Mapisarema 95 - Bhaibhiri Idzva rechiShona rine Dhuterokanonika

Rumbo rwokurumbidza

¹ Uyai tiimbe tichirumbidza TENZI. Ngatipururudzirei nomufaro dombo ratinopona naro.

² Ngatiuyei paari tichimutenda ngatimupururudzirei tichimurumbidza nedzimbo.

³ Nokuti TENZI ndiMwari mukuru, uye ndiMambo mukuru ari pamusoro pavanamwari vose.

⁴ Pasi pakadzamisisa pari mumaoko ake, kunyange nhungamakore dzamakomo ndedzake.

⁵ Gungwa nderake nokuti ndiye akarisika uye nyika yakaoma, nokuti maoko ake ndiwo akaiumba.

⁶ Uyai tigwadame tikotame tichipfugamira TENZI musiki wedu

⁷ nokuti ndiTENZI wedu isu ndisu vanhu vaanofudza uye tiri hwai dziri mumaoko ake. Dai nhasi mukangoteererawo zvenyu kuizwi rake.

⁸ Musaomese mwoyo yenyu sokuMeribha somusi uya kuMasa murenje,

⁹ madzibaba enyu paakandiedza, vakatsvaka kuona zvandiri, kunyange vakanga vaona mabasa angu.

¹⁰ Kwamakore makumi mana ndakasema chizvarwa ichocho ndikati, “Vanhu vakarasika ava, vasina hanya nenzira dzangu.”

¹¹ Ndokusaka ndakapika nehasha kuti havambofa vakasvika kunzvimbo yangu yokuzorora.