Numeri 23 - Bhaibhiri Idzva rechiShona rine Dhuterokanonika

¹ Bhiriamu akati kuna Bharaki, “Ndivakire atari nomwe, ugounza nzombe nomwe nehondohwe nomwe pano apa.”

² Bharaki ndokuita sezvakanga zvataurwa naBhiriamu. Bharaki naBhiriamu Vakapira mupiro wehandira newehondohwe imwechete paatari imwe neimwe.

³ Ipapo Bhiriamu akati kuna Bharaki, “Mirai pedyo nechibayiro chenyu chokupisa. Ini ndomboti sudurukei, zvimwe Tenzi angauye kuzosangana neni. Zvose zvaanenge andiratidza ndichakuudzai.” Akaenda pamhene pakakwirira.

⁴ Mwari ndokusangana naBhiriamu. Bhiriamu akati, “Ndagadzira atari nomwe, ndikapira handira nehondohwe paatari imwe neimwe.”

⁵ Tenzi akaudza Bhiriamu zvokundotaurira Bharaki achiti, “Chidzokera kuna Bharaki umuudze izvozvo.”

⁶ Bhiriamu akadzokera kwakare, wanei Bharaki achakamira pane chibayiro chake chokupisa, iye namachinda ose avaMoabhu.

⁷ Bhiriamu ndokutanga kutaura shoko rake achiti, “Bharaki akandiunza kubva kuSiria. Mambo wavaMoabhu akandibvisa kunyika yamakomo yokumabvazuva, achiti, ‘Uya kuno undirengererewo Jakobho Uya uzoshora vaIsiraeri.’

⁸ Ndingarengerere sei rushambwa vanhu vasina kurengererwa naMwari? Ndingashore sei vanhu vasina kushorwa naTenzi.

⁹ Ndiri pamusoro pamakomo pano ndinovaona, ndiri pazvikomo pano ndinovatarisa, onei vari vanhu vanoda kugara voga, vasingazviverengeri mukati mamamwe marudzi.

¹⁰ Ndiani angaverenge guruva rakadai kuwanda, saJakobho, kana kuverenga katsama zvako kavaIsiraeri. Regai ndife zvangu rufu rwavakarurama, kuguma kwangu kufananewo nokwavo.”

¹¹ Bharaki ndokutaurira Bhiriamu achiti, “Ko chiiko chawandiitira ichi? Ndakakuunza kuti uzorengerera rushambwa vavengi vangu, asi iwe watonyatsovakomborera zvako!”

¹² Bhiriamu akati, “Handiti zvandinenge ndaudzwa naTenzi ndizvo chete zvandinofanira kutaura?”

Kuporofita kwaBhiriamu kwechipiri

¹³ Bharaki akamutaurira kuti, “Handei kune imwe nzvimbo kwamungakwanise kuvatarisa muri, muchivaona. Munenge musingaoni zvenyu vose, asi vashoma chete, mundirengererere vanhu ivavo rushambwa muriko.”

¹⁴ Akaenda naye kuTsofimu pamusoro pegomo rePisiga. Akavaka atari nomwe ipapo ndokupira handira nehondohwe paatari imwe neimwe.

¹⁵ Bhiriamu ndokutaurira Bharaki achiti, “Mirai pano pane chibayiro chenyu chokupisa. Ini ndichambondosangana naMwari uko.”

¹⁶ Tenzi akasangana naBhiriamu, ndokumupa zvokundotaura achiti, “Chidzokera kuna Bharaki undomuudza izvozvo.”

¹⁷ Akadzokera kuna Bharaki kuya wanei achakangomira pane chibayiro chake chokupisa chiya aina machinda eMoabhu. Bharaki akati kwaari, “Zvanzi kudii naTenzi?”

¹⁸ Bhiriamu akaenderera mberi kuporofita achiti, “VaBharaki wee simukai munzwe, dombondinzwaiwo imi mwanakomana waZipori,

¹⁹ Mwari haazi munhu, haangarevi nhema, haazi munhu, haasanduki sanduki mukutaura. Ko munoti angataure chinhu pedzepo orega kuchiita here? Angatsidze chinhu chaasingazoita here?

²⁰ Chinzwai, ini ndanzi ndivakomborere, iye atovapa chikomborero ini handingachibvisi.

²¹ Uipi hahuna kuonekwa muna Jakobho, kukanganisa hakuna kuonekwa muvaIsiraeri. Tenzi Mwari wavo anavo, kupemberera Tenzi samambo wavo kunonzwika pakati pavo.

²² Mwari akavaburitsa muIjipiti, achivarwira nesimba semvumba.

²³ Zvoun'anga Jakobho hazvimukuvadzi, kana zvokurengerera vaIsiraeri hazvipe rushambwa. Vanhu vachataura zvaJakobho nezvavaIsiraeri vachiti, hezvoka zvakaitwa naMwari.

²⁴ Tarisai muone rudzi rwavaIsiraeri! Runoti kwanyanu seshumba hadzi. Rugonyatsoti kangarara somukono weshumba isingarari pasi kusvikira yadya chainovhima, kana kunwa ropa rechayauraya.”

²⁵ Bharaki ndokuti kuna Bhiriamu, “Chisva warega zvako kuvarengerera kana kumbovakomborera.”

²⁶ Asi Bhiriamu akati, “Handina kukuudzai here kuti zvose zvandinenge ndaudzwa naTenzi ndizvo zvandichaita?”

Kuporofita kwaBhiriamu kwechitatu

²⁷ Bharaki akataurira Bhiriamu achiti, “Handei kune imwe nzvimbo. Zvimwe Mwari angafare kuti uvarengerere uriko.”

²⁸ Saka Bharaki akaenda naBhiriamu kugomo rePeori rakatarisana nerenje.

²⁹ Bhiriamu akati kuna Bharaki, “Ndivakirei atari nomwe pano, mundipe handira nomwe nehondohwe nomwe.”

³⁰ Bharaki akaita zvaakaudzwa naBhiriamu. Akapira handira nehondohwe paatari imwe neimwe.