2 थिस्सलुनी 2 - Surgujia Bible

बिनास कर बेटा

¹ ए भाई-बहिन मन, हमर परभू ईसू मसीह कर फेर आए कर अऊ ओकर जग हमर जूटे कर बारे में, तुमन के बिनती करत हवन:

² कि कोनो हर आए के तुमन ला कही, परभू कर दिन हर आए गईस हवे, त ओला सुईन के तुमन कर परान हर एकेच दाएर हुलुक-डुबूर झईन करे अऊ झईन घबरईहा। ओमन आए के एहू कस कहीं कि हमरे आत्मा कर दरसन पाए हन अऊ बचन कर परचार सुने हन, हमन ला चिट्ठी मिलीस हे, जेहर तुमन के हमर कती ले आईस हे कस लागही, त तुमन ओमे बिस्वास झईन करीहा।

³ कोनो हर तुमन ला कोनो मधे कर धोखा झईन दे, काबरकि ओ दिन हर तब आही, जब मईनसे मन परमेस्वर कर बिरोध करहीं अऊ बिनास कर बेटा परगट होए जाही।

⁴ जेतना झेमन ईसवर कर नांव में जानल जाथें अऊ पूजा अराधना कर लाएक मानल जाथें, ते सब मन कर बिरोध बिनास कर बेटा हर करही अऊ अपन-आप ला सबले बड़खा बताही, ओहर एतना तक करही कि परमेस्वर कर मंदिर में बईठ के अपन-आप ला परमेस्वर बताही।

⁵ तुमन ला सुरता नईए का, जब मंए तुमन कर संगे रहें, त मंए तुमन ला ए सबेच बात ला बतात रहें?

⁶ तुमन जानत हवा कि कोन हर बिनास कर बेटा ला रोकत हवे, तेमेकि ओहर परमेस्वर कर ठहराल समय ले आगू परगट नई होही।

⁷ काबरकि बिनास कर बेटा हर, अझरो ले लुकाए के काम करत हवे, बकिन अझेर ले एक झन ओला रोकत हवे अऊ जब ले ए रोकोवईया हर नई कगराए जाही, तब ले बिनास कर बेटा परगट नई होही।

⁸ तेकर ओ बिनास कर बेटा हर परगट होही, जेला परभू ईसू हर अपन मूंह कर अगियां ले माएर दारही अऊ अपन आए कर तेज ले ओके नास कएर देही।

⁹ ओ बिनास कर बेटा हर सैतान कर सक्ती कर संगे आही, अऊ ओहर झूठ-मूठ कर सबेच मधे कर चमत्कार, चिन्हा अऊ अचरज कर काम करही,

¹⁰ अऊ नास होवईया मन ला सब मधे कर धोखा देवईया घिनक काम में डालही, काबरकि ओमन सत ले मया नई करीन, जे सत ले ओमन कर उद्धार होतीस।

¹¹ एकर चलते परमेस्वर हर ओमन ला भरमाए देही, तेमेकि ओमन झूठ-मूठ में बिस्वास करें।

¹² एकरे ले जेतना मईनसे मन परमेस्वर कर सत बचन कर ऊपरे बिस्वास नई करें, बकिन पाप करे में फुरमा होथें, ओ सब झेमन दंड पाहीं।

बिस्वास में बजर बने रहा

¹³ ए भाई-बहिन मन अऊ परभू कर दुलरुवा मन, हमके ला तुमन बर सबेच घनी परमेस्वर कर धनबाद करे बर चाही, काबरकि परमेस्वर हर सुरू ले तुमन ला चुईन लेहीस हवे कि पबितर आत्मा कर जरिये, पबितर बएन के अऊ ईसू मसीह कर सत कर ऊपरे बिस्वास कएर के तुमन उद्धार पावा।

¹⁴ एकर बर परमेस्वर हर, हमर सुघर खभेर कर परचार कर जरिये तुमन ला बलाईस, तेमेकि तुमन हमर परभू ईसू मसीह कर महिमा ला पावा।

¹⁵ एकरले ए भाई-बहिन मन, तुमन बिस्वास में माढ़े रईहा अऊ जे-जे बात ला हमर गोएठ चाहे चिट्ठी कर जरिये तुमन सीखे हवा, ओमन ला बजर धरे रईहा।

¹⁶ खुद हमर परभू ईसू मसीह अऊ दाऊ परमेस्वर, जेहर हमर जग मया करीस हवे अऊ अपन किरपा कर जरिये, हमके ला अमर सांती अऊ बढ़िहां असरा ला देहीस हवे,

¹⁷ तुमन कर हिरदय में ढाढस दे अऊ तुमन कर सबेच कहल गोएठ बात में अऊ बढ़िहां काम-बूता में बजर करे।