Numeri 25 - Bhaibhiri Idzva rechiShona rine Dhuterokanonika

VaIsiraeri vari pagomo rePeori

¹ VaIsiraeri pavakanga vagere mubani remibayamhondoro reShitimu, varume vakatanga kuita unzenza navakadzi vorudzi rwavaMoabhu.

² Vakadzi ivavo vakavakoka kuzvibairo zvavamwari vavo. Vanhu vakadya vakapfugamira vamwari vavo ivavo.

³ Naizvozvo vaIsiraeri vakazvipinza muuranda hwokunamata Bhaari mwari wokuPeori. Tenzi akashatiriswa navaIsiraeri,

⁴ akabva ataurira Mosesi kuti, “Tora vatungamiriri vose vavaIsiraeri uuye navo pana Tenzi, uvasungirire vafe pamberi paTenzi masikati machena kuti hasha dzaTenzi dzinotyisa dzichirega kuvirukira vaIsiraeri.”

⁵ Mosesi akataurira vatongi vavaIsiraeri achiti, “Mumwe nomumwe wenyu ngaauraye ani naani akazvipinza muuranda hwokunamata Bhaari, mwari wokuPeori.”

⁶ Ipapo mumwe murume muIsiraeri akauya nomukadzi worudzi rwavaMidhiani akapinda naye mutendhe rake, achionekwa naMosesi negungano rose ravaIsiraeri rakanga richichema riri kumusuo wetendhe rokusanganira.

⁷ Finiyasi mwanakomana waEreazari, muzukuru womupristi Aroni, paakazviona, akabva paiva negungano riya, akandotora pfumo rake,

⁸ ndokutevera murume uya mutendhe muya, ndokusvikosonanidza nepfumo nechapadumbu murume muIsiraeri nomukadzi uya. Ndiko kumiswa kwakaitwa denda pavaIsiraeri.

⁹ Asi vanhu vakanga vatofa nedenda iroro vaiva zviuru makumi maviri nezvina.

¹⁰ Tenzi akataurira Mosesi achiti,

¹¹ “Finiyasi mwanakomana waEreazari, muzukuru womupristi Aroni, apodza kutsamwira vaIsiraeri kwandanga ndaita. Atsamwira vanhu vasina kundiremekedza ini, sokuvatsamwira kwandinoitawo ini pachangu. Saka ndisina kuzoramba ndichiparadza vaIsiraeri pandanga ndavatsamwira.

¹² Naizvozvo mutaurire kuti, ndichaita chitenderano chorugare naye.

¹³ Chitenderano ichi chokuti vava vapristi nokusingapere ndechake iye nezvizvarwa zvake nokuti akatsamwira vanhu vasina kuremekedza Tenzi wake akayananisa vaIsiraeri naTenzi.”

¹⁴ Zita romurume muIsiraeri uya akaurayiwa pamwechete nomukadzi worudzi rwavaMidhiani rainzi Zimuri mwanakomana waSaru, aiva mutungamiriri weimwe mhuri yomudzinza rokwaSimeoni.

¹⁵ Zita romukadzi wechiMidhiani akaurayiwa uya ainzi Kazibhi, aiva mukunda waZuri akanga ari mukuru wedzinza rimwe ravaMidhiani.

¹⁶ Tenzi akataurira Mosesi achiti,

¹⁷ “Rwisai vaMidhiani muvaparadze,

¹⁸ panyaya iya yaKazibhi hanzvadzi yavo, mukunda wejinda romuMidhiani, yakaurayiwa panguva iya yedenda rakauraya vanhu paPeori.”