनसे कर रूप में जनम लेहीस

⁸ अऊ ओहर मईनसे कर रूप में परगट होए के, अपन-आप ला नरम करीस अऊ इहां तक अगियां मानत रहीस कि परानोच ला तियाएग के, कुरूस कर मिरतु ला सएह लेहीस।

⁹ एकरले परमेस्वर हर ओके सबले महान करीस अऊ ओहर ओके ओ नांव देहीस, जेहर सब नांव ले ऊपर हवे।

¹⁰ तेमेकि जेमन सरग में अऊ धरती में अऊ धरती कर तरी हवें, ओमन सब ईसू कर नांव में ठेहुनाएं।

¹¹ अऊ परमेस्वर दाऊ कर महिमा बर सब जीभ माएन लेहें कि ईसू मसीह ही परभू लागे।

दुनिया में हमके ला बरत ढेबरी कस रहे बर चाही

¹² एकरले मोर दुलरुवा संगी मन, जे घनी मंए तुमन कर संगे रहें, त तुमन हमेसा अगियां ला मानत आए हवा, बकिन अझेर जब मंए तुमन ले दुरीहां हवों, तबोले तुमन डरात अऊ कांपत, अपन-अपन उद्धार कर काम ला पूरा करते जावा।

¹³ काबरकि ओ परमेस्वर हर तुमन कर मन में काम करथे। ओहर अपन बात ला माने कर मन, तुमन ला देथे अऊ ओकर इछा कर अनुसार काम करे बर सक्ती भी देथे।

¹⁴ बिगर कुड़कूड़ाए अऊ बिगर बहस कर सब काम ला करा।

¹⁵ तेमेकि तुमन निरदोस अऊ सही बएन जावा, मनेकि टेड़गा अऊ बेईमान मईनसे मन कर मझारे, परमेस्वर कर निरदोस लईका बने रहा, एमन कर मझारे जिनगी कर बचन कर पालन करत, तुमन दुनिया में बरत ढेबरी कस दिखथा।

¹⁶ तेमेकि मसीह कर आए कर दिन में मंए घमंड कएर सकों कि मोर दऊड़ चाहे मोर मेहनत हर बेकार झईन होए।

¹⁷ तुमन कर बिस्वास हर एगोट बली कर रूप में हवे अऊ ए बिस्वास कर बलिदान अऊ सेवा कर संगे, कहों अपन लहू ला बहाए के मोके जान देहे बर परही; तबोले मंए खुस हों अऊ तुमन सबेच झन कर संगे आनंद मनाथों।

¹⁸ ओही कस तुहूंच मन खुस रहा अऊ मोर संगे आनंद मनावा।

पौलुस हर तीमुथियुस अऊ इपफूरूदीतुस ला भेजते

¹⁹ मोके परभू ईसू में असरा हवे कि मंए तीमुथियुस भाई ला तुमन जग हालूच भेजहूं, तेमेकि तुमन कर हाल-चाल ला सूईन के मोके सांती मिले,

²⁰ काबरकि मोर जग तीमुथियुस भाई कर सुभाव नियर कोनो नईएं, जेहर तुमन कर बारे में ढेरेच चिंता करे।

²¹ काबरकि सब झन ईसू मसीह कर बारे में नहीं, बलकि अपनेच बारे में सोंचथें।

²² बकिन ओकर सुभाव ला तो तुमन जाएन दारे हवा कि जेकस बेटा दाऊ कर संगे करथे, ओहीच कस ओहर सुघर खभेर ला फईलाए में, मोर संगे मेहनत करीस हवे।

²³ एकरले मोके असरा हवे कि जेतना हालू मंए जानहूं कि मोर संगे का होवईया हवें, त मंए हालूच ओके तुमन ठे भेज देहूं।

²⁴ अऊ मोके परभू में भरोसा हवे कि मंहूच हालू आहूं।

²⁵ बकिन मंए इपफूरूदीतुस भाई ला तुमन जग भेजे बर जरूरी समझथों; ओहर मोर भाई, संगे सेवा करोईया, मसीह कर सेवा में संगे लड़ोईया, तुमन कर खभरीहा अऊ जरूरत कर घरी में मोर सेवा-जतन करोईया लागे।

²⁶ ओकर मन हर तुमन सब झन कर ऊपरे लगे रहीस, एकरले ओहर चिंता में रहत रहीस, काबरकि तुमन सुने रहा कि ओहर बेमार रहीस।

²⁷ सहीच में तो ओहर बेमार होए गए रहीस, एतना तक कि ओहर मरोईया रहीस, बकिन परमेस्वर हर ओकर ऊपरे दया करीस सिरीप ओकरेच ऊपरे नहीं, बलकि मोरो उपरे दया करीस कि मोके दुख कर उपरे दुख झईन होए।

²⁸ एकरले मंए ओके भेजे कर अऊ कोसिस करथों कि तुमन ओकर जग फेर भेंटाए के खुस होए जावा अऊ मोरो दुख हर कम होए जाए।

²⁹ एकरले तुमन परभू कर मया अऊ ढेरेच खुसी ले ओकर सवागत करीहा अऊ अईसन मईनसे कर माएन-मरजात करते रईहा।

³⁰ काबरकि ओहर मसीह कर काम बर, अपन परान ला खतरा में डाएल के, ओहर मिरतु कर लिघे आए गए रहीस, तेमेकि मोर सेवा में जे कमी तुमन कती ले होए रहीस, ओला ओहर पूरा करे।