इफिसियों 4 - Surgujia Bible

एकता कर संगे रईहा

¹ तेकरे ले मंए जेहर परभू बरीक कैदी हों, तुमन जग बिनती करथों कि जेकर बर तुमन बलाए गए हवा, ओकरे लाएक जिनगी जीयत रहा।

² मनेकि तुमन दीन अऊ नरम बना। तुमन कयास कएर के एक दूसर ला मया में सएह लेआ।

³ ओ सांती जेहर तुमन ला आपस में बाएंध के राखथे, ओला पबितर आत्मा कर एकता में समहाएर के राखे कर जतन करा।

⁴ जेकस एकेच ठन देंह हवे अऊ एकेच ठन पबितर आत्मा हवे, ओही कस तुमन बर एकेच ठन असरा हवे, जेकर बर परमेस्वर हर तुमन के बलाईसे।

⁵ एकेच ठन परभू हवे, एकेच ठन बिस्वास हवे, एकेच ठन बतिस्मा हवे।

⁶ परमेस्वर एकेच ठन हवे अऊ ओहर सब कर दाऊ लागे, जेहर सब कर ऊपरे सब कर मझारे हवे अऊ सब कर भीतरी हवे।

⁷ बकिन हमके सब झन ला मसीह कर दान कर नाप-जोक कर अनुसार किरपा मिलीस हवे।

⁸ तेकरे ले पबितर किताब हर एकस कथे: “जब ओहर ऊंच जघा में चघीस अऊ कैदी मन ला अपन संगे ले गईस अऊ मईनसे मन ला दान देहीस।”

⁹ अब सुना, ओहर ऊंच जघा में चघीस, एकर का मतलब हवे? एकर मतलब ए हवे कि ओहर धरती कर सबले खालहे जघा में उतरलो रहीस।

¹⁰ अऊ जेहर खालहे उतेर गईस, ओहर एही लागे जेहर सब अगास मन ले भी ढेरेच ऊपरे चघीस, तेमेकि सब संसार ला अपन हजूरी ले भएर देही।

¹¹ ओहर थोरोक झन ला परेरीत होए बर अऊ थोरोक झन ला अगमजानी होए बर अऊ थोरोक झन ला सुघर खभेर सुनोईया होए बर अऊ थोरोक झन ला रखवाला चाहे, पासटर होए बर, थोरोक झन ला बचन कर सिखोईया होए बर बरदान देहीस।

¹² एमन कर काम एही लागे कि परमेस्वर कर मईनसे मन ला, ओकर सेवा बरीक तियार करें अऊ मसीह कर देंह, मनेकि कलीसिया हर बढ़त जाए।

¹³ जब ले हमरे सबेच कोनो बिस्वास में अऊ परमेस्वर कर बेटा ईसू मसीह कर गियान में एक होए के, पका तियार मईनसे नई बएन जाबो अऊ मसीह कर बरोबर सिद्ध नई होए जाबो, तब ले एहर एकस चलत रही।

¹⁴ हमरे अब ले एकस लईका नियर नई रहबो, जेहर सब मधे कर नांवा उपदेस कर बईहर ले इते-ऊते बहकाल जाथे। हमरे कोनो मईनसे कर द्वारा भरमाए नई जाबो, जेमन ठएग के अऊ अपन चलाकी ले हमके ला भटकाथें।

¹⁵ बलकि हमरे मया कर संगे सचाई ला गोठियाबो अऊ हमरे सब जाएत में मसीह, जेहर मूड़ी लागे ओकरे नियर होए बर आगू बढ़त जाबो।

¹⁶ जेमे समुचा देंह हर एक संगे जुड़े रथे। सबेच अंग हर अपन काम-बूता कएर के, बांचल अंग मन ला बढ़िहां ले काम करे में मदेत करथे, तेमेकि ओ देंह हर बजर हो जाए अऊ मया में बढ़त जाए।

मसीह में नांवा जिनगी

¹⁷ तेकर ले मंए एला कहथों अऊ परभू कर नांव में अरजी करथों कि जेकस गैर यहूदी मन अपन बेकार सोंच बिचार में चलथें, ओकस तुमन कभों झईन चलिहा,

¹⁸ अऊ ओमन कर मन हर अंधार होए गईसे, अऊ जे जिनगी ला परमेस्वर देथे ओमन ओ जिनगी ले अलग होए गईन हवें, काबरकि ओमन कर मन हर कठोर होए गईस हे, एकरले ओमन काही नई जानें।

¹⁹ ओमन के कांहीच लाज-सरम नईए। ओमन अपन आप ला लूचा-लफंगई करे में लगाए लेहीन हवें अऊ सब मधे कर घिनक काम ला रिझ कर मारे करत रथें।

²⁰ बकिन तुमन मसीह कर बारे में एकस सिक्छा नई पाए हा।

²¹ तुमन फूरोंच में ओकर बारे में सुने हा अऊ जे सत हर ईसू में हवे ओला सीखे हा।

²² एकरले तुमन पाछू कती छोंड़ल चाल-सहूर ला जेहर तुमन कर जुनहा मईनसे लागे, ओला फेंक देआ, ओहर भरमावत घिनहा इछा कर अनुसार बिगड़त जाथे।

²³ अऊ तुमन अपन बुद्धी अऊ आत्मा में नांवा बनत जावा।

²⁴ अऊ अब तुमन नांवा मईनसे ला पहिर लेआ, जेहर परमेस्वर नियर सत में धारमिक अऊ पबितर बने बर सिरजल गईस हवे।

²⁵ तेकर ले अब सबेच कोनो झूठ बोले बर छोंएड़ दें। तुमन में ले सब झन अपन परोसी जग सच बोले, काबरकि हमरे सबो झन आपस में एक दूसर कर अंग लागन।

²⁶ अगर तुमन रीसे होथा, तो ओ रीस हर तुमन ला पाप झईन करुवाए अऊ ओ रीस हर बेर बुड़त ले झईन रहे।

²⁷ तेमेकि सैतान ला कांही करे कर मोका झईन मिले।

²⁸ चोरी करोईया हर फिरेच चोरी-हारी झईन करे, बलकि दूसर झन बर सुघर काम करे बर अपन हाथ ले मेहनत करे, जेमेकि कभों कोनो ला जरूरत कर घरी में देहे बर ओकर जग कांही रहे।

²⁹ कोनो मधे कर घिनक गोएठ तुमन कर मूंह ले झईन निकले। बलकि जरूरत कर अनुसार ओही गोएठ हर निकले, जेहर आने झेमन ला आत्मिक बढ़ती में मदेत करे, ताकि जेमन सुने ओमन ला एकर चलते फयदा मिले।

³⁰ परमेस्वर कर पबितर आत्मा ला उदास झईन करा, जेकर द्वारा तुमन ऊपरे ओ दिन बर मोहर लगीस हवे, जब पाप ले पूरा छुटकारा मिलही।

³¹ सब मधे कर मन कर करू बात अऊ रीस अऊ गुसा अऊ झगरा अऊ निंदा अऊ सबेच घिनक चाल-सहूर ला छोंएड़ देआ।

³² बलकि एक दूसर कर ऊपरे दया अऊ करूना करा, जेकस परमेस्वर हर मसीह कर जरिये, तुमन ला छमा करीस हवे, वइसने तुंहूच मन एक दूसर के छमा करा।