Numeri 31 - Bhaibhiri Idzva rechiShona rine Dhuterokanonika

Mwari anotuma vaIsiraeri kundorwisa vaMidhiani

¹ Tenzi akataurira Mosesi achiti,

² “Tsiva vaMidhiani pane zvavakakanganisira vaIsiraeri. Kana waita izvozvo uchatorwa uchindosanganiswa nehama dzako, vachakabvu.”

³ Mosesi akataurira vaIsiraeri achiti, “Vamwe varume pakati penyu ngavapakate zvombo zvokundorwisa vaMidhiani kuti vavarange vachitsiva kukanganisira Tenzi kwakaitwa navaMidhiani.

⁴ Dzinza rimwe nerimwe ravaIsiraeri ngaritumire chiuru chimwechete chavarwi.”

⁵ Ipapo muzviuru nezviuru zvavaIsiraeri makaunzwa chiuru chimwechete chavarwi padzinza roga roga. Saka varwi vakagadzirira kuenda kuhondo vakakwana zviuru gumi nezviviri.

⁶ Mosesi akatumira kuhondo chiuru chimwe nechimwe chavarwi vemadzinza ose avaIsiraeri pamwechete naFiniyasi mwanakomana womupristi, Ereazari. Finiyasi akaenda navo aine midziyo yomutendhe rinoera netsuri dzairidzirwa kurongera varwi zvokuita.

⁷ Vakarwisa vaMidhiani sokuudzwa kwakaitwa Mosesi naTenzi.

⁸ Vakauraya varume vose pamwechete namadzimambo mashanu vaMidhiani aiti: Evhi naRekemu naZuri naHuri naRebha. Vakaurayawo Bhiriamu mwanakomana waBheori vachimubaya nebakatwa.

⁹ VaIsiraeri vakatapa vanhukadzi navana vavaMidhiani. Vakatorawo zvipfuwo zvavaMidhiani nepfuma yavo yose.

¹⁰ Vakapisa maguta mavaigara namatendhe avo.

¹¹ Vakatora vanhu vavakatapa nezvipfuwo noupfumi hwose hwavakapamba vakaenda nazvo.

¹² Vakauya nenhapwa dziya nezvipfuwo zviya nepfuma iya vakasvika kuna Mosesi nomupristi Ereazari negungano rose ravaIsiraeri vaiva pamatendhe avo kumapani eMoabhu muna Jorodhani pakatarisana neJeriko.

Kudzoka kwavari kuhondo

¹³ Mosesi nomupristi Ereazari navatungamiriri vose vegungano ravaIsiraeri vakandochingura varwi kunze kwamatendhe.

¹⁴ Ipapo Mosesi akashatiriswa navakuru vakuru vehondo vaya vaiva vatungamiriri vamapoka ezviuru nevemazana avarwi vakanga vadzoka vachibva kuhondo.

¹⁵ Mosesi akati, “Ko magorega vakadzi vose vari vapenyu sei?

¹⁶ Ndivoka ivava vakarasikisa vaIsiraeri, panyaya iya yaBhiriamu. VaIsiraeri vakabva vatadzira Tenzi panyaya iya yokuPeori yakarakatisa gungano raTenzi nedenda.

¹⁷ Zvino ndinoti chiurayai vanakomana vavo vose navanhukadzi vose vakamborara navarume.

¹⁸ Asi vanasikana vavo vose vasina kumbozivana nomurume nokurara naye varegei vari vapenyu, muzvichengetere imi pachenyu.

¹⁹ Ani naani wenyu akauraya munhu kana ani naani akabata chitunha ngaambogara kunze kwenharaunda yamatendhe kwamazuva manomwe. Zvichenurei imi pachenyu nenhapwa dzenyu pazuva retatu napazuva rechinomwe.

²⁰ Chenuraiwo hanzu dzenyu dzose, nezvose zvamunazvo zvakagadzirwa namatehwe kana nemvere dzembudzi kana nemapuranga.”

²¹ Mupristi Ereazari akataurira varwi vaya vakanga vadzoka vachibva kuhondo, achiti, “Uyu ndiwo murao wakapiwa Mosesi naTenzi.

²² Ndarama nesirivha nendarira noutare nesimbi inomutobvu ndizvo

²³ chete zvamuchanatsa nomoto nezvose zvisingaparadzwe nomoto ngazvinatswe mumoto. Zvichabva zvachenurwa kunyange mukazvidaro zvinatseiwo nemvura yokunatsisa zvinhu. Zvinhu zvisingagoni kunatswa mumoto ngazvinatswe nemvura.

²⁴ Sukai hanzu dzenyu pazuva rechinomwe kuti muve vanhu vakachenurwa, shure kwaizvozvo mozopinda mumatendhe.”

²⁵ Tenzi akataurira Mosesi achiti,

²⁶ “Iwe naEreazari navakuru vakuru vavaIsiraeri, verengai zvinhu zvamakapamba kuhondo nhapwa nezvipfuwo.

²⁷ Kamurai zvamakapamba kuhondo napakati. Chimwe chikamu ngachipiwe kuvarwi vakadzoka vachibva kuhondo. Chimwe chikamu ngachipiwe gungano ravaIsiraeri.

²⁸ Pamugove wavarwi vakadzoka kuhondo torai chikamu chakatarwa chokupa Tenzi. Pazvinhu zvinenge zviri mazana mashanu torai chinhu chimwechete. Zvitorei panhapwa napamombe napamadhongi napahwai napambudzi.

²⁹ Torai chikamu chazvo pamugove uya wevarwi mupe mupristi Ereazari kuti uve mupiro unopirwa kuna Tenzi.

³⁰ Pamugove uya wavaIsiraeri vose pazvinhu makumi mashanu, torai chinhu chimwechete. Zvitorei panhapwa napamombe napamadhongi napahwai napambudzi napazvipfuwo zvose mupe vaRevhi vane basa rokuchengeta tendhe rinoera raTenzi.”

³¹ Mosesi nomupristi Ereazari vakaita zvakanga zvaudzwa Mosesi naTenzi.

³² Zvino zvinhu zvose zvaiva zvapambwa navarwi kuhondo zvakanga zvakamira zvakadai: hwai dzaiva mazana matanhatu ezviuru nezviuru makumi manomwe nezvishanu.

³³ Mombe makumi manomwe ezviuru nezviuru zviviri.

³⁴ Madhongi makumi matanhatu ezviuru nechiuru chimwechete.

³⁵ Nhapwa dzechikadzi makumi matatu ezviuru nezviuru zviviri, vose vakanga vasati vambozivana nomurume.

³⁶ Saka chikamu chazvo chakapiwa varwi chaiva: mazana matatu ana makumi matatu ezviuru ane zviuru zvinomwe zvine mazana mashanu ehwai.

³⁷ Hwai dzakapiwa kuna Tenzi dzaiva mazana matanhatu ana makumi manomwe ehwai nehwai shanu.

³⁸ Mombe makumi matatu ezviuru ane zviuru zvitanhatu. Mombe dzakapiwa kuna Tenzi dzaiva mombe makumi manomwe nembiri.

³⁹ Madhongi zviuru makumi matatu ana mazana mashanu. Madhongi akapiwa kuna Tenzi makumi matanhatu nerimwechete amadhongi.

⁴⁰ Vanhu vaiva zviuru gumi nezvitanhatu; vakapihwa kuna Tenzi makumi matatu navaviri.

⁴¹ Naizvozvo Mosesi akapa mupristi Ereazari chikamu chiya chakatarwa chomugove waTenzi sezvaakanga audzwa naTenzi.

⁴² Mosesi paakapa varwi mugove wavo akatsaura chimwe chikamu chawo chiya ndokupa vaIsiraeri.

⁴³ Saka mugove wakapiwa gungano rose waiti: mazana matatu ana makumi matatu ezviuru ane zviuru zvinomwe zvina mazana mashanu ehwai.

⁴⁴ Mombe makumi matatu ezviuru nezviuru zvitanhatu,

⁴⁵ madhongi aiva zviuru makumi matatu ana mazana mashanu,

⁴⁶ vanhu vaiva gumi rezviuru nezviuru zvitanhatu.

⁴⁷ Pazvinhu makumi mashanu zvoga zvoga zvomugove wakapiwa vaIsiraeri. Mosesi akatsaura chinhu chimwechete pamakumi mashanu pavanhu napazvipfuwo ndokupa vaRevhi vaiva nebasa rokuchengeta tendhe rinoera raTenzi sezvaakarayirwa naTenzi.

⁴⁸ Ipapo vakuru vakuru vekuhondo vaitungamirira mapoka ezviuru namapoka amazana vakauya kuna Mosesi.

⁴⁹ Vakati kuna Mosesi, “Changamire, isu varanda venyu takaverenga varwi vatinotungamirira tikaona kuti hakuna nomumwe wavo asipo.

⁵⁰ Zvino tauya nezvinhu zvendarama zvatakawana zvatinoda kupa Tenzi sechipo. Tauya namakoza nemhete nemarin'i nezvishongo zvomuhuro zvomupiro wedu kuna Tenzi wokuripira.”

⁵¹ Mosesi nomupristi Ereazari vakagamuchira ndarama iyoyo, zvinhu zvakanga zvakagadzirwa kare.

⁵² Ndarama yose yechipo chakapiwa Tenzi navaitungamirira mapoka ezviuru namapoka amazana avarwi yakaita mari yamashekeri yakasvika gumi rezviuru nezviuru zvitanhatu zvina mazana manomwe ana makumi mashanu.

⁵³ Mumwe nomumwe wavarwi aiva nezvinhu zvaakanga apambawo iye pachake.

⁵⁴ Mosesi nomupristi Ereazari vakagamuchira ndarama iya yavakapiwa navaitungamirira mapoka ezviuru namapoka amazana avarwi, ndokuiunza mutendhe rokusanganira kuti ive chiyeuchidzo chevaIsiraeri pana Tenzi.