ƲaEfeso 2 - Bhaibhiri Idzva rechiShona rine Dhuterokanonika

Ruponeso chipo chaKristu chisina muripo

¹ Nokudaro akaita kuti imi muve vapenyu pamakanga muri vanhu vakafa pamusana pezvikanganiso nomuzvitadzo mamakambogara

² muchitevedza maitiro apanyika pano muchiteverawo changamire womweya inesimba iri mumhepo, mweya uri kushanda muvanhu vasingateereri.

³ Isuwo tose takambogarawo mukati mazvo tichitevera havi dzomuviri wedu, tichitevera zvinoda muviri nepfungwa dzedu. Naizvozvo takanga takazvarirwa shamhu sezvakanga zvangoitawo vanhu vose.

⁴ Asi Mwari, azere netsitsi, pamusana porudo rwake rukuru rwaakatida narwo,

⁵ kunyange patanga takafa nokuda kokutadza kwedu, akatiita kuti tive vapenyu pamwe naKristu. Makaponeswa nenyasha.

⁶ Akatimutsa pamwechete naye akaita kuti tigare naye mumatenga tiri muna Kristu Jesu,

⁷ kuti mumazuva achauya, norudo rwake, aratidze upfumi husingaverengeki hwenyasha dzake kwatiri muna Kristu Jesu.

⁸ Pamusana penyasha makaponeswa nechitendero, asi musiri imi munozviponesa; chipo chaMwari,

⁹ kwete pamusana pamabasa kuti pasave nomunhu anozvikudza

¹⁰ nokuti tiri basa ramaoko ake, takasikwa muna Kristu Jesu kuti tiite mabasa akanaka akafanogadzirwa naMwari kuti tiatevedze.

Kubatana kwedu isu uye naKristu

¹¹ Naizvozvo, imi vechirudzi panyama, yeukai kuti maimbonzi vanhu vasina kudzingiswa navaya vakadzingiswa chiri chinhu chinoitwa panyama namaoko.

¹² Yeukai kuti panguva iyoyo imi makanga makaparadzana naKristu, muri vatorwa kumhuri yeIsiraeri makatsaurwa kuzvitenderano zvechipikirwa musina chitarisiro uye musina Mwari panyika.

¹³ Asi iye zvino, muna Kristu Jesu, imi maimbova kure makaunzwa padyo neropa raKristu.

¹⁴ Nokuti Kristu ndiye rugare rwedu akaita kuti tive vamwe akaputsa munyama yake chidziro chaiparadzanisa vanhu choruvengo

¹⁵ nokudzima mutemo wemirao nezvirevo kuti aumbe maari iye munhu mumwechete mutsva panzvimbo yavaviri. Nokudaro akaunza rugare.

¹⁶ Uye kuti nomuchinjikwa, atiwadzanise naMwari mumuviri mumwechete, nezvo achibva aparadza ruvengo.

¹⁷ Akauya akaparidza rugare kwamuri imi maiva kure kure. Akaparidzawo rugare kune vakanga vari padyo

¹⁸ nokuti nokwaari uye naMweya mumwechete tinowana masvikiro kuna Baba.

¹⁹ Nezvo hamuchisiri vaenzi kana vatorwa asi mava vagari vomo pamwe navatsvene nenhengo dzemhuri yaMwari.

²⁰ Makavakwa pahwaro hwavapositori navaporofita, Kristu Jesu pachake ari iye ibwe rapakona.

²¹ Paari ndipo pakabatanidzwa imba yose ichizokura muna Tenzi kuva Temberi inoera.

²² Maari imiwo makavakwa mairi kuva nzvimbo yokugara yaMwari muna Mweya.