Numeri 20 - Bhaibhiri Idzva rechiShona rine Dhuterokanonika

Zvakaitika paKadheshi

¹ Gungano rose ravaIsiraeri rakazosvika murenje reZini mumwedzi wokutanga, vakagara paKadheshi. Miriamu akafa akavigirwapo.

² Ipapo gungano rakashaya mvura. Vakabva vaunganidzana kuzonetsa Mosesi naAroni.

³ Vanhu vakapopotera Mosesi vachiti, “Dai takafira zvedu paya pakafira hama dzedu kumusuo wetendhe raTenzi rinoera!

⁴ Ko makaunzireiko gungano raTenzi murenje muno? Kuti tizofira muno here isu nezvipfuwo zvedu.

⁵ Ko makatiburitsireiko muIjipiti muchitiunza kunzvimbo ino yakaipa kudai, isina pokurima mbesa? Haina maonde. Haina michero yamagirepisi kana yamapomigiraneti! Kunyange mvura yokunwa zvayo hakuna!”

⁶ Ipapo Mosesi naAroni vakabva pane vanhu ivavo vakaenda kumusuo wetendhe rokusanganira, vakasvikoti pasi zvambarara, ndokubva vaona kupenya kwokuvapo kwaTenzi.

⁷ Tenzi ndokutaurira Mosesi achiti,

⁸ “Tora tsvimbo iya, uunganidze gungano ravanhu. Iwe nomukoma wako Aroni udzai dombo vaIsiraeri vakatarisa kuti riburitse mvura. Ipapo muchavabudisira mvura padombo. Naizvozvo muchawanisa gungano rose pamwechete nezvipfuwo zvavo mvura yokunwa.”

⁹ Mosesi akatora tsvimbo yakanga iri pamberi pebhokisi rechitenderano sokuudzwa kwaakaitwa naTenzi.

¹⁰ Mosesi naAroni vakaunganidza vanhu kudombo riya ndokuvati, “Chinzwai mhandupandu dzavanhu, imi! Ko tokubudisirai mvura padombo iri here?”

¹¹ Mosesi akasimudza ruoko rwake akarova dombo kaviri netsvimbo yake. Mvura zhinji zhinji ikabuda, vanhu vakanwa pamwechete nezvipfuwo zvavo.

¹² Tenzi akataurira Mosesi naAroni achiti, “Nokuti hamuna kuvimba neni, hamuna kuratidza vaIsiraeri kururama nokuera kwangu imi hamuchandosvitsi vaIsiraeri kunyika yandakavapa.”

¹³ Apa ndipo pamvura yenharo, paMeribha, pakaitira vaIsiraeri Tenzi nharo, asi Tenzi akavaratidza kuera kwake.

Mambo weEdhomu anorambidza vaIsiraeri kupfuura nomunyika yake

¹⁴ Mosesi akatuma nhume kubva kuKadheshi dzichienda kuna mambo weEdhomu kundoti, “Zvanzi nehama yenyu Isiraeri, munoziva nhamo dzose dzakatiwira.

¹⁵ Madzitateguru edu akaenda kuIjipiti kwatakagara kwenguva ndefu. VaIjipiti vakaonesa nhamo isu namadzitateguru edu.

¹⁶ Patakachema kuna Tenzi akanzwa kuchema kwedu, akatitumira mutumwa wake, akatibudisa muIjipiti. Iye zvino tiri paKadheshi, guta riri kumucheto kwenyika yenyu.

¹⁷ Zvino mungatibvumirewo here kupfuura nomunyika yenyu. Isu hatizobudi munzira tichipinda nomuminda yenyu yembesanwa kana yemigirepisi, kana kunwa mvura yetsime renyu zvaro. Ticharamba tiri Mumugwagwa Mukuru Wamambo, hatizotsaukiri kurudyi kana kuruboshwe kusvikira tabuda munyika yenyu.”

¹⁸ Asi Edhomu akati, “Haupfuuri nomangu muno. Kana ukangodaro ndinokuvinga nehondo yangu.”

¹⁹ VaIsiraeri vakati, “Ticharamba tiri mumugwagwa mukuru chete. Kana isu nezvipfuwo zvedu tikanwa mvura yenyu, tinoiripa. Tiregei tingotsikawo nomunyika yenyu. Ndicho chichemo chedu choga.”

²⁰ Asi Edhomu akati, “Hazviitiki kuti mupfuure nomuno.” Akabva avabudira nehondo yake yakasimba, ina varwi vazhinji zhinji.

²¹ Ndiko kuramba kwakaita Edhomu kuti vaIsiraeri vapfuure nomunyika yake, vaIsiraeri vakasiya zveEdhomu vakaenda nokumwe.

Kufa kwaAroni

²² Chita chose chavaIsiraeri chakasimuka paKadheshi, chikandosvika pagomo reHoru.

²³ Pagomo reHoru ipapo pamuganhu wenyika yaEdhomu, Tenzi akataurira Mosesi naAroni achiti,

²⁴ “Nguva yokuti Aroni afe, achienda kune vamwe vake vachakabvu yasvika. Haasiri kuzopinda munyika yandakapa vaIsiraeri nokuti makapikisana nezvandakareva paMeribha.

²⁵ Tora Aroni nomwanakomana wake Ereazari, ukwire navo mugomo reHoru.

²⁶ Bvisa Aroni hanzu dzake dzoupristi, upfekedze mwana wake Ereazari. Aroni achafira ipapo achibva aenda kune vamwe vake vachakabvu.”

²⁷ Mosesi akaita zvaakaudzwa naTenzi. Vakakwira mugomo reHoru vaIsiraeri vose vakatarisa.

²⁸ Mosesi akabvisa Aroni hanzu dziya, ndokudzipfekedza Ereazari mwanakomana waAroni. Aroni akabva afira pamusoro pegomo ipapo. Mosesi naEreazari vakaburuka mugomo.

²⁹ Gungano rose rakaona kuti Aroni afa. Vose vemhuri yaIsiraeri vakamuchema kwamazuva makumi matatu.