Numeri 24 - Bhaibhiri Idzva rechiShona rine Dhuterokanonika

¹ Bhiriamu paakaona kuti Tenzi aifadzwa nokukomborera vaIsiraeri haana kuzombondotsvaka chiratidzo sezvaaimboita. Asi akatarisa kurenje,

² akaona vaIsiraeri vakadzika matendhe avo dzinza nedzinza, Mweya waMwari ndokuuya paari.

³ Akaenderera mberi nokuporofita kwake achiti, “Chirevo chaBhiriamu mwanakomana waBheori, chirevo chomurume akapengenutswa meso ake.

⁴ Chirevo chomunhu anonzwa mashoko aMwari, anoona chiratidzo chaSamasimbaose, anoti pasi zvambarara meso ake achipengenutswa.

⁵ A-a manakiroi akaita matendhe ako Jakobho, naiwoka madzikiro ako matendhe iwe Isiraeri!

⁶ Akaita samapani anoenda uko nokoko, samapindu ari munhivi dzerwizi samagavakava, akasimwa naTenzi, semisidhari iri padeketeke remvura.

⁷ Zvirongo zvavo zvichafashukira nemvura, mbesa dzavo dzichawana mvura yakawanda. Kukudzwa kwamambo wavo kuchadarika kwaAgagi, ushe hwake huchaita mukurumbira.

⁸ Mwari akavaburitsa kuIjipiti, achivarwira nesimba semvumba, ndudzi dzavanhu dzinovavenga vachadziparadza, mapfupa avavengi vavo vachaati bwabwabwa vachivabvoora nemiseve yavo.

⁹ Seshumba vaIsiraeri vanoti hwata vachivata pasi, vanoita seshumba hadzi, ndianiko angavadenhe. Wose anokukomborera, ngaakomborerwe. Wose anokurengerera rushambwa ngaawire norushambwa.”

¹⁰ Bharaki akashatiriswa naBhiriamu, ndokurovanisa maoko ake pamwechete. Bharaki ndokuti kuna Bhiriamu, “Ndakakudaidzira kuzorengerera rushambwa vavengi vangu, asi zvino watovakomborera zvako katatu kose.

¹¹ Zvino chitiza, dzokera kumusha kwako. Ndakamboti ndichakupa mubairo, asi Tenzi akunyimisa mubairo wacho.”

¹² Bhiriamu ndokuti kuna Bharaki, “Ko handina kuudza nhume dzenyu dzamakanditumira kuti,

¹³ ‘Kunyange Bharaki akandipa imba yake izere sirivha nendarama, handingambotsaudziri shoko raTenzi ndichiita zvakanaka kana zvakaipa zvandinoda pachangu.’ Zvinenge zvataurwa naTenzi ndizvo zvandichataura.

¹⁴ “Zvino ndava kudzokera kwedu, kuna vanhu vorudzi rwangu. Asi regai ndifanokuudzai zvichaitwa navaIsiraeri kuvanhu venyu mune ramangwana.”

Kuporofita kwaBhiriamu kwokupedzisira

¹⁵ Bhiriamu ndokuenderera mberi nokuporofita achiti, “Chirevo chaBhiriamu mwanakomana waBheori, chirevo chomurume akapengenutswa meso ake.

¹⁶ Chirevo chomunhu anonzwa mashoko aMwari, anopiwa ruzivo noWokumusorosoro, anoona chiratidzo chaSamasimbaose, anoti pasi zvambarara, meso ake achipengenutswa.

¹⁷ Ndinomuona, asi zvandinoona hazvisi zvanhasi, ndinomutarisa asi haasi pedyo. Nyenyedzi ichauya ichibva muna Jakobho, muvaIsiraeri muchava nomubati wetsvimbo youshe, huma yaMoabhu achaitekeshura achaparadza vanakomana vaSheti.

¹⁸ Achakunda Edhomu muvengi wake, makomo avo eSeiri achaatora. Isiraeri acharamba achikunda.

¹⁹ Muna Jakobho muchava nomutongi achaparadza vaya vakasara vari vapenyu mumaguta.”

²⁰ Bhiriamu akaona vaAmareki, ndokuporofita nezvavo achiti, “Simba ravaAmareki raidarika ramarudzi ose, asi vachaguma vaparadzwa zvachose.”

²¹ Bhiriamu akaona vaKeni, ndokuporofita nezvavo achiti; “Paugere hapana chichakuwana, dendere rako rakavakirwa mudombo.

²² Kunyange zvakadaro vaKeni vachaparadzwa. Muchagara muri nhapwa dzavaAsiria kusvikira riniko?”

²³ Bhiriamu akazoporofita achiti; “Ndiani angararame kana Tenzi achiita zvakadai?

²⁴ Asi ngarava dzichabva kuSaipurasi dzichaonesa nhamo Asiria naEbheru. Asi ivo pachavo vachaparadzwawo.”

²⁵ Bhiriamu akazosimuka akadzokera kumusha kwake. Bharaki akaendawo kwake.