Numeri 33 - Bhaibhiri Idzva rechiShona rine Dhuterokanonika

Rwendo rwavaIsiraeri kubva Ijipiti kundosvika kuMoabhu

¹ Urwu ndirwo rwendo rwavaIsiraeri pavakabuda muIjipiti namapoka avo vachitungamirirwa naMosesi naAroni.

² Murwendo rumwe norumwe rwavainge vafamba, Mosesi ainyora zita renzvimbo yavainge vasvika pakusimuka kwavo vopinda munzira sezvaakaudzwa naTenzi. Idzi ndidzo nzendo dzavakafamba nenzvimbo dzavakatangira.

³ Vakatangira rwendo rwavo paguta reRamasesi mumwedzi wokutanga pazuva regumi nechishanu romwedzi iwoyo. Pazuva rakatevera rePasika, vaIsiraeri vakanyatsobuda zvavo vaIjipiti vose vachiona.

⁴ Izvozvo vaIjipiti vaingunoviga matangwe avo ose akanga auraiwa naTenzi. Ipapo Tenzi akabudisa pachena kuti vamwari vavo vamwari vakaita sei.

⁵ Saka vaIsiraeri vakabva paRamesesi vakandodzika matendhe avo paSukoti.

⁶ Vakabva paSukoti vakandodzika matendhe avo paEtamu pamuganho nerenje.

⁷ Vakabva paEtamu vakadzokera kuPihahiroti, pakatarisana nepaBhaarizefoni vakadzika matendhe avo pedyo napaMigidhori.

⁸ Vakabva paPihahiroti vakayambuka nomuGungwa Dzvuku, vakapinda nomurenje vakafamba rwendo rwamazuva matatu nomurenje reEtamu vakazodzika matendhe avo paMara.

⁹ Vakabva paMara vakandosvika paErimu. PaErimu paiva nezvisipiti zvemvura gumi nezviviri, nemiti yomurara makumi manomwe. Vakadzika matendhe avo ipapo.

¹⁰ Vakabva paErimu vakandodzika matendhe avo munyasi meGungwa Dzvuku.

¹¹ Vakabva paGungwa Dzvuku vakandodzika matendhe avo murenje reSini.

¹² Vakabva murenje reSini vakandodzika matendhe avo kuDhofuka.

¹³ Vakabva kuDhofuka, vakandodzika matendhe avo kuArushi.

¹⁴ Vakabva kuArushi, vakandodzika matendhe avo kuRefidhimu pakanga pasina mvura yokuti vanhu vanwe.

¹⁵ Vakazobva paRefidhimu vakandodzika matendhe avo murenje reSinai.

¹⁶ Ndokubva murenje reSinai vakandodzika matendhe avo kuKibhurotihataavha.

¹⁷ Vakabvawo paKibhurotihataavha vakandodzika matendhe avo paHazeroti.

¹⁸ Vakabvawo paHazeroti vakandodzika matendhe avo paRitima.

¹⁹ Vakazobva paRitima vakandodzika matendhe avo kuRimoniperezi.

²⁰ Vakabvazve paRimoniperezi vakandodzika matendhe avo paRibhina.

²¹ Ndokubva paRibhina vakandodzika matendhe avo paRisa.

²² Vakazobva paRisa vakandodzika matendhe avo paKeherata.

²³ Ndokubva paKeherata vakandodzika matendhe avo vava pagomo reShaferu.

²⁴ Ndokubva pagomo reShaferu vakazondodzika matendhe avo paHaradha.

²⁵ Ndokubvawo paHaradha vakandodzika matendhe avo Makeroti.

²⁶ Vakabva Makeroti vondodzikira matendhe avo Tahati.

²⁷ Vakazobva paTahati ndokundodzikira matendhe avo kuTera.

²⁸ Ndokuzobvawo kuTera vakandodzika matendhe avo kuMitika.

²⁹ Vakabva paMitika ndokundodzika matendhe avo kuHashimona.

³⁰ Vakabvawo paHashimona vondodzika matendhe avo kuMoseroti.

³¹ Vakazobva paMoseroti vakandoadzika vave Bhenejaakani.

³² Ndokubva Bhenejaakani vakandodzika matendhe avo vava Horihagidhigaadhi.

³³ Ndokubvawo paHorihagidhigaadhi vakazondodzika matendhe avo paJotibhata.

³⁴ Ndokuzobva paJotibhata vondodzika matendhe avo vava Abhurona.

³⁵ Vakabva paAbhurona vakazodzikira matendhe avo kuEzionigebheri.

³⁶ Vakazobva paEzionigebheri vakandodzika matendhe avo murenje reZini, ndipo paKadheshi.

³⁷ Ndokuzobvawo paKadheshi vakandodzika matendhe avo pagomo reHoru munyasi menyika yeEdhomu.

³⁸ Aroni mupristi audzwa naTenzi, akakwira mugomo reHoru akafiramo. Iri raiva gore ramakumi mana kubvira kubuda kwavaIsiraeri munyika yeIjipiti mumwedzi wechishanu pazuva rokutanga romwedzi iwoyo.

³⁹ Aroni akanga ava namakore zana namakumi maviri ana matatu okuzvarwa kwake paakafa mugomo reHoru.

⁴⁰ Mambo Aradhi worudzi rwavaKanani aigara kuNegevhu munyika yeKanani akanzwa zvokuuya kwavaIsiraeri.

⁴¹ VaIsiraeri vakabva kugomo reHoru vondodzika matendhe avo vava Zarimona.

⁴² Vakabva Zarimona vondodzika matendhe avo vava kuPunoni.

⁴³ Vakazobva Punoni vakazodzika matendhe avo kuObhoti.

⁴⁴ Vakabvawo kuObhoti vondodzika matendhe avo kuIyeabharimu kumuganho neMoabhu.

⁴⁵ Vakazobvawo paIyimu ndokundodzika matendhe avo vava Dhibhonigadhi.

⁴⁶ Ndokubva paDhibhonigadhi vakazondodzika matendhe avo vava Arumonidhibhurataimu.

⁴⁷ Ndokuzobva Arumonidhibhurataimu vakandodzika matendhe avo vava kumakomo eAbharimu munyasi megomo reNebho.

⁴⁸ Vakabva pamakomo eAbharimu vondodzika matendhe avo mumapani eMoabhu munyasi maJorodhani, kuJeriko.

⁴⁹ Vakazodzika matendhe avo munyasi maJorodhani kubvira kuBhetihejeshimoti kusvikira kuAbheroshitimu mumapani eMoabhu imomo.

⁵⁰ Mumapani eMoabhu imo munyasi maJorodhani kuJeriko, Tenzi akataurira Mosesi zvokuita achiti,

⁵¹ “Taurira vaIsiraeri uti kwavari, kana mayambuka Jorodhani muchipinda munyika yeKanani,

⁵² munofanira kudzinganisa vagari vemo, mupwanye zvimifananidzo zvavakazvigadzirira zvamabwe nezvifananidzo zvavo zvesimbi, mupaze nzvimbo dzavo dzemipiro dzavakavakira pakatunhumara.

⁵³ Torai nyika iyoyo mugaremo nokuti ndakupai nyika iyoyo kuti ive yenyu.

⁵⁴ Muchagovana nyika iyoyo nechin'ange dzinza nedzinza, muchipa nyika huru kune vakawanda, diki kuna vashoma. Nzvimbo inenge yapiwa munhu nechin'ange ndiyo ichava yake. Muchagovana nyika dzinza nedzinza vanhu nedzinza rababa wavo.

⁵⁵ Asi kana mukasadzinganisa vagari vemo vachakufurusai sechinhoi muziso vachiva sekabayo komunzwa parutivi. Vachakuonesai nhamo munyika yamuchange mugere.

⁵⁶ Ipapo zvandinofunga kuita kwavari ndizvo zvandichaita kwamuri.”