इफिसियों 3 - Surgujia Bible

परमेस्वर कर बड़खा योजना

¹ मंए पौलुस एही सब कर चलते, तुमन गैर यहूदी मन बर परभू ईसू मसीह कर कैदी हवों।

² परमेस्वर हर अपन किरपा कर जे सुघर खभेर ला, तुंहर भलाई बर मोके सोंपीस हवे, ओकर बारे में तुमन फूरोंच में सुने हवा।

³ कि परमेस्वर खुदेच ओ योजना कर भेद ला, परकासन द्वारा मोके बताईस, जेला मंए आगूवेच ले थोरहें रूप में लिखे हों।

⁴ तुमन एला पढ़िहा, त खुद समेझ जईहा कि मसीह कर ओ भेद कर बारे में मोर गियान केतना हवे।

⁵ परमेस्वर हर पाछू पीढ़ी कर मईनसे मन ला एला नई बताईस, बलकि अब पबितर आत्मा कर जरिये अपन पबितर परेरीत अऊ अगमजानी मन कर ऊपरे एला परगट करीस।

⁶ परमेस्वर कर योजना ए हवे कि सुघर खभेर में बिस्वास करे कर द्वारा, गैर यहूदी मन यहूदी मन कर संगे हकदार होए जाएं। ओमन दुनों एकेच देंह कर अंग लागें अऊ मसीह ईसू में बात-जबान कर हिसादार लागें।

⁷ मंए परमेस्वर कर किरपा कर अनुसार ओ सुघर खभेर कर सेवक बने हों, जेहर परमेस्वर कर सक्ती ले मोके मिलीसे।

⁸ मंए सबेच पबितर मईनसे मन ले सबले छोटे लागों, तबोले परमेस्वर मोर ऊपरे किरपा करीस हवे कि मंए गैर यहूदी मन ला, मसीह कर असीम धन कर सुघर खभेर कर परचार करों,

⁹ अऊ सब झेला परमेस्वर कर योजना कर भेद ला फरी-फरी बताओं। परमेस्वर जेहर संसार कर गढ़ोईया लागे, ओहर धरती अऊ अगास बने कर आगू ले, ओ भेद ला लुकाए के राखे रहीस।

¹⁰ तेमेकि अब कलीसिया कर द्वारा परमेस्वर कर किसीम-किसीम कर गियान ला, ओ सब सासन करोईया मन अऊ अधिकारी मन ला बताल जाए, जेमन सरग कर जघा में हवें।

¹¹ एहर परमेस्वर कर अमर काल कर योजना कर अनुसार होईस, जेला ओहर परभू ईसू मसीह कर द्वारा पूरा करीस।

¹² मसीह में हमर संगती अऊ मसीह में हमर बिस्वास कर द्वारा, बिगर डर कर अऊ भरोसा कर संगे परमेस्वर कर आगू में आए सकत हन।

¹³ तेकर ले मंए तुमन ठे बिनती करथों कि जे दुख ला मंए तुमन कर चलते भोगत हों, ओला देख के तुमन अपन हिमेत ला झईन हारीहा; काबरकि एही दुख हर तुमन कर महिमा लागे।

मया में बढ़े बर पराथना

¹⁴ एकरे चाड़हे मंए तो सरग कर दाऊ कर आगू में ठेहुनाथों,

¹⁵ जेकर द्वारा सरग अऊ धरती कर, सबेच बंस मन कर नांव ला धरल जाथे।

¹⁶ मंए पराथना करत हों कि परमेस्वर हर अपन महिमा कर धन ले, अपन आत्मा कर द्वारा तुमन के सामर्थ देही, तेमेकि तुमन कर भितरी मईनसे हर बजर होए जाही।

¹⁷ तेमेकि बिस्वास कर जरिये मसीह तुमन कर हिरदय में बसे अऊ तुमन परमेस्वर कर मया में जएर धरत अऊ बढ़त जईहा।

¹⁸ मंए पराथना करथों कि सब पबितर मईनसे मन कर संगे बढ़िहां ले समेझ सका कि मसीह कर मया हर केतना चाकर, केतना लमा, केतना रोंट अऊ केतना गहील हवे।

¹⁹ तुमन मसीह कर ओ मया ला जाएन लेआ, जेला तुमन अपन सब मधे कर गियान ले समझे बर नई सखीहा, तेमेकि तुमन परमेस्वर कर सबेच भरपूरी ले भएर जावा।

²⁰ अब ओ परमेस्वर कर महिमा होवत रहे, जेहर अईसना सामर्थी हवे कि हमरे जेतना मांगथन अऊ सोचथन ओकर ले बगरा कएर सकथे, ए सब हर ओकर सामर्थ कर अनुसार होथे, जेहर हमर भीतरी में काम करथे।

²¹ कलीसिया में अऊ मसीह ईसू में ओकर महिमा पीढ़ी ले पीढ़ी अऊ जुग-जुग होवत रहे। आमीन।