Philipiko lạgitʼ Pạul apostolakʼ ciṭhi INTRO1 - Santali Common Language New TestamentBOTOLO Philipi manḍerrenko ṭhen Pạul olakʼ ciṭhi do rạskạwanakʼ ciṭhi tahẽkana. Ar Europre do nonḍege pạhil manḍer benao hoelena. Noa manḍer do utạr Greecre Romrenkoakʼ gobolre Makedoniạ Prodesre tahẽkana. Uni do Philipire hajotreye tahẽkan gel bochor tayom uni do noa ciṭhiye olleda. Onḍe tahen jokhecʼ Isor do uni hotete mitʼṭen hahaṛa kạmiye kạmileda (Aposkạmi 16:16-34). Sanam khon hahaṛa kạmi do hoyokʼ kana thoṛa dintege ḍher hoṛ do Mạsireko pạtiạulena. Pạul tinre noa ciṭhiye olleda unre uni do arhõ hajotreye tahẽkana. Mạsi lạgitʼ eṭakʼ okoekoko kạmiyetʼ tahẽkan onkoakʼ tạkicʼakʼ iạte uni do duke ńametʼ tahẽkana ar Philipire bhul cecetʼko iạte uni do ạḍi asbase ạikạuetʼ tahẽkana. Noako tahẽkanre hõ Mạsire bhorsakʼ ar maraṅ rạskạ reakʼ katha uni doe baḍae ocoletʼkoa. Uniakʼ porcar kạmire Philipiren biswạsikoakʼ ṭaka-poesate goṛo iạte sarhao emako lạgitʼge noa ciṭhi olokʼ reakʼ monsubạ tahẽkana. Uni do onko sãote thoṛa dine tahẽkanre hõ uniakʼ noa ciṭhite pusṭạu bujhạukʼ kana je, Philipi manḍerrenko lạgitʼ uniakʼ do khạndri dulạṛ tahẽkantaea. Khaṭote Guṭtetʼ: (1) Pạulakʼ johar, sarhao ar koejoṅ (1:1-11 kạli) (2) Pạul acʼ apnar reakʼakʼko (1:12-26 kạli) (3) Mạsi leka colon reakʼ (1:27—2:28 kạli) (4) Timothi ar Iphrodi reaṅ (2:19-30 kạli) (5) Bhul cecetʼko khon sontorko reakʼ (3:1—4:9 kạli) (6) Philipi manḍer reakʼ dan lạgitʼ Pạulakʼ sarhao (4:10-20 kạli) (7) Mucạtʼ johar ar bhor dan (4:21-23 kạli) |
Santali Common Language New Testament © Bangladesh Bible Society, 2012.
Bangladesh Bible Society