इफिसियों 2 - Surgujia Bible

किरपा कर द्वारा उद्धार मिलथे

¹ तुमन तो आगू अपराध अऊ पाप कर चलते, आत्मिक रूप ले मरल रहा।

² तुमन तो पहिले ए संसार कर रीती में पाप करत जिनगी जियत रहा अऊ अगास कर आत्मिक सक्ति कर ऊपरे राएज करोईया कर अगियां ला मानत रहा, जेहर आएज ले जेमन अगियां ला नई माने तेमन कर भितरी में काम करत हवे।

³ हमू मन आगू ओमने कस रहेन, अऊ अपन देंह कर पाप करे कर इछा अऊ जेकस अपन देंह हर मांगथे, ओकर अनुसार मन मरजी कर जिनगी जीयत रहेन। एही कस जिनगी जीए कर चलते, हमू मन आने झेमन कस अपन सुभाव ले, परमेस्वर कर बड़खा दंड कर पवईया रहेन।

⁴ बकिन परमेस्वर हर ढेरेच दया ले भरल हवे अऊ अपन ढेरेच बगरा मया कर कारन जेकर चलते, ओहर हमर ठे मया करीस

⁵ जब हमरे अपन अपराध कर चलते मरल रहेन, त हमू मन ला मसीह कर संगे जीयाईस। (परमेस्वर कर किरपा ले तुमन कर उद्धार होईस हवे)

⁶ ओहर हमके ला मसीह कर संगे जीयाईस अऊ सरग कर जघा में मसीह ईसू कर संगे बईठारीस

⁷ तेमेकि ओहर अवईया जुग कर सब लोग मन ला अपन किरपा कर असीम धन ला देखाही जेला ओहर अपन दया ले मसीह ईसू में हमर ऊपरे परगट करीस हे।

⁸ काबरकि परमेस्वर हर अपन किरपा ले, बिस्वास कर द्वारा तुमन कर उद्धार करीस हे अऊ एहर तुमन कर अपन कती ले नई होईस हवे, बलकि एहर परमेस्वर कर दान लागे।

⁹ उद्धार हर मईनसे कर अपन करम करे कर चलते नई होईसे, तेमेकि कोनो मईनसे हर घमंड झईन करे।

¹⁰ काबरकि परमेस्वर अपन हाथ ले हमके गढ़ीस हवे। ओहर हमके मसीह ईसू में सिरजीस हवे, तेमेकि ओ सब सुघर काम-बूता ला करत रही, जेला परमेस्वर हर आगू ले तियार कएर के राखीस हवे।

हमरे सब झन मसीह में एक हवन

¹¹ एकरले तुमन सुरता करा कि जनम ले तुमन गैर यहूदी रहा अऊ जेमन देंह में मईनसे मन कर करल खतना कर चलते, अपन-आप ला खतना वाला कथें अऊ ओमन तुमन ला बिगर खतना वाला कथें।

¹² ओ घनी तुमन बिगर मसीह कर जियत रहा अऊ इसराएल कर बिरादरी ले अलग करल गए रहा। परमेस्वर जे बात-जबान कर करार ला देहीस ओला नई जानत रहा अऊ ए दुनिया में बिगर असरा कर अऊ बिगर परमेस्वर कर रहा।

¹³ बकिन अब तुमन मसीह ईसू में मेराए गए हवा। एक समय तुमन परमेस्वर ले दुरीहां रहा, अब मसीह कर लहू कर जरिये ढेरेच ठांवें होए गए हवा।

¹⁴ काबरकि हमर मेल-जोल करोईया ओही हर लागे। यहूदी अऊ गैर यहूदी मन कर मझारे दुसमनी कर दिवार रहीस, तेला ओहर ओदाएर देहीस अऊ दुनो मन ला आपस में मेराए देहीस।

¹⁵ ओहर अपन देंह ला कुरूस में चघाए के, समुचा कानहूंन कर अगियां अऊ बिधी ला मेटाए देहीस, तेमेकि दुनो दल ला जेमन मसीह में मेराए गईन हवें, ओमन में ले एगोट नांवा मईनसे सिरजीस अऊ ओमन के आपस में मेल-जोल कराए देहीस।

¹⁶ अऊ कुरूस ऊपरे अपन मिरतु कर द्वारा ओमन कर बैर ला नास करीस, अऊ एकर जरिये दुनो मन ला एक देंह बनाए के, परमेस्वर जग मेल करुवाए देहीस।

¹⁷ मसीह हर आए के, तुमन ला जेमन दुरीहां रहा अऊ ओहू मन ला जेमन ठांवे रहीन, दुनों मन ला मेल-जोल करोईया सुघर खभेर सुनाईस।

¹⁸ काबरकि ओकरेच द्वारा एके ठे पबितर आत्मा कर जरिये दाऊ ठन हमरे दुनों झन पहुंच सकत हन।

¹⁹ तेकर ले तुमन जेमन गैर यहूदी लागा, अब परदेसी ना लागा, अऊ अनगईहों ना लागा। बलकि पबितर मन कर संगी सवदेसी अऊ परमेस्वर कर परिवार कर होए गए हवा।

²⁰ तुमन एकस घर हवा जेमन परेरीत अऊ अगमजानी मन कर नेंव कर ऊपरे बनाए गए हवा अऊ ओ घर कर कोनहा कर मुख पखना ईसू मसीह हर खुद लागे।

²¹ जेहर सब घर ला एक संगे जोड़थे अऊ परभू में एगोट पबितर मंदिर बनत जात हवे।

²² जेमे तुंहूच मन पबितर आत्मा कर द्वारा परमेस्वर कर रहे कर जघा होए बर, एक संगे बनावल जात हवा।