Numeri 28 - Bhaibhiri Idzva rechiShona rine Dhuterokanonika

¹ Tenzi akati kuna Mosesi,

² “Taurira vaIsiraeri kuti vangwarire kundipa, mipiro yangu panguva dzakatemwa, mipiro yangu yezvokudya inoita zvokupiswa nomoto inonhuhwirira zvinondifadza.

³ Vaudze kuti zuva nezuva vagare vachipira Mwari mupiro wokupisa wehwayana mbiri, dzine gore rimwechete dzisina chinoshoreka.

⁴ Ngavapire Mwari hwayana imwechete mangwanani, vozopira imwe yacho manheru.

⁵ Ngavapirewo upfu hwekoroni hwakanyatsokuyiwa hunorema kirogiramu rimwechete, hwakakanywa namafuta eorivhi akanakisisa anokwana rita rimwechete.

⁶ Uyu ndiwo mupiro wokupisa pazuva roga roga wakarayirwa vaIsiraeri pagomo reSinai unopiswa pamoto kuti kunhuhwirira kwawo kufadze Tenzi.

⁷ Piraiwo mupiro wayo wezvokunwa unokwana rita rimwechete, nechibayiro chehwayana yokutanga, muteurire Tenzi zvokunwa, zvinoraradzisa munzvimbo inoera.

⁸ Ngavapire hwayana yechipiri manheru nomupiro wayo wembesanwa nomupiro wayo wezvokunwa sezvinenge zvamboitwa mangwanani. Mupiro iwoyo uitei zvokuupisa nomoto kunhuhwirira kwawo kufadze ini Tenzi.

Mupiro womusi weSabata

⁹ “Musi weSabata pirai hwayana hono mbiri, dzine gore rimwechete, dzisina chinoshoreka, pamwechete noupfu hwekoroni hwakanyatsokuyiwa hunorema makirogiramu maviri, hwomupiro wembesanwa, hwakakanywa namafuta, pamwechete nomupiro wawo wezvokunwa.

¹⁰ Iwoyu ndiwo mupiro wokupisa wokuita paSabata rimwe nerimwe, uchiwedzerwa pamupiro wokupisa wamazuva ose nomupiro wawo wezvokunwa.

Mupiro wapakugara kwomwedzi

¹¹ “Mwedzi woga woga pakugara kwawo, pirai Tenzi mupiro wokupisa, wehandira mbiri dzichiri duku nehondohwe imwechete, nehwayana hono nomwe dzine gore rimwechete dzisina chinoshoreka.

¹² Pirai mupiro wembesanwa weupfu hwekoroni hwakanyatsokuyiwa hwakakanyiwa namafuta eorivhi. Pahandira imwe neimwe torai upfu hunorema makirogiramu matatu, pahondohwe, mutore makirogiramu maviri,

¹³ Pahwayana imwe neimwe torai kirogiramu rimwechete. Uyu ndiwo mupiro unoita zvokupiswa nomoto kuti kunhuhwirira kwawo kufadze Tenzi.

¹⁴ Mipiro yezvokunwa inopirwa pamwechete nayo ndeiyi: pahandira imwe neimwe torai, waini inokwana marita maviri, pahondohwe torai waini inokwana rita rimwechete nechikamu charo chapakati napakati, pahwayana imwe neimwe torai waini inokwana rita rimwechete. Iwoyu ndiwo mupiro wokupisa unoitwa pazuva rokutanga romwedzi nomwedzi gore rose.

¹⁵ Piraiwo Tenzi gotora rimwechete romupiro wokupfupira zvitadzo uchiwedzerwa pamupiro wokupisa uya unogaroitwa pamwechete nomupiro wewaini.

Zuva guru rePasika, namazuva makuru echingwa chisina mbiriso

¹⁶ “Zuva regumi nechina romwedzi wokutanga, ndiro zuva rePasika yaTenzi.

¹⁷ Zuva regumi nechishanu romwedzi iwoyu izuva guru. Ngakudyiwe chingwa chisina mbiriso kwamazuva manomwe.

¹⁸ Zuva rokutanga racho ngapaitwe musangano mutsvene wezvokunamata, musaite basa rinorema.

¹⁹ Asi pirai Tenzi mupiro unoita zvokupiswa nomoto wehandira mbiri dzichiri duku pamwechete nehondohwe imwechete, nehwayana hono nomwe, dzine gore rimwechete. Dzose ngadzive dzisina chinoshoreka.

²⁰ Piraiwo mupiro wembesanwa weupfu hwekoroni hwakanyatsokuyiwa hwakakanyiwa namafuta eorivhi, pahandira imwechete torai makirogiramu matatu, pahondohwe torai makirogiramu maviri,

²¹ pirai kirogiramu rimwechete pahwayana imwe neimwe dzose dziri nomwe.

²² Piraiwo Tenzi gotora rimwechete romupiro wokupfupira zvitadzo kuve kuripira kwenyu.

²³ Mipiro iyoyi ngaiwedzerwe pamupiro wokupisa unogaroitwa mangwanani.

²⁴ Kwamazuva manomwe itai saizvozvo zuva nezuva muchipira zvokudya zvomupiro unoita zvokupiswa nomoto, kunhuhwirira kwawo kufadze ini Tenzi. Mipiro iyoyi ngaiwedzere mupiro wokupisa unogaroitwa zuva nezuva pamwechete nomupiro wezvokunwa.

²⁵ Pazuva rechinomwe kokorodzanaizve muite musangano mutsvene wezvokunamata, musaite basa rinorema.

Mipiro yomusi wokupemberera kukohwa

²⁶ “Pazuva rokupira mupiro wembesanwa dzinotanga kukohwiwa, pamunouya kuzopira Tenzi mupiro wembesanwa dzinotanga, mazuva makuru amavhiki okukohwa, itai musangano mutsvene wezvokunamata musaite basa rinorema.

²⁷ Asi pirai Mwari mupiro wokupisa unonhuhwirira zvinofadza Tenzi. Pirai handira mbiri dzichiri duku nehondohwe imwechete nehwayana hono nomwe dzine gore rimwechete.

²⁸ Piraiwo mupiro wembesanwa weupfu hwekoroni hwakanyatsokuyiwa hwakakanyiwa namafuta eorivhi. Pahandira imwe neimwe pirai makirogiramu matatu oupfu, pahondohwe makirogiramu maviri,

²⁹ pahwayana imwe neimwe kirogiramu rimwechete.

³⁰ Piraiwo gotora rokupfupira zvitadzo zvenyu kuve kuripira kwenyu.

³¹ Pirai mipiro iyoyi pamwechete nemipiro yayo yezvokunwa tisingaverengere mupiro wokupisa unogaroitwa nomupiro wawo wembesanwa. Nyatsoonai kuti zvipfuwo zvacho zvive zvipfuwo zvisina chinoshoreka.